Kebre Negest 85

፹፭፡ኀበ፡ተፈሥሐት፡ማክዳ፡ንግሥት።

ወበጽሐ፡ዳዊት፡ንጉሥ፡በዐቢይ፡ግርማ፡ውስተ፡ሀገረ፡እሙ፤ወእምዝ፡ርእየታ፡በመልዕልት፡ለጽዮን፡ቅድስት፡እንዘ፡ታበርህ፡ከመ፡እንተ፡ፀሐይ።ወሶበ፡ርእየታ፡አእኰተቶ፡ወሰብሐቶ፡ለአምላከ፡እስራኤል፡ወሰገደት፡ወጐድአት፡እንግድዓሃ፡ወአልዐለት፡ርእሳ፡ወነጸረት፡ውስተ፡ሰማያት፡ወአእኰተቶ፡ለፈጣሪሃ፡ወጠፍሐት፡በእደዊሃ፡ወየበበት፡በአፉሃ፡ወአጽሐሰት፡በእገሪሃ፡ወአሰርገወት፡ኵሎ፡ሥጋሃ፡በፍሥሓ፡ወተሐሥየት፡በመንፈስ፡ኵሉ፡ውሳጥያቲሃ።ወምንተ፡እብል፡ዘኮነ፡አሜሃ፡ፍሥሓ፡ለብሔረ፡ኢትዮጵያ፡እምሰብእ፡እስከ፡ እንስሳ፡እምንኡስ፡እስከ፡ዐቢይ፡ወእምአንስት፡እስከ፡ተባዕት።ወተከለት፡ደባትራ፡ወኀይመታተ፡መትሕተ፡ደብረ፡መክዳ ፡ውስተ፡ስፉሕ፡ምድር፡ኀበ፡ሠናይ፡ማይ፡ወጠብሐት፡መጋዝአ፡ላህም፡ወአስዋረ፡መጠነ፡፫፼ወ፳፻፡ወአንበርዋ፡ለጽዮን፡ውስተ፡ሕጽነ፡ደብረ፡ማክዳ፤ወአግበረት፡ላቲ፡ዐቀብተ፡፫፻፡እኁዛነ፡አስይፍት፡ለጽዮን፡እለ፡የዐቅቡ፡ደባትሪሃ፡ለጽዮን፡ምስለ፡እሊአሃ፡ወመኳንንቲሃ፡ኀያላነ፡እስራኤል፤ወእሊአሃ፡፫፻፡እኁ፡ዛነ፡አስይፍት፡ወለወልዳሂ፡ንጉሥ፡ዳዊት፡ከማሆሙ፡፯፻።ወይትፌሥሑ፡ፈድፋደ፡በብዙኅ፡ክብር፡ወተድላ፡በሠናይ፡አልባስ፤እስመ፡አርትዐት፡መንግሥተ፡እምነ፡ባሕረ፡አሌባ፡እስከ፡ባሕረ፡ኣሴካ፡ወኵሉ፡ይትኤዘዝ፡በቃላ፡ወባቲ፡ክብረ፡ወብዕለ፡ፈድፋደ፡ዘአልቦ፡ዘኮነ፡እምቅድሜሃ፡ወኢይከውንሂ፡እምድኅሬሃ።እስመ፡በውእቱ፡መዋዕል፡በኢየሩሳሌም፡ሰሎሞን፡ንጉሥ፡ወበኢትዮጵያ፡መክዳ፡ንግሥት፡ለክልኤሆሙ፡ተውህበ፡ጥበብ፡ወክብር፡ወብዕል፡ወሞገስ፡ወአእምሮ፡ወሥነ፡ቃል፡ወልቡና፤ወወርቅ፡ወብሩር ፡ኀስረ፡ከመ፡ብርት፡ወዲባጋት፡ዘወርቅ፡ኮነ፡ከመ፡ዐግያት፡ዘፈትል፡ወእንስሳ፡ወአፍራስ፡ዘአልቦ፡ኆልቈ፨ ፨ ፨