በእንተ፡ጽዋዔ፡ምእመናን
1 አስተበቍዐክሙ፡አነ፡ሙቁሕ፡በክርስቶስ፡ከመ፡ትሑሩ፡በዘይደልዋ፡ለጽዋዔክሙ፡ዘጸውዐክሙ።
2 እንዘ፡ታቴሕቱ፡ርእሰክሙ፡በኵሉ፡የውሀት፡ወትትዔገሡ፡ወኦሆ፡ትብሉ፡ለቢጽክሙ፡ወትጽህቁ፡ለተፋቅሮ፡ወተኀብሩ።
3 ወትዕቀቡ፡በአሐዱ፡መንፈስ፡ወበማእሠረ፡ሰላም።
4 ከመ፡ትኩኑ፡አሐደ፡ሥጋ፡ወአሐደ፡መንፈሰ፡በከመ፡ተጸዋዕክሙ፡ለአሐዱ፡ተስፋክሙ።
5 አሐዱ፡እግዚአብሔር፡ወአሐዱ፡ሃይማኖት፡ወአሐቲ፡ጥምቀት።
6 ወአሐድ፡እግዚአብሔር፡አብ፡ለኵሉ፡ዘላዕለ፡ኵሉ፡ወእምኔሁ፡ኵሉ፡ወውእቱ፡ውስተ፡ኵሉ።
7 ወለለአሐዱ፡እምኔነ፡ተውህበ፡ጸጋሁ፡በበ፡መስፈርተ፡ሀብቱ፡ለክርስቶስ።
8 እስመ፡ይቤ፡ዐረገ፡ውስተ፡አርያም፡ፄዊወከ፡ፄዋ፡ወወሀብከ፡ጸጋከ፡ለእጓለ፡እመሕያው።
9 ወምንትኑ፡እንከ፡ዘዐርገ፡ሶበ፡ኢወረደ፡መትሕተ፡ምድር።
10 ዘወረደሂ፡ውእቱ፡ወዘዐርገሂ፡ውእቱ፡ወዘሀሎ፡መልዕልተ፡ሰማያት፡ከመ፡ይፈጽም፡ኵሎ።
11 ወውእቱ፡ወሀበ፡ጸጋ፡ወከፈለነ፡ወረሰየነ፡እምሰብአ፡ዚአሁ፡ሐዋርያተ።ወእምኔሆሙ፡ነቢያተ፡ወመምህራነ፡ወእምኔሆሙ፡ኖሎተ፡ወእምኔሆሙ፡ሊቃውንተ።
12 በዘይጸንዑ፡ቅዱሳን፡ለግብረ፡መልእክቱ፡ወለሕንጻ፡ሥጋሁ፡ለክርስቶስ።
13 እስከ፡ንከውን፡ኵልነ፡አሐደ፡በሃይማኖት፡ወቢአእምሮቱ፡ለወልደ፡እግዚአብሔር፡ወንኩን፡ከመ፡ዘአሐዱ፡ብእሲ፡ፍጹም።ብጹሐ አምጣን፡በዐቅመ፡ፍጻሜሁ፡ለክርስቶስ።
14 ከመ፡አንኩን፡እንከ፡ደቂቀ፡ዘይተነትን፡ወይትሐወስ፡ምስለ፡ኵሉ፡ነፋስ፡ኀበ፡ትምይንተ፡ትምህርተ፡እጓለ፡እመሕያው፡እለ፡ይትመነገኑ፡በጕሕሉቶሙ፡ከመ፡ያስሕቱ።
15 አላ፡ንጽደቅ፡እንከ፡በተፋቅሮ፡ወንብዛኅ፡በኵሉ፡ዘብን፡በክርስቶስ፡ዘውእቱ፡ርእስ።
16 ዘቦቱ፡የኀድር፡ኵሉ፡ሥጋ፡ወይትዋደድ፡በኵሉ፡ሥርው፡በበመስፈርተ፡ሀብቱ፡ዘይትወሀብ፡ለለአሐዱ፡መሌሊት፡እምነ፡መለያልይ፡በዘይልህቅ፡ሥጋ፡ወይትፌጸም፡ከመ ይትፈጸም፡ሕንጻሁ፡በተፋቅሮ።
ተፈልጦ፡እምአሕዛብ
17 ዘንተ፡እብል፡ወአሰምዕ፡ለእገዚአብሔር፡በእንቲሁ፡ከመ፡ኢትሑሩ፡እንከ፡ከመ፡አሕዛብ፡እለ፡የሐውሩ፡በሕሊና፡ልቦሙ።
18 ወጽሉም፡ሕሊናሆሙ፡ወነኪራን፡እምሕይወተ፡እግዚአብሔር፡በእበዶሙ፡ወበጽላሌ፡ልቦሙ።
19 እለ፡ቅቡጻን፡ተስፋሆሙ፡ወመጠዉ፡ርእሶሙ፡ለሕርትምና፡ወለርኵስ፡ወለምርዓት።
20 ወአንትሙሰ፡አኮ፡ከማሁ፡ዘተምህርክምዎ፡ለክርስቶስ።
21 እመሰ፡አማን፡ትሰምዕዎ፡ወትትሜሀረ፡በኀቤሁ፡ጽድቀ፡እስመ፡ጽድቅ፡በኢየሱስ፡ክርስቶስ፡ውእቱ።
22 አእትቱ፡እምላዕሌክሙ፡ግዕዘክሙ፡ዘትካት፡እብል፡በእንተ፡ብሉይ፡ብእሲ፡ዘይማስን፡በፍትወተ፡ስሒት።
23 ሐድሱ፡መንፈሰ፡ልብክሙ።
24 ወልበስዎ፡ለሐዲስ፡ብእሲ፡ዘሐደሶ፡እግዚአብሔር፡በጽድቅ፡ወበርትዕ፡ወበንጽሕ።
25 ወበእንተዝ፡ኅድግዋ፡ለሐሰት፡ወተናገሩ፡ጽድቀ፡ኵልክሙ፡ምስለ፡ቢጽክሙ፡እስመ፡አሐዱ፡አባል፡ንሕነ።
26 ተምዑ፡ወኢተአብሱ፡ወዘእንበለ፡ይዕረብ፡ፀሐይ፡አቍርሩ፡መዓተክሙ።
27 ወኢተሀብዎ፡ፍኖተ፡ለሰይጣን።
28 ዘይሰርቅኒ፡ኢይስርቅ፡እንከ፡ለይትገበር፡ወይጻሙ፡እንከ፡በእደዊሁ፡ለሠናይ፡በዘይረድኦ፡ለነዳይ።
29 ወኵሉ፡ነገር፡ሕሡም፡ኢይፃእ፡እምአፉክሙ።ዘእንበለ፡ሠናይ፡በዘይትሐነጽ፡ትካዝክሙ፡ከመ፡ይርከቡ፡ ሞገሰ፡እለ፡ይሰምዑክሙ።
30 ወኢታምዕዕዎ፡ለመንፈስ፡ቅዱስ፡ዘቦቱ፡ዐተቡክሙ፡አመ፡ድኅንክሙ።
31 ኵሎ፡መሪረ፡ወቍጥዓ፡ወመርገመ፡ወመንሱተ፡ወፅርፈተ፡አእትቱ፡እምላዕሌክሙ፡ምስለ፡ኵሉ፡እኩይ።
32 ወኩኑ፡መሓርያነ፡ቢጽክሙ፡ወትጻገዉ፡በበይናቲክሙ፡በከመ፡ጸገወክሙ፡እግዚአብሔር፡በክርስቶስ።