፸፯፡በእንተ፡ንጉሠ፡ፋርስ።
ወንጉሠ፡ፋርስኒ፡ዘርአ፡ሴም፡ውእቱ፡ወዘበእንቲአሁ፡ናየድዐክሙ።ወለደ፡ይሁዳ፡ክልኤ፡ደቂቀ፡ወአእተወ፡ሎቱ፡ትዕማርሃ፡ለዘ፡ይልህቅ፡ወልዲ፤ወሞተ፡ወፈነዎ፡ለዘ፡ይንእስ፡ወልዲ፡ኀቤሃ፡ከመ፡ያቅም፡ለእኁሁ፡ዘርአ፡ኀበ፡ብእሲቱ፡እኁሁ።ወውእቱኒ፡ገብረ፡ዘይጸልእ፡እግዚአብሔር፡ወኢፈቀደ፡ከመ፡ያቅም፡ዘርአ፡ለእኁሁ፡በከመ፡አዘዞ፡አቡሁ፡ይሁዳ፡ወውእቱሰ ፡ሶበ፡ይሰክብ፡ምስለ፡ትዕማር፡ያወፅእ፡ዘርኦ፡ውስተ፡ምድር፡ከመ፡ኢይትዐቈር፡ውስተ፡ከርሠ፡ዚአሃ፡ወኢይሰመይ፡ዘርአ፡እኁሁ፤አላ፡ይፈቅድ፡ከመ፡ያቅም፡ዘርአ፡እምብእሲቱ፡በስመ፡ዚአሁ፤ወርእዮ፡እግዚአብሔር፡እከየ፡ምግባሪሁ፡ሜጠ፡ገጾ፡እምኔሁ፡ወቀተሎ። ወአግብኣ፡ይሁዳ፡ሐሙሃ፡ለትዕማር፡ወአእተዋ፡ውስተ፡ቤተ፡አቡሃ፡ወይቤሎሙ፡ለአዝማዲሃ ፡ዕቀብዋ፡ለዛቲ፡እስራኤላዊት፡ወኢታርኵስዋ፡ኀበ፡ባዕድ፡እስመ፡ብየ፡ንኡሰ፡ሕፃነ፡ለእመ፡አልሀቆ፡እግዚአብሔር፡እሁቦ፡ኪያሃ።ወእንዘ፡ትነብር፡ምዕስብት፡ውስተ፡ቤተ፡አቡሃ፡ናሁ፡መጽአ፡ይሁዳ፡ሐሙሃ፡ውስተ፡መራዕየ፡አዕጻ፡ዳተ፡አባግዒሁ፡ከመ፡ይቅርጽ፡ፀምረ፡ምስለ፡ብዙኅ፡ፍግዓ፡ወተድላ፤ወትዕማርሰ፡ሶበ፡ሰምዐት፡ከመ፡መጽአ፡ሐሙሃ፡ገደፈት፡እምላዕሌሃ፡አልባሰ፡ምዕስብና፡ወተረሰየት፡በአልባሰ፡ክብር፡ወተገልበበት፡በአምሳለ፡ዘማት፡ወሖረት፡እንተ፡ድኅሬሁ፡ወነበረት።ወለአከ፡ኀቤሃ፡እንዘ፡ይብል፡እፈቅድ፡እባእ፡ኀቤኪ፤ወትቤሎ፡ምንተ፡ትሁበኒ፡ዐስብየ፤ወይቤላ፡እፌኑ፡ለኪ፡ነግሀ፡በጽባሕ፡ማሕስአ፡ጠሊ፤ወትቤሎ፡ሀበኒ፡አኅዘ፡እስከ፡ትሁበኒ፡ጠሊተ፤ወወሀባ፡በትረ፡ወሕልቀተ፡ወቆብዐ፡እንተ፡መትሕተ፡አክሊሉ። ወቦአ፡ኀቤሃ፡ወነሥአት፡ወሖረት፡ውስተ፡ቤታ፡ወፈነወ፡ላቲ፡በጽባሕ፡ጠሌ፤ወተስእሉ፡አግብርቲሁ፡ወይቤሉ፡አይቴ፡ውእቱ፡ቤተ፡ዘማት፡ወይቤልዎሙ፡አልቦ፡ውስተ፡ሀገርነ፡ዘማት፤ወገብኡ፡ውስተ፡ሀገሮሙ፡ወነገርዎ፡ከመ፡አልቦ፡ውስተ፡ሀገሮሙ፡ዘማት፤ወይቤ፡ይሁዳ ፡ኅድጉሰ፡ፈቃደ፡እግዚኣብሔር፡ለይኩን።ወእምዝ፡ፀንሰት፡ትዕማር፡ወነገርዎ፡ለሐሙሃ፡ከመ፡ፀንሰት፤ወሖረ፡ወነሥአ፡መላህቅተ፡እስራኤል፡ኀበ፡አቡሃ፡ለትዕማር፡ወይቤሎ፡አቅርብ፡ሊተ፡ወለትከ፡ፅንስተ፡ከመ፡ንውግራ፡በአእባን፡በከመ፡አዘዘ፡ሙሴ፡እስመ፡አኅሰረት፡ቤተ፡እስራኤል ።ወነገርዋ፡ለትዕማር፡አቡሃ፡ወአዝማዲሃ፡ከመ፡ከመዝ፡ይቤ፡ሐሙሃ፤ወአውፅአት፡ሕልቀተ፡ወበትረ፡ወቆብዐ፡ወወሀበት፡ለአቡሃ፡ወለአዝማዲሃ፡ወትቤሎሙ፡ባዕለ፡ዝንቱሰ፡ዘአስሐተኒ፡ወይውግሩኒ፡ምስሌሁ፡በአእባን።ወሶበ፡ርእየ፡ይሁዳ፡ንዋዮ፡አእመረ፡ወይቤ፡ጸድቀት፡ትዕማር፡እምኔየ፤ወኀደጋ፡ወአተወ፡ቤቶ።ወወለደት፡ትዕማር፡መንታ፡ክልኤተ፡ሕዝበ፡ፋሬስ፡ወዛራ፤ ወተሐንጸት፡ፋርስ፡በስመ፡ፋሬስ፡ወነግሠ፡ላዕሌሃ፡ውእቱ፡ወዘርኡ፡እምድኅሬሁ፡ወተሰምዩ፡ፈረሳዊያን።ናሁኬ፡ተዐውቀ፡ንጉሠ፡ፋርስ፡ከመ፡ዘርአ፡ሴም፡ውእቱ፨ ፨ ፨