፺፩፡ዘንተ፡ዘይበልዑ፡ንጹሕ፡ወርኩስ።
ወዝንቱ፡ዘትበልዑ፡ንጹሕ፡ወዘኢኮነ፡ንጹሕ፤ላህም፡በግዕ፡ወጠሊ፡ሐርጌ፡ሀየል፡ወይጠል፡ቶራ፡ድስክነ፡ወውዕላ፡ዓርጋ፡ወዝራት፡ወኵሉ፡እንስሳ፡ዘንፉቅ፡ሰኰናሁ፡ወጽፈሪሁ፡ብልዑ፡ወዘይትመሰኳዕ፡ብልዑ፤ወዝንቱሰ፡ዘኢትበልዑ፡እምውስተ፡ዘይትመሰኳዕ፡ወዘንፉቅ፡ሰኰናሁ፡ገመል፡ወዳሲጳዳ፡ወካርግልዮን፡እስመ፡ይትመሰኵዑ፡ወኢኮነ፡ንፉቅ፡ጽፈሪሆሙ፤ወዝእብ፡ወሐራዊያ፡ኢትብልዑ፡እስመ፡ንፉቅ፡ሰኰናሆሙ፡ወኢይትመሰኵዑ፡ርኩሳን፡ኢትብልዑ፤ በውስተ፡ማይ፡ዘቦ፡ክንፈ፡ወቅሣረ፡ብልዑ፡ወእምኔሁ፡ርኩሰ፡ኢትብልዑ፤ወእምነ፡ውስተ፡አዕዋፍ፡ኵሉ፡ዘንጹሕ፡ብልዑ፡ወዘኢትበልዑ፡ዝንቱ፡ንስር፡ጊጳ፡ኤልያጣን፡ግሪጳ፡ሆባይ፡ወዘአምሳሊሁ፡ቋዕ፡ሰገኖ፡ግላውቃ፡ለሮን፡አሮድዮን፡ቃቃኖን፡ኢብን፡ቀጣራቃጤን፡ጒዛ፡ሂጳጳ፡ጒጓ፡ወኣባጒንባሕ፡ወክራድዮን፡ጳርፋርዮና፡ጽግነት፡ዝንቱ፡ዘርኵስ፤ወዘኢትበልዑ፡ደገብያ፡ወዘአምሳሉ፡አቃጣን፡ወዘአምሳሉ፡አፍዮማክን፡ወዘአምሳሉ፡አንበጣ፡ወዘአምሳሉ፤ እምነ፡ዘይሰርር፡በበ፪፡በበ፬፡ወበበ፮፡እግሩ ፡ውእቱ፡ርኩስ፡ሥጋሆሙ፡ኢትብልዑ፡ወበድኖሙ ፡ኢትግስሱ፡ወዘገሰሰ፡በድኖሙ፡እስከ፡ሰርክ፡ርኩስ፡ውእቱ። ዘንተኬ፡ነገርናክሙ፡ከመ፡ትዕቀቡ፡ወትግበሩ፡ፍርሀተ፡እግዚአብሔር፡ከመ፡ትትባረኩ፡በዛቲ፡ምድርክሙ፡እንተ፡ወሀበክሙ፡እግዚአብሔር፡በእንተ፡ጽዮን፡ሰማያዊት፡ታቦተ፡ሕጉ፡ለእግዚአብሔር፡እስመ፡ ተኀረይክሙ፡በእንቲአሃ፤ወአበዊነሰ፡ተመነኑ፡በእንተ፡ዘነሥኦሙ፡እግዚአብሔር፡ጽዮን፡ታቦተ፡ሕጉ፡ለእግዚአብሔር፡ትዕቀብክሙ፡ለክሙ፡ወለዘርእክሙ፡እስከ፡ለዓለም፤ወይባርክ፡ፍሬ፡ምድርክሙ፡ወያብዝኅ፡እንስሳክሙ፡ወይዕቀብ፡ደቂቅክሙ፡በኵሉ፡ዘትትመሐፀኑ፡ወአንቲኒ፡እግዝእትየ፡ጥበብኪ፡ሠናይ፡ዘተዐደወ፡እምጥበበ፡ሰብእ፡ዘከማኪ፡አልቦ፡ዘይትማሰላ፡ለኅሊናኪ ፡አኮ፡ምክረ፡አንስት፡ባሕቱ፡ዘተፈጥረ፡እስከ፡ይእዜ፡አላ፡እምክረ፡ተባዕትኒ፡ፈድፈደ፡አእምሮ ፡ልብኪ፡ወአልቦ፡ዘይትማሰለኪ፡በብዝኀ፡አእምሮትኪ፡ዘእንበለ፡ሰሎሞን፡እግዚእየ፤ ወእምሰሎሞንኒ፡ተዐደወ፡ጥበብኪ፡እስከ፡ትስሕቢ፡ደቂቀ፡ኀይለ፡እስራኤል፡ወታቦተ፡ሕጉ፡ ለእግዚአብሔር፡በአሕባለ፡አእምሮትኪ፡ወነሠትኪ፡ቤተ፡ጣዖቶሙ፡ወደምሰስኪ፡አ፡ምሳሊሆሙ፡ወአንጻሕኪ፡ርኵሰ፡እምሕዝብኪ፡እስመ፡አሰሰልኪ፡ዘጸልአ፡እግዚአብሔር፡እምላዕሌሆሙ፡ወለስምኪኒ፡እግዚአብሔር፡አስተዳለዎ፡ዘሰመየኪ፡ማክዳ፡ወትርጒምናሁ፡አኮ፡ከመዝ፡ብሂል፤ነጸርኪ፡በውስተ፡ሕዝብኪ፡ዘኢይሠምር፡እግዚአብሔር፡ወትቤሊ፡አኮ፡ከመዝ፡ሠናይ፡አላ፡ይረትዕ፡ንስግድ፡ለእግዚአብሔር፤አኮ፡ከመዝ፡ሠናይ፡ሰጊድ፡ለፀሐይ፡አላ፡ሰጊድ፡ለእግዚአብሔር፡ይረትዕ፡ትቤሊ፤አኮ፡ከመዝ፡ሠናይ፡ሐቲተ፡ማሪት፡አላ፡ተወክሎ፡ በእግዚአብሔር፡ይኄይስ፡ትቤሊ፤አኮ፡ከመዝ፡ሠናይ፡አስተቃስሞ፡ሰገል፡አላ፡አስምኮ፡በቅዱሰ፡እስራኤል፡ይኄይስ፡ትቤሊ፤አኮ፡ከመዝ፡ሠናይ፡ሠዊዕ፡ለአእባን፡ወለአዕዋም፡አላ፡ሠዊዕ፡ለእግዚአብሔር፡ይረትዕ፡ትቤሊ፤አኮ፡ከመዝ፡ሠናይ፡ተጠይሮ፡በአዕዋፍ፡አላ፡ተአምኖ፡በፈጣሪ፡ይረትዕ፡ትቤሊ።ወእምዝ፡ኀረይኪያ፡ለጥበብ፡ወኮነተኪ፡እመ፤ኀሠሥኪያ፡ወኮነተኪ፡መዝገበ፤ተጸወንኪያ፡ወኮነተኪ፡ጥቅመ፤ጸህቂያ፡ወአፍቀረተኪ፡እምኵሉ፤ተወከልኪያ፡ወሐቀፈተኪ፡ከመ፡ሕፃና፤አፍቀርኪያ፡ወኮነተኪ፡በከመ፡ፈቀድኪ፤አኀዝኪያ፡ወኢተኀድገኪ፡እስከ፡ዕለተ፡ሞትኪ፤አንቲ፡ሐዘንኪ፡በእንቲአሃ፡ወአስተፍሥሐተኪ፡እስከ፡ለዓለም፤ጸመውኪ፡ በእንቲአሃ፡ወአጥዐየተኪ፡እስከ፡ለዓለም፤ረኀብኪ፡በእንቲአሃ፡ወአጽገበተኪ፡እስከ፡ለዓለም፤ ጸማእኪ፡ለጥበብ፡ወአርወየተኪ፡እስከ፡ለዓለም፤ተመንደብኪ፡በእንቲአሃ፡ለጥበብ፡ወኮነተኪ፡ፈውሰ፡እስከ፡ለዓለም፤ጸመምኪ፡በእንቲአሃ፡ለጥበብ፡ወአስምዐተኪ፡እስከ፡ለዓለም፤ዖርኪ፡በእንቲአሃ፡ለጥበብ፡ወአብርሀተኪ፡ፈድፋደ፡እምነ፡ፀሐይ፡እስከ፡ለዓለም፡ወዝንቱ፡ኵሉ፡ዘኮነ፡እምኀበ፡እግዚአብሔር፡በእንተ፡ዘአፍቀርኪያ፡ለጥበብ፤እስመ፡ጥበብ፡ወአእምሮ፡ወልቡና፡እምኀበ፡እግዚአብሔር፡ውእቱ፤ልቡና፡ወአእምሮ፡ወቀዳሜ፡ጥበብሰ፡ፈሪሀ፡እግዚአብሔር፡ወአእምሮ፡ወመኪረ፡ሠናይኒ፡ምጽዋት፡ወምሕረት፡እስከ፡ለዓለም፡እንተ፡ትሄሉ፡ዘንተ፡ኵሎ፡ ረከብኪ፡እግዝእትየ፡ኀበ፡አምላከ፡እስራኤል፡ቅዱሰ፡ቅዱሳን፡ማእመሬ፡አልባብ፡ዘየሐትት፡ዘውስተ፡ልበ፡ሰብእ፡ዘእምኀቤሁ፡ኵሉ፡ኮነ፤ወዘኒ፡ኮነ፡በፈቃደ፡እግዚአብሔር፡ኮነ፡ከመ፡ትምጻእ፡ጽዮን፡ውስተ፡ዛቲ፡ብሔረ፡ኢትዮጵያ፡ወከመ፡ትኩኖ፡መርሐ፡ለንጉሥነ፡ዳዊት፡መፍቀሬ፡እግዚኣብሔር፡ቀዋሚሃ፡ለደብተራሁ፡መጋቢሃ፡ለማኅደረ፡ስብሐቲሁ፨ ፨ ፨