Kebre Negest 22

፳፪፡በእንተ፡ታምሪን፡ነጋዲ።

ወሀለወ፡፩፡ልብው፡ሊቀ፡ነጋድያን፡ዘስሙ፡ተምሪን፡ወይጽዕን፡፭፻፡ወ፳፡አግማለ፡ወአሕማረኒ፡ቦቱ፡መጠነ፡፸ወ፫።ወሰሎሞን፡ንጉሥ፡አሜሃ፡ፈቀደ፡ከመ፡ይሕንጽ፡ቤተ፡እግዚኣብሔር፡ወለአከ፡ውስተ፡ኵሉ፡ነጋድያን፡ለምሥራቅ፡ወለምዕራብ፡ለደቡብ፡ወለሰሜን፡ከመ፡ይምጽኡ፡ነጋድያን፡ወይንሥኡ፡በኀቤሁ፡ወርቀ፡ወብሩረ፡ወውእቱኒ፡ይንሣእ፡ዘይትፈቀድ፡ለግብር፡ወነገርዎ፡በእንተ፡ውእቱ፡ነጋዲ፡ኢትዮጵያዊ፡ባዕል፡ወለአከ፡ከመ፡ ያምጽእ፡ሎቱ፡ዘይትፈቀድ፡እምብሔረ፡ዐረብ፡ወርቀ፡ቀዪሐ፡ወዕፀ፡ዘኢይነቅዝ፡ጸሊመ፡ወሰንፔረ።ወሖረ፡ውእቱ፡ነጋዲ፡ዘስሙ፡ተምሪን፡ነጋዲሃ፡ለንግሥተ፡ኢትዮጵያ፡ኀበ፡ሰሎሞን፡ንጉሥ፤ወነሥአ፡ኵሎ፡ዘፈቀደ፡ እምኔሁ፡ወወሀቦ፡ለነጋዲ፡ዘይፈቅድ፡አፈድፍዶ፡እምንዋዩ፡ወውእቱሰ፡ነጋዲ፡ልብው፡ፈድፋደ፡ወይሬኢ፡ጥበቢሁ፡ለሰሎሞን፡ወያነክር፡ወይትዐቀብ፡ከመ፡ይጠይቅ፡አውሥኦተ፡ቃሉ፡ወፍትሖ፡ወሣእሣአ፡አፉሁ፡ወጣዕመ፡ነገሩ፡ወሑረቶ፡ወንብረቶ፡ወተንሥኦቶ ፡ወግብሮ፡ወፍቅሮ፡ወሥርዐቶ፡ወማእዶ፡ወሕጎ፡ወለእለኒ፡ይኤዝዞሙ፡ምስለ፡ትሕትና፡ወየውሀት፤ወሶበኒ፡አበሱ፡ይምሕሮሙ፡እስመ፡በጥበብ፡ወበፍርሀተ፡እግዚኣብሔር፡ይሠርዕ፡ቤቶ፤ወያክሞስሶሙ፡በየውሀት፡ለአብዳን፡ወይሤርሖን፡በየውሀት፡ለአእማት፡ወይከሥት፡አፉሁ፡በአምሳል፤ወይጥዕም፡ቃሉ፡እምጸቃውዐ፡መዓር፡ወኵሉ፡ግብሩ፡ፍትው፡ወኵሉ፡ርእየቱ፡አዳም፤እስመ፡ትትፈቀር፡ጥበብ፡በኀበ፡ማእምራን፡ወትትሜነን፡በኀበ፡አብዳን፡ወዘንተ፡ኵሎ፡ርኢዮ፡ያስተዐጽብ፡ውእቱ፡ነጋዲ፡ወያነክር፡ፈድፋደ፡እስመ፡ለእለ፡ይሬእይዎ፡ኵለንታሁ፡መፍትው፡ወመምህር፡ውእቱ፤ወእለኒ፡በጽሑ፡ ኀቤሁ፡ኢይፈቅዱ፡ይእትቱ፡ወይትገሐሡ፡እምኔሁ፡በእንተ፡ጥበቡ፡ወላሕዩ፤ወጣዕመ፡ነገሩ፡ከመ፡ማይ፡ለጽሙእ፡ወከመ፡ኅብስት፡ለርኁብ፡ወከመ፡ፈውስ፡ለድዉይ፡ወከመ፡ልብስ፡ለዕሩቅ፡ወከመ፡አብ፡ለእጓለ፡ ማውታ፤ወይፈትሕ፡በጽድቅ፡ወኢያደሉ፡ለገጽ፤ወቦቱ፡ክብረ፡ወብዕለ፡ዘወሀቦ፡እግዚአብሔር፡ፈድፋደ፡ወርቀ፡ወብሩረ፡ወዕንቈ፡ወአልባሰ፡ክቡረ፡ወእንስሳ፡ወአራዊት፡ዘአልቦ፡ኆልቈ፡ወበመዋዕሊሁሰ፡ለሰሎሞን፡ንጉሥ፡ኮነ፡ወርቅ፡ከመ፡ብርት፡ወብሩር፡ከመ፡ዐረር፡ወብርትሰ፡ወዐረር፡ወኀጺን፡ኮነ፡ብዝኁ፡ከመ፡ዕፀ፡ባሕሩስ፡ወከመ፡ብርዐ፡ገዳም፡ወዕፀ፡ቄድሮስኒ፡ብዙኀ፡ኮነ፤በዘ፡ወሀቦ፡እግዚአብሔር፡ክብረ፡ወብዕለ፡ወጥበበ፡ወሞገሰ፡ዘኢኮኑ፡ከማሁ፡እለ፡እምቅድሜሁ፡ወኢይከውኑ፡እምድኅሬሁ፡ዘከማሁ፨ ፨ ፨