፲፡በእንተ፡ጽዮን። / በእንተ፡ዘከመ፡ነገሮ፡በእንተ፡ጽዮን።
ወእምሕል፡በርእስየ፡ወበጽዮን፡ታቦተ፡ኪዳንየ፡እንተ፡ፈጠርክዋ፡ለምሥሃል፡ወለመድኀኒተ፡ሰብእ፡ወኣወርዳ፡በደኃሪ፡ለዘርእከ፡ወእሠምር፡መሥዋዕተ፡ደቂቅከ፡በዲበ፡ምድር፡ወትሄሉ፡ምስሌሆሙ፡ታቦተ፡ኪዳንየ፡ለዓለም።ወሶበኒ፡መጽአ፡ደመና፡ከመ፡ኢይፍርሁ፡ወኢይምሰሎሙ ፡አይኅ፡ኣወርድ፡እማኅደረ፡ጽዮን፡ቀስተ፡ኪዳንየ፡ዘይኬልላ፡ለታቦተ፡ሕግየ፡ዝውእቱ፡ቀስተ፡ደመና፡ወሶበኒ፡በዝኀ፡ኀጢአቶሙ፡ወፈቀድኩ፡እትመዐዖሙ፡እዜከራ፡ለታቦተ፡ኪዳንየ፡ወእሬስያ፡ለቀስተ፡ደመና፡ወኣአትት፡መዐትየ፡ወእፌኑ፡ሣህልየ፤ወአንሰ፡ኢይረስዕ፡ቃልየ፡ወኢይሔሱ፡ዘወፅአ፡እምአፉየ፡ወለእመኒ፡ኀለፈ፡ሰማይ፡ወምድር፡ወቃልየሰ፡ኢየኀልፍ፨ አውሥእዎ፡ወይቤልዎ፡እለ፡ህየ፡ሊቃነ፡ጳጳሳት፡ለብፁዕ፡ጎርጎርዮስ፤ናሁኬ፡ይእዜ፡ለበውነ፡ጥዩቀ፡ከመ፡እምቀድመ፡ኵሉ፡ፍጥረት፡እመኒ፡መላእክት፡ወእምቅድመ፡ሰማያት፡ወምድር፡ወእምቅድመ፡ምጽናዓት፡ወልጐታተ፡ባሕር፡ዘፈጠራ፡ለታቦተ፡ኪዳን፡ዛቲ፡ይእቲ፡እንተ፡በሰማያት፡ታንሶሱ፡ዲበ፡ምድር፨ ፨ ፨