Kebre Negest 108

፻፰፡በእንተ፡እከየ፡ይሁዳ፡ዕልው።

ወበእንተ፡እከዩ፡ለይሁዳ፡ረሲዕ፡ተነበዩ፡ነቢያት፡ወይቤ፡ዳዊት፡በእንቲአሁ፡ለብእሲ፡ዐማፂ፡ይንዕዎ፡እኪት፡ለአማስኖ፤ወካዕበ፡ይቤ፡ወይገብእ፡ጻማሁ፡ዲበ፡ርእሱ፡ወትወርድ፡ዐመፃሁ፡ዲበ፡ድማሑ።ወበከመ፡ተነበየ፡ሰሎሞን፡ወልዲ፡ወይቤ፡ብእሲ፡አብድ፡ወዐማፂ፡የሐውር፡ፍናዋተ፡ዘኢኮነ፡ርቱዓተ፡ወውእቱሰ፡ይቀጽብ፡በዐይን፡ወይዴምር፡በእግር፡ወይሁብ፡ትእምርተ ፡በቅጽበተ፡አጻብዕ፡ወበአጽንኖ፡ከናፍር፡ወዕሉት፡ልቡ፡ትኄሊ፡እኪተ፡በኵሉ፡ጊዜ፤ዘከመዝ፡ብእሲ፡ያመጽእ፡ህከከ፡ወቀትለ፡ወክዒወ፡ደም፡በዐመፃ፡ወኢያመሥጥ፡እምደይን፡ወበከመ፡ተነበየ፡ዳዊት፡አቡሁ፡ወይቤ፡ነገረ፡ጌጋይ፡አውፅኡ፡ላዕሌየ፤ዘኖመሰ፡ኢይነቅህኑ፡እንጋ፡ብእሴ ፡ሰላምየ፡ዘኪያሁ፡እትአመን፡ዘይሴሰይ፡እክልየ፡አንሥአ፡ሰኰናሁ፡ላዕሌየ፡ወበከመ፡ተነበየ፡ኢሳይያስ፡ነቢይ፡ወይቤ፡አሌሎቱ፡ለውእቱ፡ብእሲ፡ዐማፂ፡ዘያመጽእ፡ለመንሱት፤ወካዕበ፡ይቤ፡ያአትትዎ፡ለኃጥእ፡ከመ፡ኢይርአይ፡ስብሐተ፡እግዚአብሔር።ወበከመ፡ተነበየ፡ዳዊት፡ነቢይ፡ወይቤ፡ይነብብ፡ኃጥእ፡በዘ፡ያስሕት፡ርእሶ፡ ወአልቦ፡ፍርሀተ፡እግዚአብሔር፡ቅድመ፡አዕይንቲሁ፡ወበከመ፡ተነበየ፡ሰሎሞን፡ወልዲ፡ወይቤ፡ፀዋግ፡ብእሲ፡ሀከከ፡ያመጽእ፡ለህገር፡ወያመጽእ፡በእንቲአሁ፡ተሀጒሎተ፡ወዝብጠተ፡ወቅጥቃጤ፡ዘኢየሐዩ፡እስመ፡ይትፌሥሕ፡በኵሉ፡ዘይጸልእ፡እግዚአብሔር፡ወበከመ፡ተነበየ፡ሙሴ፡ነቢይ፡ወይቤ፡ኢይፈቅድ፡እግዚአብሔር፡ይስረይ፡ሎቱ፡ዘእንበለ፡ዘያፈደፍድ፡በቀለ፡ላዕሌሁ፤ወያነብር፡መቅሠፍተ፡ዲቤሁ፡ወይከውን፡ላዕሌሁ፡ዘጽሑፍ ፡ውስተ፡ዝንቱ፡መጽሐፍ፡መርገም፡ወይደመሰስ፡ስሙ፡እምታሕተ፡ሰማይ።ወበከመ፡ተነበየ፡ዳዊት፡ነቢይ፡ ወይቤ፡ጥቡዕ፡ልቡ፡ለቀቲል፤አብደራ፡ለመርገም፡ወትምጽኦ፡አበያ፡ለበረከት፡ወትርሕቅ፡እምኔሁ፡ወበከመ፡ተነበየ፡ኤርምያስ፡ነቢይ፡በእንቲአሁ፡ወይቤ፡ብእሲ፡ፀዋግ፡ይትሀጐል፡በእንተ፡ፍቅረ፡ብሩር፡ወይሬኢ፡ጽልመተ፡በእንተ ፡ጒሕሉቱ፡ወበከመ፡ተነበየ፡ኢዮብ፡ወይቤ፡በእንቲአሁ፡ይዘርዎ፡መሠንዮ፡ፈጣሪሁ፡ወይየብስ፡ ሥረዊሁ፡በታሕቴሁ፡ወይትነገፍ፡ጽጌ፡በመልዕልቴሁ፡ወይጠፍእ፡እምድር፡ዝክሩ፡ወይርሕቅ፡ስሙ፡ነዋኀ፤ወያፈልስዎ፡ውስተ፡ጽልመት፡ከመ፡ኢይርአይ፡ብርሃነ፡ለብእሲ፡ዐማፂ፡ይጠፍእ፡ቤቱ።ወበከመ፡ተነበየ፡ሆሴዕ፡ወይቤ፡በእንቲአሁ፡ስምዑኒ፡ደቂቀ፡እስራኤል፡እስመ፡አልቦ፡ጽድቀ፡ወአልቦ፡ምሕረተ፡ወአልቦ፡ፍርሀተ፡እግዚአብሔር፡ውስተ፡ልቡ፡ዘእንበለ፡ሐሰት፡ወስርቅ፡ወቀትል፡ወዝሙት።ወበከመ፡ተነበየ፡ዳዊት፡ነቢይ፡ወይቤ፡ሰይጣን፡ይቁም፡በየማኑ፤ ወካዕበ፡ይቤ፡ወሢመቶሂ፡ይንሣእ፡ባዕድ፡ወሙሴኒ፡ረገመ፡በሕግ፡ወይቤ፡ርጉም፡ለይኩን፡ኵሉ፡ዘይነሣእ፡ሕልያነ፡ከመ፡ይቅትል፡ደመ፡ንጹሐ፤ወይበል፡ኵሉ፡ሕዝብ፡አሜን፡ወአሜን። ወካዕበ፡ተነበየ፡እንባቆም፡ነቢይ፡እንዘ፡ይብል፡መኰንንኒ፡አለበወ፡በእንተዝ፡ዕልወተ፡ሕግ፡ ወኢይወፅእ፡ፍትሐ፡ጽድቅ፡እስመ፡ኃጥእ፡ይትዔገሎ፡ለጻድቅ፡በእንተዝ፡ይወፅእ፡ፍትሕ፡ግፍቱእ።ወበከመ፡ተነበየ፡ዳዊት፡ነቢይ፡ወይቤ፡ይሬኢ፡ኃጥእ፡ወይትመዐዕ፡ወየሐቂ፡ስነኒሁ፡ወይትመሰው።ወበከመ፡ተነበየ፡ ሰሎሞን፡ወልዲ፡ወይቤ፡ጽሉእ፡በኀበ፡እግዚአብሔር፡መዳልወ ፡ዐመፃ፡ወበከመ፡ተነበየ፡ኤርምያስ፡ነቢይ፡ወይ፡በእንተ፡ይሁዳ፡ድልው፡ሊተ፡ዐስብየ፡፴፡ብሩር፨ ፨ ፨