፺፮፡በእንተ፡ትንቢት፡ዘክርስቶስ።
ወካዕበ፡ሰበከ፡ሙሴ፡በኦሪት፡ወይቤ፡ነቢየ፡ያነሥእ፡ለክሙ፡ዘከማየ፡እምአኀዊክሙ፡ወስምዕዎ፡ለውእቱ፡ነቢይ፡ወኵሉ፡ነፍስ፡እንተ፡ኢትሰምዖ፡ለውእቱ፡ነቢይ፡ይእቲ፡ነፍስ፡ለትሠሮ፡እምሕዝባ፤ወዘንተ፡ይቤ፡በእንተ፡ክርስቶስ፡ወልደ፡እግዚአብሔር፡ወካዕበ፡ተነበየ፡በእንተ፡ስቅለቱ፡ወይቤ፡ሶበ፡አመንደብዎሙ፡አክይስት፡ለደቂቀ፡እስራኤል፡አውየዉ፡ኀበ፡ሙሴ፡ወሙሴሂ፡አውየወ፡ኀበ፡እግዚአብሔር፡ከመ፡ያድኅኖሙ፡እምአርዌ፡ምድር፡ወይቤሎ፡ግበር፡ሣዕለ፡ከይሲ፡ዘብርት፡ወስቅሎ፡ኀበ፡ይትኤመርዎ፡ወኵሉ፡ዘነሰኮ፡ከይሲ፡ይነጽሮ፡ለውእቱ፡ሥዕለ፡ብርት፡ወይሕየው፡ወሶበ፡ተህከዩ፡ነጽሮ፡ይመውቱ፡ወእለሰ፡ነጸርዎ፡ወአምኑ፡የሐይዉ፤ ወከማሁ፡ክርስቶስ፡ለእለ፡ተህከዩ፡ወኢአምኑ፡ቦቱ፡የኀልቁ፡በሲኦል፡ወእለሰ፡አምኑ፡ወሰምዑ፡ይወርሱ፡ምድረ፡ሕይወት፡ዘለዓለም፡ኀበ፡አልቦ፡ደዌ፡ወሕማም፡ዘለዓለም።ወዘከመሂ፡ተህየይዎ ፡ለክርስቶስ፡ቃለ፡እግዚአብሔር፡ንሕነ፡ናየድዐክሙ፤ሶበ፡ሐመይዎ፡ለሙሴ፡ደቂቀ፡እስራኤል፡እንዘ፡ይብሉ፡ለባሕቲቱኑ፡ለሙሴ፡ዘተናገሮ፡እግዚአብሔር፡ወንሕነሰ፡እፎ፡ዘኢንሰምዕ፡ቃለ፡እግዚአብሔር፡ከመ፡ንእመን፡ቦቱ፡ወሰምዐ፡እግዚአብሔር፡ማእመሬ፡አልባብ፡ሐሜቶሙ፡ለደቂቀ፡እስራኤል፡ወይቤሎ፡ለሙሴ፡ወአንተሰ፡በዝየ፡ትስእል፡ስርየተ፡ለሕዝብከ፡ወእሙንቱሰ ፡ሐመዩከ፡እንዘ፡ይብሉ፡ለነሰ፡እፎ፡ዘኢይትናገረነ፡እግዚአብሔር፤ወይእዜኒ፡ለእመ፡አምኑኒ፡ይምጽኡ፡ኀቤየ፡ምስሌከ፡ዝየ፡ወበሎሙ፡ከመ፡ያንጽሑ፡ርእሶሙ፡ወይኅፅቡ፡አልባሲሆሙ፡ወይዕርጉ፡ዐበይተ፡እስራኤል፡ከመ፡ይስምዑ፡ዘአነ፡እኤዝዞሙ፡ወይስምዑ፡ቃልየ፡ወይግበሩ፡ትእዛዝየ፡ዘአነ፡አዘዝኩ፤ወተአዚዞ፡ሙሴ፡ነገሮሙ፡ለደቂቀ፡እስራኤል፡ወሰገዲ፡ሕዝብ፡ለእግዚአብሔር፡ወአንጽሑ፡ርእሶሙ፡በሣልስት፡ዕለት፡ወዐርጉ፡ውስተ፡ደብረ፡ሲና፡፸፡አእሩገ፡እስራኤል፡ወወፅኡ፡እምትዕይንት፡ወዐርጉ፡ውስተ፡ደብረ፡ሲና፡እንዘ፡ይትራሐቁ፡መጠነ፡ምንዳፈ፡ሐጽ፡ቆሙ፡በበ፩፡በአንጻረ፡ቢጹ፡ወእሙንቱሰ፡መጠነ፡ቦሙ፡ፈተኑ፡ ምግባሮሙ፡ወኢክህሉ፡ዐሪገ፡ውስተ፡ቆባር፡ምስለ፡ሙሴ፡ወአኀዞሙ፡ረዓድ፡ወድንጋፄ፡ወደፈኖሙ፡ጽላሎተ፡ሞት፡ወሰምዑ፡ቃለ፡ቀርን፡ወዕንዚራ፡ወጽልመት፡ወነፋስ፤ወቦአ፡ሙሴ፡ውስተ፡ቆባር፡ወተናገረ፡ምስለ፡እግዚአብሔር፡ወሰምዑ፡ኵሎሙ፡ዐበይተ፡እስራኤል፡ውእቱ፡ቃለ፡እግዚአብሔር፡ፈርሁ፡ወርዕዲ፡ወኢክህሉ፡ቀዊመ፡እምብዝኀ፡ፍርሀት፡ዘውስተ፡ልቦሙ፤ ወሶበ፡ወፅአ፡ሙሴ፡ይቤልዎ፡ኢንሰምዓ፡ለዛቲ፡ቃለ፡እግዚአብሔር፡ከመ፡ኢንሙት፡በድንጋፄ ፡ወናሁ፡አእመርነ፡ከመ፡ተናገረከ፡እግዚአብሔር፡ወለእመቦ፡ዘይነግረነኬ፡አንተ፡ስማዕ፡ወንግረነ፡ወኩነነ፡አፈ፡በኀበ፡እግዚአብሔር፡ወንከውኖ፡ሕዝበ፡ዚአሁ፡ትሬእዩኑ፡ዘከመ፡ክሕድዎ፡ለክርስቶስ፡ወይቤሉ፡ኢንሰምዖ፡ለውእቱ፡ቃል፡ከመ፡ኢንሙት፡በድንጋፄ፤ወቃልሰ፡ዘእግዚአብሔር፡ክርስቶስ፡ውእቱ፤ወአሜሃ፡ዘይቤሉ፡ኢንስምዖ፡ለውእቱ፡ቃል፡ኢነአምኖ፡ለክርስቶስ፡ብሂል፨ወካዕበ፡ሰአለ፡ሙሴ፡ኀበ፡እግዚአብሔር፡ወይቤ፡አርእየኒ፡ገጽከ፤ወይቤሎ፡እግዚአብሔር፡ለሙሴ፡እስመ፡አልቦ፡ዘይክል፡ርኢየ፡ገጽየ፡ወየሐዩ፡ወባሕቱ፡ከመ፡መጽሔት፡ሚጥ፡ገጽከ፡ለምዕራብ፡ወትሬኢ፡በውስተ፡ኰኵሕ፡መጽሔተ፡ገጽየ፤ወሶበ፡ርእየ፡ሙሴ፡ጽላሎተ፡ገጹ፡ለእግዚአብሔር፡በርሀ፡ገጹ፡ምስብዒተ፡እምነ፡ፀሐይ፡እስከ ፡ኢይክሉ፡ደቂቀ፡እስራኤል፡ነጽሮተ፡ገጹ፡ዘእንበለ፡በግላ፤ወርእየ፡አሜሃኒ ከመ፡ኢፈተዉ፡ይርአዩ፡ገጸ፡እግዚአብሔር፡አላ፡ይቤልዎ፡ግበር፡ለነ፡ግላ፡ከመ፡ኢንርአይ፡ገጽከ፤ወዘንተ፡ሶበ፡ይቤሉ፡ይትዐወቅ፡ከመ፡ጸልእዎ፡ለክርስቶስ፡ሰሚዐ፡ቃሉ፡ወርኢየ፡ገጹ።ዓዲ፡ሶበ፡አዕረጎ፡አብርሃም፡ለይስሐቅ፡ወልዲ፡ውስተ፡ደብረ፡ቀርሜሌዎስ፡አውረደ፡እምሰማያት፡ቤዛ፡ይስሐቅ፡በግዐ፡ወይስሐቅሰ፡ኢተጠብሐ፡አላ፡ተጠብሐ፡በግዕ፡ዘወረደ ፡እምሰማያት፤እስመ፡አብርሃም፡ይተረጐም፡በእግዚአብሔር፡አብ፡ወይስሐቅኒ፡ይተረጐም፡አምሳሊሁ፡ለክርስቶስ፡ወልድ፤ ወአመ፡ይወርድ፡እምሰማያት፡ለመድኀኒተ፡አዳም፡ወደቂቁ፡ኢተጠብሐ፡መለኮት፡ዘወረደ፡እምሰማያት፡አላ፡ተጠብሐት፡ሥጋሁ፡እንተ፡ለብሰ፡በእንቲአነ፡ይእቲ፡ምድራዊት፡እንተ፡ለብሰ፡እማርያም፤ትሌብዉኑ፡ወትጤይቁ፡ዘንተ፡አርአያ፡ወአምሳለ፡ለምድራዊ፡ይስሐቅ፡ወልደ ፡አብርሃም፡ዘኮነ፡መሥዋዕተ፡ለፈቃደ፡አቡሁ፤ኮነ፡ሎቱ፡ቤዛሁ፡በግዕ፡ሰማያዊ፡ወተቤዘወ፡ወልደ፡አብርሃም፡ወለዘሰ፡ወረደ፡ወልደ፡እግዚአብሔር፡ኮነ፡ቤዛሁ፡ለመለኮት፡ሥጋሁ፡ለምድራዊ፡ወሞተ፡በሥጋሁ፡እንዘ፡ኢየሐምም፡መለኮቱ፡ወተውላጠ፡ኮነ፤መዋቲት፡ኮነት፡ሕይወተ፡በትንሣኤሃ፡ምስለ፡መለኮት።ወገሃደ፡ተዐውቀ፡ዕበይነ፡ለሰብእ፡በእንተ፡ዘቤዘወነ፡ክርስቶስ፡ወልደ፡እግዚአብሔር፤ወፈድፋደ፡ናክብራ፡በምድርኒ፡ወበሰማይኒ፡ለዛቲ፡እግዝእትነ፡ወላዲተ፡አምላክ፡ማርያም፡ድንግል፡ወስምዑ፡ዘኒ፡ፍካሬ፡ቀዳማዊ፡ብእሲ፡ዘውእቱ፡አቡነ፡አዳም፤ዘእንበለ፡ትድምርት፡ወሩካቤ፡እምዐፅመ፡ገቦሁ፡ተፈጥረት፡ሔዋን፡እምብእሲ፡ወይእቲ ፡ኮነቶ፡ቢጾ፤ወሰሚዓ፡ቃለ፡ሕብል፡እምዕድዉ፡ለአዳም፡ኮነቶ፡ቀታሊተ፡በአዕልዎ፡ትእዛዝ፤ ወበምሕረቱ፡እግዚአብሔር፡አብ፡ፈጠራ፡ለባሕርይ፡በውስተ፡ከርሡ፡ለአዳም፤አንጺሖ፡ሥጋሃ፡ወቀዱሶ፡አኅደራ፡ላዕሌሃ፡ለመድኀኒቱ፤ተወልደት፡ዘእንበለ፡ጥልቀት፡እስመ፡ገብራ፡ለንጽሕት ፡ዘእንበለ፡ርስሐት፡ወይእቲ፡ፈደየት፡ዕዳሁ፡ዘእንበለ፡ትድምርት፡ወዘእንበለ፡ሩካቤ፤ወለደት፡በሥጋ፡ሰማያዊ፡ንጉሠ፡ወውእቱ፡ተወልደ፡እምኔሃ፡ወሐደሳ፡ለሕይወት፡በንጽሐ፡ሥጋሁ፡ወቀተሎ፡ለሞት፡በሥጋሁ፡ንጽሕት፡ወተንሥአ፡ዘእንበለ፡ሙስና፡ወአንሥአነ፡ምስሌሁ፡ኀበ፡ኢመዋቲት፡መንበረ፡መለኮት፡ወአዕረገነ፡ኀቤሁ፡ወተወለጥነ፡ሕይወተ፡በሥጋነ፡መዋቲት፡ወረከብነ፡ሕይወተ፡እንተ፡ኢትመውት፤ በስሕታተ፡አዳም፡ተመንደብነ፡ወበትዕግሥተ፡ክርስቶስ፡ተፈወስነ፡በዕልወተ፡ሔዋን፡ሞትነ፡ወተቀበርነ፡ወበንጽሓ፡ለማርያም፡ከበርነ፡ወተላዐልነ፡እስከ፡አርያም፡ተነበየ፡ካዕበ፡ሕዝቅኤል፡በእንተ፡ማርያም፡ወይቤ፡ርኢኩ፡ኆኅተ፡በምሥራቅ፡ኅቱም፡በዐቢይ፡መንክር፡ማኅተም፡ወአልቦ፡ዘቦአ፡ውስቴታ፡ዘእንበ፡ለእግዚአ፡ ኀያላን፡ቦአ፡ውስቴታ፡ወወፅአ፤ዘኒ፡ፍካሬሁ፡ስምዑ፤ዘይቤ፡ርኢኩ፡ኆኅተ፡በአማን፡ኆኅተ፡አንቀጸ፡ሰማይ፡ሙባኦሙ፡ለቅዱሳን፡ውስተ፡መንግሥተ፡ሰማያት፤ወበምሥራቅ፡ሶበ፡ይብል፡በእንተ፡ንጽሐ፡ወአዳም፡ሥና፤ይብልዋ፡አንቀጸ፡አድኅኖ፡ወይብልዋ፡ምሥራቅ፡ዘይኔጽርዎ፡ቅዱሳን፡በፍሥሓ፡ወበሐሤት፤ወዕጹታ፡ዘይቤ፡ በእንተ፡ንጽሐ፡ድንግልናሃ፡ወሥጋሃ፤ ወበእንተ፡ዘይቤ፡በዐቢይ፡መንክር፡ማኅተም፡ዝኒ፡ያርኢ፡ገሃደ፡በእግዚአብሔር፡ዐቢይ፡መንክር፡በመንፈስ፡ቅዱስ፡ተኀትመት፤ወዘይቤሂ፡አልቦ፡ዘቦአ፡ውስቴታ፡ዘእንበለ፡እግዚአ፡ኀያላን፡ቦአ፡ወወፅአ፡ውእቱኬ፡ፈጣሬ፡ሰማያት፡ወምድር፡ፈጣሬ፡መላእክት፡ወሰብእ፡ወአጋእዝት፡እግዚአ፡ኀያላን፡ውእቱ፡ፍሬ፡መለኮት፡ዘለብሰ፡ሥጋነ፡እምኔሃ፡ክርስቶስ፡ቦአ፡ወወፅአ፡እንተ፡ኀቤሃ፡ዘእንበለ፡ሙስና።ወካዕበ፡ተነበየ፡ሙሴ፡በእንተ፡ማርያም፡ወይቤ፡ርኢኩ፡ጳጦስ፡በደብረ፡ሲና፡እንተ፡ኢያውዐያ፡እሳት፡በላዒ፤ወፍካሬሁ፡ለዝንቱ፡እሳት፡መለኮት፡ወልደ ፡እግዚአብሔር፡ወዕፀ፡ጳጦስ፡ዘትነድድ፡ወቈጽላ፡ኢትውዒ፡ዛቲ፡ይእቲ፡ማርያም፨ ፨ ፨