4
ዘከመ፡ይደሉ፡ተዐቅቦ፡እምሐሳውያን፡ነቢያት
1 አኀዊነ፡ለኵሉ፡መንፈስ፡ኢትእመኑ፡አላ፡አመክርዋ፡ለመንፈስ፡ለእመ፡እምኀበ፡እግዚአብሔር፡ይእቲ፡እስመ፡ብዙኃን፡ሐሳውያነ፡ነቢያት፡መጽኡ፡ውስተ፡ዓለም።
2 ወበዝንቱ፡ታአምርዋ፡ለመንፈሰ፡እግዚአብሔር፡ኵሉ፡መንፈስ፡እንተ፡ተአምን፡ከመ፡ኢየሱስ፡ክርስቶስ፡መጽአ፡በሥጋ፡ሰብእ፡እምነ፡እግዚአብሔር፡ይእቲ።
3 ወኵሉ፡መንፈስ፡እንተ፡ኢተአምን፡በኢየሱስ፡ክርስቶስ፡ከመ፡መጽአ፡በሥጋ፡ኢኮነት፡እምነ፡እግዚአብሔር። ወዝንቱ፡ውእቱ፡ሐሳዌ፡መሲሕ፡ዘሰማዕክሙ፡ከመ፡ይመጽእ።ወይእዜኒ፡ወድአ፡መጽአ፡ወውስተ፡ዓለም፡ሀሎ።
4 ወአንትሙሰ፡እምነ፡እግዚአብሔር፡አንትሙ፡ደቂቅየ፡ወሞእክምዎ፡ለእኩይ፡እስመ፡የዐቢ፡ዘሀሎ፡ምስሌክሙ፡እምነ፡ዘውስተ፡ዓለም፡ሀሎ።
5 ወእሙንቱሰ፡እምነ፡ዓለም፡እሙንቱ።ወበእንተ፡ዝንቱ፡እምነ፡ዓለም፡ይነብቡ፡ወዓለምኒ፡ይሰምዖሙ።
6 ወንሕነሰ፡እምነ፡እግዚአብሔር፡ንሕነ፡ወዘያአምሮ፡ለእግዚአብሔር፡ይሰምዐነ።ወዘኢኮነ፡እምእግዚአብሔር፡ኢይሰምዐነ።ወበዝንቱ፡ናአመራ፡ለመንፈሰ፡ጽድቅ፡ወለመንፈሰ፡ሐሰት።
7 አኀዊነ፡ለንትፋቀር፡በበይናቲነ፡እስመ፡ተፋቅሮ፡እምነ፡እግዚአብሔር፡ውእቱ።ወኵሉ፡ዘይትፋቀር፡እምነ፡እግዚአብሔር፡ውእቱ፡ተወልደ፡ወያአምሮ፡ለእግዚአብሔር።
8 ወዘሰ፡ኢያፈቅር፡ቢጾ፡ኢያአምሮ፡ለእግዚአብሔር።እስመ፡እግዚአብሔር፡ፍቅር፡ውእቱ።
9 ወበዝንቱ፡ተዐውቀ፡ፍቅሩ፡ለእግዚአብሔር፡ላዕሌነ፡እስመ፡ለወልዱ፡ዋሕድ፡ፈነዎ፡ውስተ፡ዓለም፡ከመ፡ንሕዮ፡በእንቲአሁ።
10 ወዝንቱ፡ውእቱ፡ፍቅሩ፡ለእግዚአብሔር፡አኮ፡ንሕነ፡ዘአፍቀርናሁ፡አላ፡ውእቱ፡አፍቀረነ፡ወፈነዎ፡ላወልዱ፡ይኅድግ፡ለነ፡ኃጣውኢነ።
11 አኀዊነ፡እመሰ፡ከመዝ፡አፍቀረነ፡እግዚአብሔር፡ወንሕነኒ፡ይደልወነ፡ንትፋቀር፡በበይናቲነ።
12 ለእግዚአብሔርሰ፡አልቦ፡ዘርእዮ፡ግሙራ፡ወእመሰ፡ተፋቀርነ፡በበይናቲነ፡እግዚአብሔር፡ይነብር፡ምስሌነ፡ወፍቅሩሂ፡ፍጹም፡ሀሎ፡ምስሌነ።
13 ወበዝንቱ፡ናአምር፡ከመ፡ምስሌሁ፡ንነብር፡ወውእቱ፡ምስሌነ፡እምነ፡መንፈሱ፡ቅዱስ፡ዘወሀበነ።
14 ወንሕነኒ፡ርኢነ፡ወሰማዕነ፡ከመ፡አብ፡ፈነወ፡ወልደ፡መድኅነ፡ዓለም።
15 ወኵሉ፡ዘየአምን፡ከመ፡ኢየሱስ፡ውእቱ፡ወልደ፡እግዚአብሔር።እግዚአብሔር፡ይነብር፡ምስሌሁ፡ወውእቱ፡ምስለ፡እግዚአብሔር።
16 ወንሕነሰ፡አእመርነ፡ወአመነ፡እንተቦ፡ፍቅረ፡እግዚአብሔር፡ምስሌነ።እግዚአብሔርሰ፡ፍቅር፡ውእቱ፡ወዘኒ፡ነበረ፡በተፋቅሮ፡ምስለ፡እግዚአብር፡ይነብር፡ወእግዚአብሔር፡ምስሌሁ።
17 ወበዝንቱ፡ትትፌጸም፡ተፋቅሮ፡ምስሌነ፡ከመ፡ንርከብ፡ገጸ፡በዕለተ፡ደይን፡በኀቤሁ።እስመ፡በከመ፡ኮነ፡ውእቱ፡ኮነ፡ንሕነኒ፡ውስተ፡ዝንቱ፡ዓለም።
18 ወእልቦ፡ፍርሀት፡ውስተ፡ተፋቅሮ፡አላ፡ተፋቅሮሰ፡ፍጽምት፡አፍአ፡ታወፅኣ፡ለፍርሀት።እስመ፡ፍርሀትሰ፡መቅሠፍት፡ባቲ፡ወዘሰ፡ይፈርህ፡ኢኮነ፡ፍጹመ፡በተፋቅሮ።
19 ወንሕነኒ፡ንትፋቀር፡በበይናቲነ፡ወናፍቅሮ፡ለእግዚአብሔር፡እስመ፡ውእቱ፡ቀደመ፡አፍቅሮተነ።
20 ወእመሰቦ፡ዘይብል፡አፈቅሮ፡ለእግዚአብሔር፡ወይጸልእ፡ቢጾ፡ሐሳዊ፡ውእቱ።እስመ፡ዘይፈቅሮ፡ለቢጹ፡ዘይሬኢ፡ለእግዚአብሔርኒ፡ያፈቅሮ፡ወዘሰ፡ኢያፈቅር፡ቢጾ፡ዘይሬኢ፡እፎ፡እንከ፡ይክል፡አፍቅሮቶ፡ለእግዚአብሔር፡ዘኢይሬኢ።
21 ወዝንቱ፡ትእዛዝ፡ብነ፡እምኔሁ፡ከመ፡ዘያፈቅሮ፡ለእግዚአብሔር፡ያፍቅር፡ቢጾ።
