6
በእንተ፡አጽንዖተ፡ቢጽ
1 አኀዊነ፡ለእመቦ፡ብእሲ፡ዘስሕተ፡አንትሙ፡እለ፡በመንፈስ፡ቅዱስ፡አጽንዕዎ፡ለዘ፡ከማሁ፡ በመንፈሰ፡የውሀት፡እንዘ፡ትትዓቀቡ፡ለርእስክሙ፡ኢትስሐቱ።
2 ወጹሩ፡ለቢጽክሙ፡ዘአክበዱ፡ላዕሌሆሙ፡ወቦቱ፡ትፌጽሙ፡ሕገ፡ክርስቶስ።ወአልቦ፡ዘያስሕት፡ርእሶ።
3 ወኵሉ፡ያመክር፡ምግባሮ፡በዘይከውኖ፡ምክሐ፡ለርእሱ፡ወአኮ፡ለባዕድ።
4 እስመ፡ኵሉ፡ጾሮ፡ይጸውር።
5 ወይስምዖ፡ንኡሰ፡ክርስቲያን፡ለዝነገር፡ወይትመሀር፡ኵሎ፡ሠናያተ።
6 ኢያስሕቱክሙ፡አልቦ፡ዘያስተአብዶ፡ለእግዚአብሔር።
7 ዘዘርዐ፡ሰብአ፡የአርር።
8 ዘዘርዐ፡ውስተ፡ሥጋሁ፡የአርር፡ሞተ፡ወዘዘርዐ፡ውስተ፡መንፈሱ፡የአርር፡ሕይወተ፡ዘለዓለም።
9 ወኢንትሀይ፡ገቢረ፡ሠናይ፡እስመ፡በዕድሜሁ፡ነአርሮ።
10 አምጣነ፡ብነ፡ዕለተ፡ንግበር፡ሠናየ፡ለኵሉ፡ወፈድፋደሰ፡ለሰብአ፡ሃይማኖት።
በእንተ፡አምኃ፡ወበረከት
11 ርእዩ፡ዘከመ፡ጸሐፍኩ፡ለክሙ፡በእዴየ።
12 ወእለሰ፡ይፈቅዱ፡ያድልዉ፡ለገጽ፡እሙንቱ፡ያጌብሩክሙ፡ትትገዘሩ፡ዳእሙ፡ከመ፡ኢትትልዉ፡መስቀሎ፡ለክርስቶስ።
13 ወእለሂ፡ተገዝሩ፡ኢዐቀቡ፡ኦሪተ፡ዳእሙ፡ይፈቅዱ፡ለክሙ፡ትትገዘሩ፡በመ፡በነፍስትክሙ፡ትዘሀሩ።
14 ወአንሰ፡ሓሰ፡ሊተ፡ኢይዜሀር፡ዘእንበለ፡በመስቀሉ፡ለኢየሱስ፡ክርስቶስ፡እግዚእነ፡ወበኀቤየሰ፡ምውት፡ዓለም፡ወአነሂ፡ምውት፡በኀበ፡ዓለም።
15 እስመ፡በኢየሱስ፡ክርስቶስ፡ተገዝሮሂ፡ኢይበቍዕ፡ወኢተገዝሮሂ፡ኢያሰልጥ፡ዘእንበለ፡ሐዲስ፡ፍጥረት።
16 ወላዕለ፡ኵሎሙ፡እለ፡ይገብሩ፡በዝንቱ፡ሕግ፡ሰላም፡ወሣህል፡ወዲበ፡እስራኤል፡ዘእግዚአብሔር።
17 እምይእዜ፡አልቦ፡ዘያንጥየኒ፡አንሰ፡ሕማሞ፡ለክርስቶስ፡እጸውር፡በሥጋየ።
18 ጸጋሁ፡ለእግዚእነ፡ኢየሱስ፡ክርስቶስ፡ምስለ፡መንፈስክሙ፡አኀውየ፡አሜን። ። ።
ተፈጸመት፡መልእክት፡ኀበ፡ሰብአ፡ገላትያ፡ወተጽሕፈት፡በሮሜ፡ወተፈነወት፡በእደ፡ቲቶ። ። ።
ወስብሐት፡ለእግዚአብሔር፡አሜን። ። ።