፹፡በእንተ፡ንጉሠ፡ኢሎፍሊ።
ወናሁ፡ኢሎፍሊ፡ዘርአ፡ሳምሶን፡ይነግሡ፡ላዕሌሆሙ።ወሰምሶንሰ፡እም፲ወ፪፡ደቂቀ፡ያዕቆብ፡ዘርአ፡ዳን፡ውእቱ፡ወልደ፡አመት፡እምያዕቆብ፤ውእቱሰ፡ሳምሶን፡ናየድዐክሙ፡ዘከመ፡ኮነ። አስተርአያ፡መልአከ፡እግዚአብሔር፡ለእሙ፡ለሰምሶን፡ወይቤላ፡ተዐቀቢ፡እምኵሉ፡ርኩስ፡ወኢትቅረቢ፡ዘእንበለ፡ኀበ፡ምትኪ፡እስመ፡ዘይትወለድ፡እምኔኪ፡ናዝራዊ፡ቅዱሱ፡ለእግዚአብሔር፡ወይከውን፡መድኀኒቶሙ፡ለእስራኤል፡እምእደ፡ኢሎፍሊ፡ወእምዝ፡ወለደቶ፡ወካዕበ፡አስተርአያ፡ወይቤላ፡ኢታዕርጊ፡መላጼ፡ዲበ፡ርእሱ፡ወኢይብላዕ፡ሥጋ፡ወኢወይነ፡ ወኢያውስብ፡እምባዕድ፡ፈጥረት፡ዘእንበለ፡እምዘመዲ፡ወቤተ፡አቡሁ።ወዘከመ፡ወሀቦ፡እግዚአብሔር፡ኀይለ፡ሰማዕክሙ፡በውስተ፡መጽሐፈ፡መሳፍንት።ወተዐደወ፡ትእዛዘ፡እግዚአብሔር፡ወቦአ፡ወአውሰበ፡ውስተ፡አዋልደ፡ኢሎፍሊ፡ቈላፋን፡ወበእንተዝ፡ተምዕዖ፡እግዚአብሔር፡ወመጠዎ፡ውስተ፡እደዊሆሙ፡ለሰብአ፡ኢሎፍሊ፡ቈላፋን፡ወአዖርዎ፡አዕይንቲሁ ፡ወረሰይዎ፡መስተዛውዐ፡በውስተ፡ቤተ፡ንጉሦሙ፤ወአፍረሰ፡መልዕልቶሙ፡ወቀተሎሙ፡፸፼፡ወበሕይወቱሰ፡ቀተሎሙ፡፸፼፡ወ፪፼፡በኀጺን፡ወበእብን፡ወበበትር፡ወበመንከሰ፡አድግ፤እስመ፡ብዝኆሙ፡ከመ፡አንበጣ፡እስከ፡አኅደጎሙ፡ለእስራኤል፡እምግብርናተ፡ኢሎፍሊ።ወእምዝ፡ፀንሰት፡ደሊላ፡እምሳምሶን፡ወእንዘ፡ፅንስት፡ይእቲ፡ሞተ፡ሳምሶን፡ምስለ፡ሰብአ፡ኢሎፍሊ፤ ወወለደት፡ወልደ፡ደሊላ፡ወሰመየቶ፡ምናሔም፡ዘርአ፡ኀያል፡ብሂል፨ወደሊላሰ፡እኅታ፡ይእቲ፡ለመክሳባ፡ብእሲተ፡ንጉሠ፡ኢሎፍሊ።ወሶበ፡ቀተሎ፡ሰምሶን፡ለንጉሠ፡ኢሎፍሊ፡በውስተ፡ቤት፡ምስለ፡ሕዝቡ፡ወለሊሁኒ፡ሞተ፡ምስሌሁ፡ወገብአት፡ደሊላ፡ኀበ፡እኅታ፡ንግሥተ፡ኢሎፍሊ፡መክሳባ፤እስመ፡ክልኤሆን፡ላሕያት፡እማንቱ፡ወአልቦን፡ውሉደ፡ወባሕቱ፡ፅኑሳት፡ህየ፡ስድስቱ፡አውራኅ፡መክሳባ፡እምዘ፡ፀንሰት፡እምኀበ፡ቈላሶን፡ንጉሠ፡ኢሎፍሊ፡ወደሊላ፡፬፡አውራኅ፡እሙንቱ፡እምዘ፡ፀንሰት፡እምሳምሶን፡ወሞቱ፡አምታቲሆን።ወይትፋቀራ፡ፈድፋደ፡ወፍቅሮንሂ፡አኮ፡ከመ፡አኃት፡አላ፡ከመ፡እም፡ለሕፃና፡ወከመ፡ሕፃን፡ለእም፡ከማሁ፡ፍቅሮን፤ ወነበራ፡ክልኤሆን፡ኅቡረ፡ወመንግሥትሰ፡ውስተ፡እዴሃ፡ለመክሳባ፡እምእለ፡ተርፉ፡እምቀትለ፡ሰምሶን፡በውስተ፡ቤተ፡ንጉሥ።እስመ፡አልቦ፡ዘተርፈ፡እምደቂቀ፡ኀይለ፡መንግሥተ፡ኢሎፍሊ ፡ወበእንተዝ፡ነግሠት፡ላዕለ፡እለ፡ተርፉ፡መክሳባ፤ ወይብልዋ፡ነግሀ፡ወሰርከ፡አልብነ፡ንጉሠ፡ዘእንበሌኪ፡ካልአ፡ወዘእንበለ፡ዘወፅአ፡እምከርሥኪ፤ ለእመ፡አሠነየ፡ለነ፡እግዚእነ፡ዳጎን፡ይከውን፡ወልደ፡ዘውስተ፡ከርሥኪ፡ዘያነሥኦ፡ለአምላክነ፡ዳጎን፡ወዘይነግሥ፡ላዕሌነ፤ወእመሂ፡ኮነት፡ወለተ፡ናነግሣ፡ላዕሌነ፡ከመ፡ይኩን፡ስምኪ፡ወስመ፡ቈላሶን፡እግዚእነ፡ላዕሌነ፡ዝክርክሙ። ወእምዝ፡ወለደት፡ተባዕተ፡ወተፈሥሑ፡ኵሎሙ፡ሰብአ፡ኢሎፍሊ፡ወገነዩ፡ላቲ፡ወሐለዩ፡እንዘ፡ይብሉ፡ዳጎን፡ወቤል፡አክበርዋ፡ወአፍቀርዋ፡ለመክሳባ፡ወተረክበ፡ዘርአ፡ቈላሶን፡እምኔሃ፡ለመክሳባ፤ወደሊላኒ፡ወለደት፡ወልደ፡ወሐፀናሆሙ፡በብዙኅ፡ክብር፡ለደቂቆን።ወሶበ፡ኮነ፡ሎሙ፡፭፡ዓመተ፡ይበልዑ፡ወይትዋነዩ፡በቅድሜሆን፤ወገብራ፡ሎሙ፡ዐስቀ፡ዘዲባጋት፡ወሰዋትለ፡ውስተ፡ሐቌያቲሆሙ፡ወአዕ፡ኑገ፡ውስተ፡ክሳውዲሆሙ።ወረሰይዎ፡ንጉሠ፡ለወልደ፡መክሳባ፡ውስተ፡መንበረ፡አቡሁ፡ላዕለ፡ኢሎፍሊ፨ ፨ ፨