Kebre Negest 74

፸፬፡በእንተ፡ንጉሠ፡ምድያም።

ንጉሠ፡ምድያምሂ፡ዘርአ፡ሤም፡ውእቱ፤እስመ፡ዘርአ፡ይስሐቅ፡ዔሳው፡ውእቱ፡ዘወፅአ፡እምከርሠ፡እሙ፡እንዘ፡ይእኅዞ፡ያዕቆብ፡በሰኰናሁ፡ወሄደ፡ብኵርናቱ፡ለዔሳው፡በእንተ፡ተብሲለ፡ብርስን፡ወበስመ፡ጽዕለቱ፡ተሰምየ፡ስመ፡መንግሥቱ፡እስመ፡ኤዶም፡ትርጒምናሁ፡ብርስን፡ብሂል፤ወበእንተዝኬ፡ተሰምዩ፡ዘርአ፡ዔሳው፡ኤዶማውያነ፡እስመ፡በስጥመተ፡ከርሡ፡ኀደገ፡ወተስዕረ፡እምብኵርናተ፡ዘርአ፡ሴም፡እስመ፡ለእመ፡ኢተአስረት፡ነፍስ፡በትዕግሥት፡ያወርዶ፡ለኵሉ፡ዘሥጋ፡ፍትወተ፡ከርሥ፡ውስተ፡መሥገርት፤እስመ፡ሥጋሰ፡ሥሥዕት፡ ወነፍስሰ፡እስርት፡በትዕግሥት፤ወበእንተዝ፡ይቤ፡ጳውሎስ፡ዘኢትፈቱ፡ነፍስ፡ትፈቱ፡ሥጋ፡ወዘኢትፈቱ፡ሥጋ፡ትፈቱ፡ነፍስ፡ወክልኤሆን፡ይትኣበያ፡በበይናቲሆን።ለእመ፡አጥብዐ፡ብእሲ፡ወኀብረት፡ነፍሱ፡ምስለ፡ፍትወተ፡ሥጋሁ፡ይከውን፡ከመ፡ዲያብሎስ፤ወለእመ፡አሰረ፡ሥጋሁ፡ወኀብረ፡ምስለ፡ፍትወተ፡ነፍሱ፡ይከውን፡ከመ፡ክርስቶስ፤እስመ፡ኵሉ፡ብእሲ፡ዘየሐውር፡በፍኖት፡ርትዕት፡ርእሱ፡ክርስቶስ፡ይቤሉ፡ሐዋርያት።ወእግዚእነሂ፡ይቤሎሙ፡ለአርዳኢሁ፡በመንፈስ፡ሖሩ፡ወፍትወተ፡ሥጋክሙ፡ኢትግበሩ፤ወዘንተ፡ሰሚዖሙ፡ኀደጉ፡ኵሎ፡ፍትወተ፡ሥጋ፡ወይቤልዎ፡ለእግዚእነ፡ናሁኬ፡ኀደግነ፡ኵሎ፡ወተለውናከ፡ምንት፡ዐስብነ።ወይቤሎሙ፡ መድኀኒነ፡እስመ፡ተመሰልክሙ፡በሥጋ፡ከመ፡መላእክት፡ወትገብሩ፡ኀይለ፡ከማየ፤ወናሁ፡አባሕኩክሙ፡ታንሥኡ፡ምዉታነ፡ወወሀብኩክሙ፡ስልጣነ፡ትፈውሱ፡ድውያነ፡ወትኪዲ፡ኵሎ፡ኀይለ፡ጸላኢ፤ወበዳግም፡ምጽአትየ፡ትኴንንዎሙ፡ወታስተኀፍርዎሙ፡ለ፲ወ፪፡ነገደ፡እስራኤል፡በእንተ፡ዘኢአምኑ፡ኪያየ፡ወአስተሐቀሩ፡ስብሐትየ፤ወለእለሰ፡የአምኑ፡ብየ፡ታዐብይዎሙ፡ወታስተፌሥሕዎሙ፡ምስሌክሙ፡በመንግሥትየ፨ ፨ ፨