3
1 አሌፍ።አነ፡ብእሲ፡ዘእሬኢ፡ተጽናሰ፡በበትረ፡መዐቱ።
2 ወነሥአኒ፡ወወሰደኒ፡ውስተ፡ጽልመት፡ዘአልቦ፡ብርሃነ።
3 ወሜጠ፡እዴሁ፡ኀቤየ፡ኵሎ፡ዕለተ።
4 በልየ፡ሥጋየ፡ወማእስየ፡ወተቀጥቀጠ፡አዕፅምትየ።
5 ቤት።ሐነጸ፡ጥቅመ፡ላዕለ፡ርእስየ፡ወአስርሐኒ።
6 ውስተ፡ጽልመት፡አንበረኒ፡ከመ፡ምውተ፡ትካት።
7 ወነደቀ፡ላዕሌየ፡ወኢይወፅእ፡ወአክበደ፡ብርትየ።
8 ጋሜል።እጸርኅ፡ወአዐወዩ፡እስመ፡ኀለፈት፡ጸሎትየ።
9 ዳሌጥ።ወሐነጸ፡ወዐጸወ፡ፍኖትየ።
10 ሆከት፡ድብ፡እንተ፡ትንዑ፡ውእቱ፡ሊተ፡ዐንበሳ፡ጽሚተ።
11 ዴገነኒ፡ወአኅለቀኒ፡ወረሰየኒ፡ገዳመ።
12 ሄ።ወሰቀ፡ቀስቶ፡ወአቀመኒ፡ከመ፡መጠራ፡ለሐጽ።
13 ወነደፈኒ፡ውስተ፡ኵልያትየ፡በአሕጻሁ።
14 ወኮንኩ፡ሠሐቀ፡ለኵሉ፡ሕዝብየ፡ወየሐልዩኒ፡ኵሎ፡አሜረ።
15 ዋው።አጽገበኒ፡ሕምዘ፡ወአርወየኒ፡ሐሞተ።
16 ወሰበረ፡ስነንየ፡በኆጻ፡ወአብልዐኒ፡ሐመደ።
17 ቀብጸት፡ነፍስየ፡ሰላመ፡ወረሳዕክዎ፡ለሠናይት።
18 ወሀጐልኩ፡ተስፋየ፡ወትውክልትየ፡በኀበ፡እግዚአብሔር።
19 ዛይ።ተዘከርኩ፡ተጽናስየ፡ወተሰድዶትየ፡ወምረተ፡ሕምዝየ።
20 ወዐንበዘት፡ነፍስየ፡በላዕሌየ።
21 ወኣነብር፡ውስተ፡ልብየ፤በእንተ፡ዝንቱ፡ጸናሕኩ።
22 ሔት።ምሕረተ፡እግዚአብሔር፡እስመ፡ኢኀልቀት፡ወኢተፈጸመ፡ሣሀሉ።
23 ሐዳሳት፡ለለጽባሑ፡በዝኀ፡ጽድቅከ።
24 ክፍልየ፡እግዚአብሔር፡ትቤ፡ነፍስየ፤በእንተ፡ዝንቱ፡እሴፈዎ።
25 ጤት።ኄር፡እግዚአብሔር፡ለእለ፡ይትዔገሥዎ፡ነፍስ፡እንተ፡ተኀሥሦ፡ለሠናይ።
26 ወትትዔገሥ፡ወታረምም፡ለመድኀኒተ፡እግዚአብሔር።
27 ጤት።ሠናይ፡ለብእሲ፡ሶበ፡ይነሥእ፡አርዑቶ፡እምንእሱ።
28 ወይነብር፡ባሕቲቱ፡ወይጻሙ፡ሶበ፡አንሥኡ፡ላዕሌሁ።
29 ይወዲ፡ውስተ፡መሬት፡አፉሁ፡ዮጊ፡ቦ፡ተስፋ።
30 ዮድ።ይመይዋ፡መልታሕቶ፡ለዘ፡ይጸፍፆ፡ወይጸግብ፡ጽዕለተ።
31 እስመ፡ኢይገድፎ፡እግዚአብሔር፡ለዓለም።
32 ካፍ።እስመ፡ዘአሕመመ፡ይሣሀል፡በከመ፡ብዝኀ፡ምሕረቱ።
33 እስመ፡ኢተቈጥዐ፡ልቡ፡ወኢሐመ፡በደቂቀ፡እጓለ፡እመሕያው።
34 ላሜድ።ከመ፡ይኅሰር፡በታሕተ፡እገሪሁ፡በኵሉ፡መኣስረ፡ምድር።
35 ከመ፡ይሜጥ፡ፍትሐ፡ብእሲ፡ቅድመ፡ገጹ፡ለልዑል።
36 መኑ፡ዘይቤ፡ዘይከውን፡እግዚአብሔር፡ዘኢእዘዘ።
37 መኑ፡ዘይቤ፡ዘይከውን፡እግዚአብሔር፡ዘኢእዘዘ።
38 ወእምአፈ፡ልዑል፡ዘኢወፅአ፡እኩይኒ፡ወሠናይኒ።
39 ሜም።ለምንት፡ያንጐረጕር፡ሰብእ፡እንዘ፡ሕያው፡ብእሲ፡በእንተ፡ኀጢአተ።
40 ኖን።ኅሥዎ፡ለፍኖት፡ወናግብእ፡ልብነ፡ኀበ፡እግዚአብሔር።
41 ናንሥእ፡ልበነ፡ወእደዊነ፡ኀበ፡እግዚአብሔር፡ሰማየ፡ንሕነ።
42 አበስነ፡ወጌገይነ፡ወኢተመየጥነ።
43 ሳምኬት።ደፈንከነ፡በመዐትከ፡ወሰደድከነ፡ወቀተልከነ፡ወኢምህከነ።
44 ጸለልከነ፡በደመና፡እምወፂእ፡ለምዕራገ፡ጸሎትነ፡ከመ፡ንሕምም፡ወከመ፡ኢንርአይ።
45 ዔ።አንበርከነ፡ማእከለ፡አሕዛብ።
46 ወከሠትከ፡አፉሆሙ፡ላዕለነ፡ለኵሉ፡ፀርነ።
47 ፍርሃት፡ወረዓድ፡አኀዘነ።
48 ፈለገ፡ማይ፡ውሕዘ፡እምአዕይንቲነ፡በእንተ፡ቅጥቃጤሃ፡ለወለተ፡ሕዝብየ።
49 ፌ።ዐይንየ፡ተደፍነት፡ወኢያረምም፡እስከ፡እምአልዕሎ።
50 ይሬኢ፡እግዚአብሔር፡እምሰማይ።
51 ዐይንየ፡ትደዊ፡ለነፍስየ፡በእንተ፡ኵሉ፡አዋልደ፡ሀገርየ።
52 ጸዴ።ንዒወ፡ነዐወኒ፡ፀርየ፡ከመ፡ፆፍ።
53 ወቀተሉ፡ሕይወትየ፡በከንቱ፡በውስተ፡ዐዘቅት፡ወከደኑኒ፡እብነ።
54 ተክፅወ፡ማይ፡ላዕለ፡ርእስየ፡እቤ፡ተኀድጉ፡እምኔሁ።
55 ቆፍ።ጸዋዕኩ፡ስመከ፡እግዚኦ፡እምግብ፡ታሕቲት።
56 ወሰማዕከኒ፡ቃልየ፡ወኢትሚጥ፡እዝነከ፡እምነ፡ስእለትየ።
57 ቅረብ፡በዕለተ፡እጼውዐከ፡ወበለኒ፡ኢትፍራሀ።
58 ሬስ።ኰነንከ፡እግዚኦ፡ኵነኔ፡ነፍስየ፡ወቤዘውከ፡ሕይወትየ።
59 ርኢከ፡እግዚኦ፡ኵሎ፡ዘይመክሩ፡ላዕሌየ፤ፈታሕከ፡ፍትሕየ።
60 ርኢከ፡ኵሎ፡ተበቅሎቶሙ፡ወኵሎ፡ኅሊናሆሙ፡ብየ።
61 ሳን።ሰማዕከ፡ኵሎ፡ጽዕለቶሙ፡እግዚኦ፡ወኵሎ፡ኅሊናሆሙ፡ላዕሌየ።
62 ወዘአሖሱ፡ከናፍሪሆሙ፡ላዕሌየ፡ኵሎ፡ዕለተ።
63 ንብረቶሙ፡ተንሥኦቶሙ፡ርኢ፡እግዚኦ።
64 ወፍድዮሙ፡ወተበቀሎሙ፡ለማኅለቅቶሙ።
65
66 ታው።ፍድዮሙ፡ወስድዶሙ፡በመዐትከ፡ወአጥፍኦሙ፡እምታሕተ፡ሰማይ፡እግዚኦ፡ሀቦሙ፡በከመ፡እከየ፡ልቦሙ።