፹፬፡በእንተ፡ንጉሠ፡ኢትዮጵያ፡ዘከመ፡ገብአ፡ሀገሩ።
ወንጉሠ፡ኢትዮጵያሰ፡ቦአ፡ውስተ፡ሀገሩ፡በዐቢይ፡ፍሥሓ፡ወተድላ፡ምስለ፡ኵሉ፡ቃለ፡ማሕሌቶሙ፡ወዕንዚራቲሆሙ፡ወሰረገላቲሆሙ፡ከመ፡ኀይለ፡ሰማያዊያን፡እንዘ፡ይረውጹ፡በጽሑ፡ደወሎሙ፡እምኢየሩሳሌም፡በዕለት፡ሀገረ፡ወቄሮም።ወለአኩ፡ላቲ፡በአሕማር፡ከመ፡ይንግርዋ፡ለማክዳ፡ንግሥተ፡ኢትዮጵያ፡ወአርድእዋ፡ዘከመ፡ረከቡ፡ኵሎ፡ሠናያተ፡ወዘከመ፡ነግሠ፡ወልዳ፡ወዘከመ፡አምጽእዋ፡ለጽዮን፡ሰማያዊት፡ተዜነወት፡ዘንተ፡ኵሎ፡ክብረ፡ወአዖደት፡ዐዋዴ፡ውስተ፡ኵሉ፡መንግሥት፡ዘእምታሕቴሃ፡ከመ፡ትትቀበሎ፡ለወልዳ፡ወፈድፋደሰ፡ዘበእንተ፡ጽዮን፡ሰማያዊት፡ታቦተ፡አምላከ፡እስራኤል፤ወነፍኁ፡ቀርነ፡በቅድሜሃ፡ወተፈሥሑ፡ኵሎሙ፡ሰብአ፡ኢትዮጵያ፡እምንኡስ፡እስከ፡ዐቢይ፡ወእምተባዕት፡እስከ፡አንስት፤ወተንሥኡ፡ፀብኣ፡ምስሌሃ፡ከመ፡ይትቀበልዎ፡ለንጉሦሙ።ወበጽሐት፡ሀገረ፡ምስፍና፡እንተ፡ይእቲ፡ርእሰ፡መንግሥተ፡ኢትዮጵያ፡ዘበደኃሪ፡መዋዕል፡ኮነ፡ርእሰ፡ክርስትያነ፡ኢትዮጵያ፤ወውስቴታ፡አስተዳለወት፡ዕፍረተ፡ዘአልቦ፡ኆልቈ፡እምነ፡ህንድ፡ወእምነ፡ባልቴ፡እስከ፡ጋልቴት፡ወእምነ፡አልሳፉ፡እስከ፡አዘዘት፡ወአስተጋብአት።ወመጽአ፡ወልዳ፡እንተ፡ፍኖተ፡አዝያባ፡ወቂሮ፡ወወፅአ ፡እንተ፡መሰስ፡ወዐርገ፡ቡር፡ወመጽአ፡ሀገረ፡ምስፍና፡ርእሰ፡ኢትዮጵያ፡ዘለሊሃ፡አሕነጸታ፡በስማ፡ወተብህለት፡ደብረ፡ማክዳ፨ ፨ ፨