፻፪፡በእንተ፡ቀዳሚ።
በከመ፡ዳዊት፡ተነበየ፡በአፈ፡መንፈስ፡ቅዱስ፡እንዘ፡ይብል፡ምስሌከ፡ቀዳማዊ፡በዕለተ፡ኀይል፤ማእዜ፡ይእቲ፡ዕለተ፡ኀይል፡ብሂል፤አኮኑ፡አመ፡ፈጠረ፡ክርስቶስ፡ቃለ፡አብ፡ሰማየ፡ወምድረ፡እስመ፡ይቤ፡ሙሴ፡ውስተ፡ርእሰ፡መጽሐፉ፡በቀዳሚ፡ገብረ፡እግዚአብሔር፡ሰማየ፡ወምድረ፤ለብዉኬ፡በቀዳሚ፡ብሂል፡በክርስቶስ፡ብሂል፡ቀዳሚ፡ትርጓሜሁ፡ክርስቶስ፡ይቤ፡ዮሐንስ፡ወልደ፡ዘብዴዎስ፡ሐዋርያ፡በእንተ፡ክርስቶስ፡ዝውእቱ፡ቀዳሚ፡ዘሰማዕነ፡ወዘርኢነ፡ወዘጠየቅነ፡ወዘገሰሳ፡እደዊነ፡ወንዜንወክሙ፡ከመ፡ኮነ፡ክፍልነ፡ምስሌሁ፡ወአንትሙኒ፡እለ፡ አመንክሙ፡በቃልነ፡ትከውኑ፡ክፍለ፡ምስሌነ።ወበከመ፡ይቤ፡ሉቃስ፡ረድእ፡በግብረ፡ሐዋርያት፡ቀዳሚሁ፡ለነገር፡ገበርነ፡በእንተ፡ኵሉ፡ወዘንተ፡ዘይቤ፡ክርስቶስ፡ኮነ፡ቤዛ፡ኵሉ፡ወንሕነኒ፡አመነ፡ቦቱ፡ወማርቆስ፡ወንጌላዊ ፡ውስተ፡ርእሰ፡መጽሐፉ፡ጸሐፈ፡ወይቤ፡ቀዳሚሁ፡ለወንጌል፡ኢየሱስ፡ክርስቶስ፡ወልደ፡እግዚአብሔር፤ ወዝንቱኒ፡ብሂል፡ክርስቶስ፡ስብከትኒ፡ለነቢያት፡ወሐዋርያት፡ወኀበርነ፡በጸጋሁ፡ወካዕበ፡ዮሐንስ፡ወንጌላዊ፡ጸሐፈ፡እንዘ፡ይብል፡ቀዳሚሁ፡ቃል፡ውእቱ፡ወውእቱ፡ቃል፡ኀበ፡እግዚአብሔር፡ውእቱ፤ወዳግመ፡አጠየቀ፡ቃሎ፡ወይቤ፡ወከማሁ፡ቀዳሚሁ፡እግዚአብሔር፡ውእቱ፡ቃል፤ይእዜኒ፡ኬ፡ጠይቅ፡ከመ፡ውእቱ፡ቃለ፡አብ፡ ክርስቶስ፡ውእቱ፡በዘ፡ቦቱ፡ገብረ፡ሰማየ፡ወምድረ፡ወኵሎ፡ፍጥረተ፤ውእቱ፡ፈጠረ፡ወዘእንበሌሁሰ፡አልቦ፡ ዘኮነ፡ወኢምንተኒ፤ይቤ፡ወኮኑ፡ወውእቱ፡አዘዘ፡ወተፈጥሩ፡ወሣልስ፡ክብር፡ስማዕ፡ወበእስትንፋሰ፡አፉሁ፡ኵሉ፡ኀይሎሙ፡ዝኒ፡ያርኢ፡ለመንፈስ፡ቅዱስ፡ዘተብህለ፡ጥዩቀ፡ወምንተ፡ንብል፤ንብኪዮሙ፡አሌሆሙ፡ለአይሁድ፡ወለአረሚ፡እለ፡ዐውከኩ፡እምጽድቅ ፡ወአበዩ፡ገኒየ፡ለፍቅረ፡እግዚአብሔር፡እንተ፡አፍቀሮ፡ለሰብእ፡በኂሩቱ፤ እስመ፡እምድኅረ፡ተገድፈ፡አዳም፡በዕልወቱ፡አድኀኖ፡በዕበየ፡ምሕረቱ፡ተሰቂሎ፡ዲበ፡ዕፀ፡መስቀል፡ወተቀኒዎ ፡በቅንዋተ፡እደዊሁ፤ሰፊሖ፡እራሑ፡በትሕትና፡አጽኒኖ፡ርእሶ፡በእንቲአነ፡ሐመ፡ዘኢይደልዎ፡ሕማም፡በዕበየ፡መለኮቱ፡ዘለዓለም፤ሞተ፡ከመ፡ይስዐሮ፡ለሞት፡ደክመ፡ከመ፡ያጽንዖ፡ለድኩም ፡መሬታዊ፤ጸሚኦ፡ሰሪቦ፡ብሒአ፡ተከሊሎ፡አክሊለ፡ሦክ፡ኢፈርሀ፡ወኢኀፈረ፡ኀሳረ፡ወጽዕለተ ፡ወምራቀ፡ዘርኩሳን፡አይሁድ፤ተጸፍዐ፡ተኰርዐ፡ተረግዘ፡ተቀነወ፡ተፀርፈ፡ተጽዕለ፡እንዘ፡አምላክ፡ውእቱ፡ወመላኬ፡ሞት፡ወወሃቤ፡ክብር፡ወበእንተዝኬ፡ተዐገሰ፡ኵሎ፡ኀሳረ፤ድኩምሰ፡ወኅሱር፡ያሐዝኖ፡ሶበ፡መነንዎ፡ወጸዐልዎ፡ወለጽኑዕሰ፡ወለክቡር፡ምንተ፡ያሐዝኖ፡ለእመ፡ሐሰዉ ፡ላዕሌሁ፤እስመ፡ለሊሁ፡ያአምር፡መለኮቶ፡ወያአምር፡ክብሮ፡ወያአምር፡ርእሶ፤ወሎቱሰ፡አልቦ ፡ዘያአምሮ ፡እስመ፡ገባሬ፡ኵሉ፡ውእቱ፤ወሶበሰ፡አእመሩ፡እመ፡ኢሰቀልዎ፡ለእግዚአ፡ስብሐት ፤ወይቤ፡በምሕረቱ፡ስረይ፡ሎሙ፡አባ፡እስመ፡ዘኢያአምሩ፡ይገብሩ፤ፈጣሪሆሙ፡በፍጥረት፡ያመስሉ፡ወቀተሉ፡ፈላሴ፡ዘኢኮነ፡እምፍጥረተ፡መዋቲ፡ወኢኮነ፡እምዘ፡ተገብረ፡በእድ፡አላ፡ውእቱሰ፡ለሊሁ፡ገባሪ፡ወለሊሁ፡ፈጣሪ፡ብርሃን፡ዘእምብርሃን፡አምላክ፡ዘእምአምላክ፡ወልድ፡ዘእምአብ፡ኢየሱስ፡ክርስቶስ፤ለሊሁ፡ምስካይ፡ለሊሁ፡መሴስይ፡ለሊሁ፡መጋቢ፡ውእቱ፡ዘህገሩ፡ላዕለ፡ዘልዑል፡መልዕልተ፡ኵሉ፡ተትሕተ።በከመ፡ይቤ፡ኢሳይያስ፡በሊኀ፡ቃል፡እምነቢያት፡ትሑት፡ብእሲሁ፡ወራእዩ፡ምኑን፡ከመ፡ሥርው፡በምድር፡ጽምእት፡ተሰዊሮ፡መጽአ፡በሥጋ፡ምድራዊት፡አኃዜ፡ኵሉ፡ወመድኀኔ፡ኵሉ፡ወዳዊትሰ፡ያስተሴንዮ፡እንዘ፡ይብል፡በስንከ፡ወበላሕይከ፤ወካዕበ፡ይቤ፡ይሤኒ፡ላሕዩ፡እምውሉደ፡እጓለ፡እመሕያው፤ወካዕበ፡ይቤ፡ተክዕወ፡ሞገስ፡እምከናፍሪከ፤ወካዕበ፡ይቤ፡አርትዕ፡ታሰራሕ፡ወንገሥ፡በእንተ፡ጽድቅ፡ወርትዕ፡ወየውሃት፤ወካዕበ፡ይቤ፡በእንተ፡አይሁድ፡ፀራ፡ለጽድቅ፡አሕፃከ፡ስሑል፡ኀያል፡ውስተ፡ልቦሙ ፡ለጸላእተ፡ንጉሥ፡ውስተ፡ልቦሙሰ፡ይረትዕ፡ይርግዝዎሙ፡ይቤ፡ለእለ፡ኢይፈቅዲ፡ያንግሡኒ፡ያምጽእዎሙ፡ቅድሜየ፡ወይርግዝዎሙ፡ወካዕበ፡ይቤ፡ኢሳይያስ፡በእንተ፡አይሁድ፡ኀሠሥክዎሙ፡ወኢረከብክዎሙ፡ጸዋዕክዎሙ፡ወኢተሰጥዉኒ፡ኣፍቀርክዎሙ፡ወጸልኡኒ፡ወካዕበ፡ዳዊትኒ፡ይቤ፡ፈደዩኒ፡እኪተ፡ህየንተ፡ሠናይት፡ወጸልኡኒ፡ህየንተ፡ዘኣፍቀርክዎሙ፡ወካዕበ፡ይቤ፡ኢሳይያስ፡በአፉሆሙ፡ያፈቅሩኒ፡ወበልቦሙሰ፡ነዋኀ፡ይርሕቁ፡እምኔየ፡ወከንቶ፡ያመልኩኒ።ወበከመ፡ይቤ፡ሙሴ፡እሙንቱ፡አምዕዑኒ፡በአማልክቲሆሙ፡ወአነ፡ኣቀንኦሙ፡በዘ፡ኢኮነ፡ሕዝበ፡እስመ፡ሕዝብ፡ህጉላነ፡ምክር፡እሙንቱ፡ወእለሰ፡ይብሉ፡አልብነ፡ሕገ፡ተውህቦሙ ፡ሕግ፡እስመ፡ለኵሉ፡ወሃቤ፡ሕግ፡እግዚአብሔር፤ወፈደዮሙ፡እግዚአብሔር፡በከመ፡እከዮሙ፡ለአይሁድ፡ወገብረ፡ሎሙ፡እግዚአብሔር፡በከመ፡የውሃቶሙ፡ለአሕዛብ፤እስመ፡መሐሪ፡ውእቱ ፡ወመስተሣህል፡ለእለ፡ይጼውዕዎ፡ወይትመሐፀኑ፡ቦቱ፡ወያነጽሑ፡ርእሶሙ፡እምኵሉ፡ርኵስ፡በውስተ፡ቤተ፡ክርስቲያኑ፡ወበውስተ፡ታቦተ፡ሕጉ፡ለእግዚአብሔር፡ወእለ፡ይበክዩ፡ወይኔስሑ፡ያፈቅሮሙ፡በከመ፡ይቤ፡እስጢፋኖስ፡እምነ፡፸፡አርድእት፤ወካዕበ፡በውስተ፡፸፡ፈድፋደ፡፯፡እምኔሆሙ፡እለ፡ተኀርዩ፡ለግብር፡ምስለ፡፲ወ፪፡ሐዋርያት፡ለግብረ፡መልእክት፡ምስለ፡ሲላስ፡ወበርናባስ፡ወማርቆስ፡ወሉቃስ፡ወጳውሎስ፤ወውእቱ፡እስጢፋኖስ፡ይቤሎሙ፡ለአይሁድ፡እንዘ፡ይቀውም፡ለስምዕ፡እንዘ፡ይቀትልዎ፡ይቤሎሙ፡ለአይሁድ፡እንዘ፡ያርእዮሙ፡እበዶሙ፡በእንተ፡ዘኢዐቀቡ፡ትእዛዘ፡እግዚአብሔር፡ነሢአክሙ፡ኦሪተ፡በሥርዐተ፡መላእክት፡ኢዐቀብክሙ፤ወይቤ፡በግብር፤ሰሚዖሙ፡ዘንተ፡አብዲ፡ወሐቀዩ፡ስነኒሆሙ፡አፅምኡኒኬ፡በእንተ፡ዘይቤ፡ሥርዐተ፡መላእክት፡ኦሪተ፡ኢዐቀብክሙ፡አርአያሃ፡ወጽላሎታ፡ለእንተ፡በሰማይ፡እንተ፡በሰማይሰ፡ኢየሩሳሌም፡አግዓዚት፡ማኅደሩ፡ለልዑል፡እንተ፡ኢትትዐወቅ፡ኅብራ፡ወግብራ፡በልበ፡መዋቲ፤ወውስቴታ፡መንበሩ፡ለልዑል፡በእሳት፡ክሉል፡ወ፬፡እንስሳ፡ይጸውሩ፡በውስተ፡መካኖሙ፡ዘውእቱ፡ሳድስ፡ሰማይ፡ወየዐርግ፡መንበር፡ለሳብዕ፡ሰማይ፡ማኅደረ ፡አብ፡ወህየ፡ይነብር፡ዘሀሎ፡ምስለ፡አቡሁ፡ወመንፈሱ፡ቅዱስ፡ማሕየዌ፡ኵሉ፤ወአምሳለ፡መንበር፡ዘቅድስት፡ኢየሩሳሌም፡ዛቲ፡ይእቲ፡ታቦት፡ዘቤተ፡ክርስቲያን፡ወአምሳለ፡ኢየሩሳሌም፡እንተ፡በሰማያት፡ዛቲ፡ይእቲ፡ቤተ፡ክርስቲያን፡እንተ፡አሕዛብ፨ ፨ ፨