በእንተ፡ግብረ፡መምህራን
1 ዘክሮሙ፡ለቀደምት፡ወለመኳንንት፡ከመ፡ይትአዘዙ፡በኵሉ፡ምግባረ፡ሠናይ፡ወይኩኑ፡ጥቡዓነ፡ቦቱ።
2 ወኢይትቈጥዑ፡ወኢይትጋአዙ፡አላ፡መሓርያነ፡የዋሃነ፡ይኩኑ፡ምስለ፡ኵሉ፡ሰብእ።
3 እስመ፡ንሕነሂ፡ትካት፡አበድነ፡ዘእንበለ፡አእምሮ፡ወክሕድነ፡ወስሕትነ፡ወተቀነይነ፡ለፍትወት፡ወለሐውዝ፡ዘዘዚአሁ።ወተለውነ፡እኩየ፡ወተቃንኦ፡ወአሕሠምነ፡ወጸላእነ፡ቢጸነ።
4 ወአመ፡አስተርአየ፡ምሕረቱ፡ለእግዚአብሔር፡መፍቀሬ፡ሰብእ፡መድኀኒነ።
5 አኮ፡በምግባረ፡ጽድቅነ፡ዳእሙ፡በምሕረቱ፡አድኀነነ፡በጥምቀተ፡ዳግም፡ልደት፡ወተሐድሶ፡በመንፈስ፡ቅዱስ።
6 ዘሶጠ፡ላዕሌነ፡በብዕሉ፡በእንተ፡ኢየሱስ፡ክርስቶስ፡መድኀኒነ።
7 ከመ፡ንጽደቅ፡በጸጋሁ፡ወንረስ፡ተስፋ፡ሕይወት፡ዘለዓለም።
8 እሙን፡ነገር፡ወበእንተዝ፡እፈቅድ፡ታጽንዖሙ፡ከመ፡የሐልዩ፡ተራድአ፡ምግባረ፡ሠናይ፡እለ፡ተአመኑ፡በእግዚአብሔር።ዝንቱኬ፡ሠናይ፡ዘይበቍዖ፡ለሰብእ።
9 ነገረ፡ጋእዝ፡ወእበድ፡ዘይፈጥሩ፡ወመኃደምት፡ወወካሕ፡ተገሐሦሙ፡እስመ፡ከንቱ፡ውእቱ፡ ወኢይበቍዕ ።
10 ወአእምሮ፡ከመ፡ዐላዊ፡ውእቱ፡ዘከማሁ፡ወያስሕት፡ወያጌጊ፡ወይረክብ፡ኵነኔ።
11 ወአእምሮ፡ከመ፡ዐላዊ፡ውእቱ፡ዘከማሁ፡ወያስሕት፡ወያጌጊ፡ወይረክብ፡ኵነኔ።
ማኅተመ፡መልክእት
12 ወእምከመ፡ፈነውክዎ፡ለአርጢሞን፡ኀቤከ፡አው፡ቲኪቆስ፡ፍጡነ፡ነዓ፡ኀቤየ፡ሀገረ፡ኒቆጵልዮን፡እስመ፡አጥባዕኩ፡እክረም፡ህየ።
13 ለዜናስ፡ጸሓፌ፡ሀገር፡ወአጵሎስ፡ጽሁቀ፡ፈንዎሙ፡ኢይጸነሱ፡ምንተኒ።
14 ወእሊአነሂ፡ይትመሀሩ፡ምግባረ፡ሠናየ፡በዘይቀውሙ፡ውስተ፡ዘይትፈቀድ፡ግብር፡ከመ፡ኢይኅጥኡ፡ፍሬ።አምኁከ፡ኵሎሙ፡እለ፡ምስሌየ።
15 አምኅ፡ኵሎ፡ዘያፈቅረነ፡በሃይማኖት።ጸጋ፡የሀሉ፡ምስለ፡ኵልክሙ፡አሜን። ። ።
ተፈጸመት፡መልእክት፡ኀበ፡ቲቶ፡ወተጽሕፈት፡በሀገረ፡ናቆጵል፡ወተፈነወት፡ምስለ፡አርጣማ፡ረድኡ። ። ።
ወስብሐት፡ለእግዚአብሔር፡አሜን። ። ።