፻፮፡ትንቢት፡በእንተ፡ምጽአቱ፡ለክርስቶስ።
ወበእንተሰ፡ምጽአቱ፡ስማዕ፡ዘከመ፡ተነበዩ፡፩፩ዘአዳም፡ሰሚዖት፡በእንተ፡ምጽአቱ፡ተነበየ፡ኢሳይያስ፡ወይቤ፡ወልድ፡ተወልደ፡ለነ፡ሕፃን፡ተውህበ፡ለነ፡ስልጣን፡ጽሑፍ፡ዲበ፡መትከፍቱ፡ውእቱ፡አምላክ፡ጽኑዐ፡ምኵናን፡ንጉሥ፡ዐቢየ፡ምክር፡ስሙ፤ወትርጓሜሁ፡ዘንተ፡ይብል፡ገሃደ፡ወልደ፡እግዚአብሔር፡ተወልደ፡ዘመንግሥቱ፡ጽሑፍ፡እምቅድመ፡ዓለም፡ወይጠብብ፡እምነ፡ኵሉ፡ይብለከ፡ወካዕበ፡ተነበየ፡ወይቤ፡ኢሳይያስ፡ናሁ፡ቊልዔየ፡ዘኀረይኩ፡ዘሠምረት፡ነፍስየ፡ዲቤሁ፡ወይትዌከሉ፡አሕሳብ፡ቦቱ፤ወካዕበ፡ዝኒ፡ያሌብወነ፡ከመ፡መንፈሰ፡እግዚአብሔር፡ውእቱ፡ክርስቶስ፡ቃለ፡አብ፡ዘለብሰ፡ሥጋነ፡ወተወልደ፡ለነ፡ወአምኑ፡ቦቱ፡አሕዛበ፡ሮሜ፡ ወኢትዮጵያ፡ወባዕድኒ፡ኵሉ፡አሕዛብ፡ወለእስራኤልሰ፡ሕዝብ፡ይብሎሙ፡ወካዕበ፡ተነበየ፡ወይቤ፡ብዙኃን፡ይተልዉከ፡ድኅሬከ፡እንዘ፡ቅኑታን፡ሐቌሆሙ፡ወእሱራን፡ድኅሪተ፡በሰናስል፡ወይጼልዩ፡ኀቤከ፡ወይሰግዲ፡ለከ፡እስመ፡እግዚአብሔር፡አንተ፡ወኢያእመርናከ፤ወዘንተኒ፡በእንተ፡ሰማዕት፡ወእለ፡ይከውኑ፡ገዳማዊያን፡ወፈላስያን፡እለ፡እሱራን፡አልባቢሆሙ፡በትእዛዙ ፡ወይጼልዩ፡ሎቱ፡እስመ፡ድልው፡ዐስቦሙ፡ለክልኤሆሙ፡ሰማዕት፡ወፈላስያን፡ብሂል፤ ወኢያእመርናከሰ፡እስመ፡ተዐወርዎ፡እስራኤል፡ወሰቀልዎ፡ወአበዩ፡ሐዊረ፡በጽድቁ።ወካዕበ፡ተነበየ፡ወይቤ፡እግዚአብሔር፡ይመጽእ፡ወይትዌከሉ፡ወያአምሩ፡አሕዛብ፡ወዘንተኒ፡መጽአ፡ክርስቶስ፡ወአበይዎ፡አይሁድ፡ወአምኑ፡ቦቱ፡አሕዛብ፡ብሂል።ወካዕበ፡ተነበየ፡ወይቤ፡ጽንዑ፡እደው፡ድኩማን፡ወብረከ፡ፅቡሳን፡ወተፈሥሑ፡ዕንቡዛነ፡ልብ፡እስመ፡እግዚአብሔር፡መጽአ፡ዘይፈዲ፡ዕዳነ፡ወያድኅነነ፡ወይከሥት፡አዕይንተ፡ዕውራን፡ወያሰምዕ፡እዝነ፡ጽሙማን፡ወያረውጽ ፡እግረ፡ሐንካሳን፡ወያነብብ፡ልሳነ፡በሃማን፡ይነቡ፤ወዘንተኒ፡ዘተብህለ፡እለ፡ተስሕቱ፡በሰጊድ፡ለጣዖት፡ወእለ፡ምዉታን፡በኀጢአት፡ወእለ፡ተጸለለ፡ልብክሙ፡ወኢታአምሩ፡ዘፈጠረክሙ፤ ተፈሥሑ፡ዮም፡መጽአ፡ዘይፈዲ፡ኀጢአተ፡አዳም፡ረሲዮ፡ዕዳ፡ዚአሁ፡ተሰቂሎ፡ዘእንበለ፡ኀጢአት፡ቀተሎ፡ለሞት፡በሞቱ፤ወርእዩ፡ዕዉራን፡ወሖሩ፡ሐንካሳን፡ወሰምዑ፡ጽሙማን፡ወተናገሩ፡ርቱዐ፡በሃማን፡ወዓዲ፡ተንሥኡ፡ምዉታን፡ብሂል፡በከመ፡ተነበየ፡ዳዊት፡ነቢይ፡ወይቤ፡እግዚአብሔርሰ፡ገሃደ፡ይመጽእ፡ወአምላክነሂ፡ኢያረምም፡በከመ፡ተነበየ፡ኤርምያስ፡ወይቤ፡ይወርድ፡እግዚአብሔር፡ዲበ፡ምድር፡ ወያንሶሱ፡ምስለ፡ሰብእ፡ከማነ፡በከመ፡ተነበየ፡ሕዝቅኤል፡ነቢይ፡ወይቤ፡እመጽእ፡አነ፡አምላኮሙ፡ወኣንሶሱ፡ማእከሎሙ፡ወያአምሩኒ፡ከመ፡አምላኮሙ።ወበከመ፡ተነበየ፡ዳዊት፡ወይቤ፡ቡሩክ፡ዘይመጽእ፡በስመ፡እግዚአብሔር፡ባረክናክሙ፡በስመ፡እግዚአብሔር፡በከመ፡ተነበየ፡እንባቆም፡ወይቤ፡እግዚአብሔርሰ፡እምቴማን ፡ይመጽእ፡ወቅዱስኒ፡እምደብረ፡ፋራን፡ወእምአህጉረ፡ይሁዳ።በከመ፡ተነበየ፡ኤልያስ፡ነቢይ፡ወይቤ፡በሐዲስ፡ሥርዐት፡ይመጽእ፡እግዚአብሔር፡ኀቤነ፡በከመ፡ተነበየ፡ኢዩኤል፡ነቢይ፡ወይቤ፡አማኑኤል፡ሰማያዊ፡ይመጽእ፡ ወያድኅን፡ተግባሮ፡ዘለሐኰ፡በእዴሁ፡እምእደ፡ዲያብሎስ፡ተዐጋሊ፡ወአጋንንቲሁ፡መስሕታን፡ወበከመ፡ተነበየ፡ ዳዊት፡ነቢይ፡ወይቤ፡ያስተርኢ፡አምላከ፡አማልክት፡በጽዮን፤ወካዕበ፡ይቤ፡እምነ፡ጽዮን፡ይብል፡ሰብእ፡ወብእሲ፡ተወልደ፡በውስቴታ፡ወውእቱ፡ልዑል፡ሣረራ፡ወበከመ፡ተነበየ፡ሰሎሞን፡ወልዲ፡ወይቤ፡አማን፡ይሄሉ፡ እግዚአብሔር፡ምስለ፡ሰብእ፡ወያንሶሱ፡ዲበ፡ምድር፡ወበከመ፡ተነበየ፡አቡሁ፡ዳዊት፡ወይቤ፡ይወርድ፡ከመ፡ጠል፡ውስተ፡ፀምር፡ወከመ፡ነጠብጣብ፡ዘያንጠበጥብ፡ዲበ፡ምድር፡ወይሠርጽ፡ጽድቅ፡በመዋዕሊሁ።ወበከመ፡ተነበየ፡ሰሎሞን፡ወልዲ፡ወይቤ፡ይትወለድ፡መድኅን፡እምጽዮን፡ወያአትት፡ኀጢአተ፡እምያዕቆብ፡ወበከመ፡ ተነበየ፡ሆሴዕ፡ነቢይ፡ወይቤ፡እመጽእ፡ኀቤኪ፡ጽዮን፡ወኣንሶሱ፡ማእከሌኪ፡ኢየሩሳሌም፡ይቤ፡እግዚአብሔር፡ቅዱሰ፡እስራኤል፨ ወበከመ፡ተነበየ፡ሚኪያስ፡ነቢይ፡ወይቤ፡ያስተርኢ፡ቃለ፡እግዚአብሔር፡በኢየሩሳሌም፡ወሕግ፡ ይወፅእ፡እምጽዮን፡ወበከመ፡ተነበየ፡ሆሴዕ፡ነቢይ፡ወይቤ፡ያስተርኢ፡እግዚአብሔር፡ዲበ፡ምድር ፡ወየኀድር፡ምስለ፡ሰብእ፡ከማነ፡ወበከመ፡ተነበየ፡ኤርምያስ፡ነቢይ፡ወይቤ፡ይትፌኖ፡መድኅን፡እምጽዮን፡ወያአትት፡ኀጢአተ፡እምሕዝበ፡እስራኤል፡ወበከመ፡ተነበየ፡ሚኪያስ፡ነቢይ፡ወይቤ፡ይመጽእ፡እግዚአብሔር፡እምሰማይ፡ወየኀድር፡ውስተ፡ጽርሑ።በከመ፡ተነበየ፡ዘካርያስ፡ነቢይ፡ወይቤ፡ተፈሥሒ፡ወለተ፡ጽዮን፡ናሁ፡ሕያው፡አነ፡ወአኀድር፡ውስቴትኪ፡ይቤ፡እግዚአብሔር፡ቅዱሰ፡እስራኤል።ወበከመ፡ተነበየ፡ሚኪያስ፡ነቢይ፡ወይቤ፡ናሁ፡እግዚአብሔር፡ይመጽእ፡ወያበርህ፡ለእለ፡ይፈርህዎ፡ወፀሐየ፡ጽድቅ፡ስሙ።ወበከመ፡ተነበየ፡ሆሴዕ፡ነቢይ፡ወይቤ፡ይመጽእ፡እግዚአብሔር፡ላዕሌኪ፡ኢየሩሳሌም፡ወያስተርኢ፡በውስቴትኪ፡ወበከመ፡ተነበየ፡ዳዊት፡ነቢይ፡ወይቤ፡ወየሐዩ፡ወይሁብዎ፡እምወርቀ፡ዐረብ፡ወዘልፈ፡ይጼልዩ፡በእንቲአሁ፡ወይከውን፡ምስማከ፡ለኵሉ፡ምድር፡ውስተ፡አርእስተ፡አድባር፡ወበከመ፡ተነበየ፡ኢዮብ፡ጻድቅ፡ወይቤ፡እግዚአብሔር፡ያንሶሱ፡ዲበ፡ምድር፡ወየሐውር፡ዲበ፡ባሕር፡ከመ፡የብስ፡ወበከመ፡ተነበየ፡ዳዊት፡ነቢይ፡ወይቤ፡አጽነነ፡ሰማያተ፡ወወረደ።በከመ፡ተነበየ፡ኢሳይያስ፡ነቢይ፡ወይቤ፡ናሁ፡ድንግል፡ትፀንስ፡ወትወልድ፡ወልደ፡ወትሰምዮ፡ስሞ፡አማኑኤል፡ወበከመ፡ተነበየ፡ዳዊት፡ነቢይ፡ወይቤ፡ወለድኩከ፡እምከርሥ፡እምቅድመ፡ኮከበ፡ጽባሕ፤ወካዕበ፡ይቤ፡እግዚአብሔር፡ይቤለኒ፡ወልድየ፡አንተ፡ወአነ፡ዮም፡ወለድኩከ፡ወበከመ፡ተነበየ፡ጌዴዎን፡ወይቤ፡ናሁ፡ይወርድ ፡ከመ፡ጠል፡ውስተ፡ፀምር፡ወበከመ፡ተነበየ፡ዳዊት፡ነቢይ፡ወይቤ፡እግዚአብሔር፡ሐወጸ፡እምሰማይ፡ላዕለ፡እጓለ፡እመሕያው፡ወእምድልው፡ጽርሐ፡መቅደሱ፡በከመ፡ተነበየ፡ሙሴ፡ነቢይ ፡ወይቤ፡ወይብሉ፡ኵሎሙ፡ውሉደ፡እግዚአብሔር፡ጽኑዕ፡ውእቱ፡እስመ፡ይትቤቀል፡ደመ፡ደቂቁ፡ወበከመ፡ተነበየ፡ዳዊት፡ወይቤ፡ወበህየ፡ኣበቊል፡ቀርነ፡ለዳዊት፡ወኣስተዴሉ፡ማኅቶተ፡ለመሲሕየ፡ወኣለብሶሙ፡ኀፍረተ፡ለጸላእቱ፡ወቦቱ፡ይፈሪ፡ቅድሳትየ፡ወበከመ፡ይቤ፡ሆሴዕ፡ነቢይ፡ኢትፍራህ፡እስመ፡ኢትትኀፈር፡ወኢትደንግፅ፡በእንተ፡ዘሰባሕከ፤ወካዕበ፡ይቤ፡ስምዑኒ፡ስምዑኒ፡ሕዝብየ፡እስመ፡ፍትሕየ፡ርቱዕ፡እመጽእ፡ወአኀድር፡ምስሌክሙ፡ወይትዌከሉ፡አሕዛብ ፡በብርሃንየ፤እስመ፡አሕዛብ፡ኮኑ፡ፍቁራኒሁ፡ለክርስቶስ፡ወበከመ፡ይቤ፡ዳዊት፡ነቢይ፡ሕዝብ፡ዘኢያአምር፡ተቀንየ፡ሊተ፡ውስተ፡ምስማዐ፡እዝን፡ተሰጥዉኒ፤ወለአይሁድ፡ሰይቤሎሙ፡ውሉደ ፡ነኪር፡ሐሰዉኒ፡ውሉደ፡ነኪር፡በልዩ፡ወሐንከሱ፡በፍኖቶሙ፡ሕያው፡እግዚአብሔር፡ወቡሩክ፡አምላኪየ፤ሕያው፡እግዚአብሔር፡ሶበ፡ይብለከ፡በእንተ፡መለኮቱ፡ይነግር፡ወቡሩክ፡አምላኪየ፡ሶበ፡ይብለከ፡በእንተ፡እንተ፡ለብሰ፡ሥጋ፡ይነግር፡ወካዕበ፡ይቤ፡በእንተ፡እንተ፡ለብሰ፡ሥጋ፡በኢሳይያስ፡ነቢይ፡መኑ፡ዝንቱ፡መካሕ፡ዘይወፅእ፡እምኤዶም፡አዶናይ፡ዘወረደ፡እምሰማይ፡ወይለብስ፡ዘበሶር፡ግሩም፤መካሕ፡ሶበ፡ይብል፡ዘመዐዛሁ፡ሠናይ፡ወአዶናይ፡ብሂል፡ቃለ፡አብ፡ዘእምቅድመ፡ዓለም፡ወልደ፡እግዚአብሔር፡ይለብስ፡ዘበሶር፡ግሩም፡ሶበ፡ይብል፡ሥጋሁ፡ለአዳም፡ገሃደ፡ያርኢ።ወበከመ፡ተነበየ፡ዳዊት፡ነቢይ፡እንዘ፡ይብል፡በእንተ፡ሕዝበ፡ክርስቲያን፡በልዎሙ፡ለአሕዛብ፡ከመ፡እግዚአብሔር፡ነግሠ፡ወአጽንዓ፡ለዓለም፡ከመ፡ኢታንቀልቅል፤ ወካዕበ፡ተነበየ፡በእንተ፡ምጽአቱ፡ኀበ፡አሕዛብ፡ወይቤ፡እምቅድመ፡ገጹ፡ለእግዚአብሔር፡እስመ፡ይመጽእ፡ይመጽእ፡ወይኴንና፡ለምድር፡ወይኴንና፡ለዓለም፡በጽድቅ፡ወለአሕዛብኒ፡በርትዕ፡ወበከመ፡ተነበየ፡ኢሳይያስ፡ነቢይ፡ወይቤ፡እግዚአብሔር፡ጸባኦት፡መከረ፡ይስዐር፡ጽዕለቶሙ፡ለአሕዛብ፡ወያኅስሮሙ፡ለክቡራን፡ዐበይተ፡ምድር፤ወዓዲ፡አትለወ፡ትንቢቶ፡ወይቤ፡ይመጽእ፡ወየሐንጽ፡ቤቶ፡ወያድኅን፡ሕዝቦ፤ወዓዲ፡ወሰከ፡ወይቤ፡ወውእተ፡አሚረ፡ይሠርጽ፡እምሥርወ፡እሴይ፡ዘተሠይመ፡መልአከ፡አሕዛብ፡ወይትዌከሉ፡ቦቱ፡አሕዛብ፡ወይከውን፡ክብረ፡ምዕራፊሁ፡ለዓለም፡ወበከመ፡ተነበየ፡ዳዊት፡ወይቤ፡ዘምሩ፡ለእግዚአብሔር፡ዘየኀድር፡ውስተ፡ጽዮን፡ወንግርዎሙ፡ለአሕዛብ፡ምግባሮ፡ወበከመ፡ተነበየ፡ሰሎሞን፡ወልዲ፡ወይቤ፡በእንተ፡መድኀኒነ፡አማኑኤል፡ፀሐየ፡ጽድቅ፡እምቅድመ፡አውግር፡ወለደኒ፡ወእምቅድመ ፡ይጠአጣእ፡ወይግበር፡በሓውርተ፡ወእምቅድመ፡ዓለም፡ሣረረኒ፤ዘእንበለ፡ምድረ፡ይግበር፡ወዘእንበለ፡ቀላያተ፡ይግበር፡ወዘእንበለ፡ይፃእ፡አንቅዕተ፡ማያት፡ወያስተርኢ፡ሥነ፡ጽገያት፡ወእምቅድመ፡ይንፋሕ፡ነፋሳተ፡አየር፡እግዚአብሔር፡ፈጠራ፡ለምግባሩ፡ቅድመ፡ገጹ፡ወህሎኩ፡ኣስተዋድድ፡ምስለ፡አቡየ።ወበከመ፡ተነበየ፡አቡሁ፡ዳዊት፡ወይቤ፡እምቅድመ፡ፀሐይ፡ህሎ፡ስሙ፡ወእምቅድመ፡ወርኅ፡ለትውልደ፡ትውልድ፡ወበከመ፡ተነበየ፡ሰሎሞን፡ወልዲ፡ወይቤ፡አመ፡ጽኑዐ፡ይገብር፡መልዕልተ፡ደመናት፡ወአመ፡ያነብር፡ምንባረ፡አረፋተ፡አጽናፈ፡ሰማያት፡ወአመ፡ያነብራ፡ለባሕር፡በዐቅማ፡ወእምቅድመ፡ይሣርር፡መንበሮ፡መልዕልተ፡ነፋሳት፡ወአመ፡ጽኑዐ፡ይገብር፡መሠረታተ፡ምድር፡ሀሎኩ፡ምስሌሁ፡ኣስተዋድድ፡አነ፡ውእቱ፡ለእንተ፡ይትፌሥሕ፡ወትረ፡እንተ፡ጸብሐት፡ወእትሐሠይ፡ምስሌሁ፡በኵሉ፡ጊዜ፡በቅድመ፡ገጹ፡ወበከመ፡ተነበየ፡ኢዮብ፡ነቢይ፡ወይቤ፡ዘውእቱ፡ገጸ፡አምላኪየ፡ምሥራቅ፡ወእምቅድመ፡ፀሐይ ፡ብርሃኑ፡ወይትዌከሉ፡አሕዛብ፡በስሙ።ወበከመ፡ተነበየ፡ኢሳይያስ፡ነቢይ፡ወይቤ፡ኢትዝከሩ፡ዘትካት፡ወኢተኀልዩ፡ዘቀዲሙ፡ናሁ፡አነ፡እገብር፡ሐዲሰ፡ዘይእዜ፡ይሠርቅ፡ወከመ፡ታእምሩ፡እገብር፡ፍኖተ፡ውስተ፡በድው፡ወኣውሕዝ፡ማየ፡ውስተ፡ገዳም፡ወይድኅሩኒ፡አራዊተ፡ገዳም፡ወእጓለ፡አዕዋፍ፡ወሴሬኔሲ፤እስመ፡ወሀብኩ፡ማየ፡ውስተ፡በድው፡ወአውሐዝኩ፡ውስተ፡ገዳም፡ከመ፡ኣስትዮሙ፡ለሕዝብየ፡ወለኅሩያንየ፡እለ፡አጥረይኩ፡ከመ፡ይንግሩ፡ስብሐትየ፡ወይግበሩ፡ትእዛዝየ፡ወበከመ፡ተነበየ፡ሰሎሞን፡ወይቤ፡መኑ፡ዐርገ፡ውስተ፡ሰማይ፡ወወረደ፡ወመኑ፡አስተጋብአ፡ነፋሳተ፡ውስተ፡ሕፅኑ፡ወመኑ፡ዘዐቈረ፡ማያተ፡በልብሱ፡ወመኑ፡ሰፈረ፡ማየ፡ባሕር፡በሕፍኑ፡ወሰማየኒ፡በስዝሩ፡ወመኑ፡ስሙ፡ወመኑ፡ስመ፡ወልዲ።ወበከመ፡ተነበየ፡ሚኪያስ፡ነቢይ ፡ወይቤሎሙ፡ለአይሁድ፡ኢይሠምር፡ብክሙ፡ይቤ፡እግዚአብሔር፡ዘኵሎ፡ይመልክ፡ወኢይሠምር፡ምሥዋዕተክሙ፡ወኢይትመጠው፡ቊርባነ፡እምእዴክሙ፡እስመ፡እምሥራቀ፡ፀሐይ፡እስከ፡ዐረብ፡ይሴባሕ፡ስምየ፡በውስተ፡ኵሉ፡አሕዛብ፡ወበኵሉ፡በሓውርት፡ይትቄረብ፡ዕጣን፡ለስምየ፡ዐቢይ፡በውስተ፡ኵሉ፡አሕዛብ፡ይቤ፡እግዚአብሔር፡ዘኵሎ፡ይመልክ፡ወካዕበ፡ይቤ፡ሚኪያስ፡ነቢይ፡ሐዲስ፡ሥርዐት፡ያስተርኢ፡ደብረ፡እግዚአብሔር፡ወድልውት፡ውስተ፡አርእስተ፡አድባር፡ወይትሌዐል፡መልዕልተ፡አውግር፡ወይብሉ፡ንዑ፡ንዕርግ፡ውስተ፡ደብረ፡እግዚአብሔር፤ወየሐውሩ፡ኀቤሁ፡ብዙኃን፡አሕዛብ፡ወይብሉ፡ንዑ፡ንዕርግ፡ውስተ፡ደብረ፡እግዚአብሔር፡ወይንግሩነ፡ፍኖቶ፡ወንሖር፡ባቲ፡ወበከመ፡ተነበየ፡ዳዊት፡ነቢይ፡ወይቤ፡ስምዐኒ፡ሕዝብየ፡ወእንግርከ፡እስራኤል፡ኣሰምዕ፡ለከ፡አምላክከሰ፡አምላክ፡አነ፡ውእቱ፡ወበከመ፡ተነበየ፡ሙሴ፡ነቢይ፡ወይቤ፡በእንተ፡ሥላሴ፡ስማዕ፡እስራኤል፡፩፡ውእቱ፡እግዚአብሔር፡አምላክከ፤ ወዘንተሰ፡ይትፌከር፡አብ፡ወወልድ፡ወመንፈስ፡ቅዱስ፡፩ውእቱ፡አምላክ፡ዘአሐቲ፡መንግሥቶሙ፡ወአሐቲ፡ስልጣኖሙ፡ወአሐተ፡ይሰግዲ፡ሎሙ፡በሰማይ፡ወበምድር፡በባሕር፡ወበቀላያት፤ወሎቱ፡ስብሐት፡ለዓለመ፡ዓለም፡አሜን፨ ፨ ፨