፷፮፡በእንተ፡ትንቢተ፡ክርስቶስ።
እስመ፡ሰሎሞን፡ብሂል፡በስዉር፡ነገር፡በፍካሬ፡ትንቢት፡ክርስቶስ፡ብሂል።ወበከመ፡ሰሎሞን፡ሐነጸ፡ቤተ፡እግዚአብሔር፡ከማሁ፡ክርስቶስኒ፡አንሥአ፡ወረሰየ፡ሥጋሁ፡ቤተ፡ክርስቲያን፤ ወበከመ፡ይቤሎሙ፡ለአይሁድ፡ንሥትዎ፡ለዝንቱ፡ቤት፡ወበሠሉስ፡ዕለት፡አሐንጾ፡እስመ፡ይቤሎሙ፡በእንተ፡ቤተ፡ሥጋሁ።ወበከመ፡ሰሎሞን፡አብዝኀ፡አንስተ፡እምሕዝበ፡ነኪር፡በእንተ፡ሥኖን፡ወላሕዮን፡ወበአምስሎ፡አፍቅሮ፡ፍትወታት፡ከማሁ፡ክርስቶስኒ፡አስተጋብአ፡እምሕዝበ፡ነኪር፡እለ፡አልቦሙ፡ሕግ፡እለ፡አምኑ፡ቦቱ፡ዘአልቦ፡ቈላ፡ወአልቦ፡አረማዌ፡ወአልቦ፡ገብረ፡ወአይሁዳዌ፡ወአልቦ፡ነባሬ፡ወአግዓዜ፡ኵሎሙ፡አስተጋብአ፡ውስተ፡መንግሥተ ፡ሰማያት፡በሥጋሁ፡ወደሙ፡ወበመሓልየ፡መሓልይሂ፡ለሊሁ፡ሰሎሞን፡ሐለየ፡እንዘ፡ይብል፡ዐራቱ፡ለሰሎሞን፡፷፡ኀያላን፡ዐውዳ፡ኵሎሙ፡ምሁራነ፡ቀትል፡እኁዛነ፡አስይፍት፡ብእሲ፡ብእሲ፡ዲበ፡መንቅዕቱ፡ሰይፈ፡ያነብር፤፷፡ብሂል፡በኆልቈ፡አርእስተ፡አበው፡ጻድቃን፡ወነቢያት ፡ወሐዋርያት፡ወሰማዕት፡ወመሀይምናን፡ወቅዱሳን፡ወመነኮሳት፡እለ፡የአብይዎ፡ለኅሊና፡እኩይ ፡ፀብአ፡ሰይጣን፤ወሰይፍሂ፡ይተረጐም፡ቃለ፡መጻሕፍት፡ከመ፡መላጼ፡በሊኅ፡ዘርቱዕ፡ይመትር ፡ቃለ፡እግዚኣብሔር፡ከማሁ፡ይመትሩ፡እምልቦሙ፡ድንጋፄ፡ለያልይ፡ዘሕልመ፡ሐሰት፤ ወዐራተ፡ሰሎሞንሰ፡ምስካቡ፡ይተረጐም፡በቤተ፡ክርስቲያኑ፡ለክርስቶስ።ወካዕበ፡ሐለየ፡እንዘ፡ይብል፡መጾረ፡ገብረ፡ለርእሱ፡ንጉሥ፡ሰሎሞን፤ወዝንቱሂ፡ተተርጐመ፡ከመ፡ክርስቶስ፡ለብሰ፡ሥጋነ፤ሰሎሞን፡ብሂል፡በነገረ፡ዕብራዊያን፡ክርስቶስ፡ብሂል።ወአብዳንሰ፡አይሁድ፡ያመስልዎ፡ለቃለ፡ዳዊት፡ዘተብህለ፡በእንተ፡ሰሎሞን፡ወልዲ፡እግዚኣብሔር፡ይቤለኒ፡ወልድየ፡አንተ፡ወአነ፡ዮም፡ወለድኩከ።እግዚኦ፡ኵነኔከ፡ሀቦ፡ለንጉሥ፡ወጽድቅከ፡ለወልደ፡ንጉሥ፡ከመ፡ይኰንኖሙ፡ለሕዝብከ፡በጽድቅ፡ወለነዳያኒከኒ፡በፍትሕ፡ወየሐዩ፡ወይሁብዎ፡እምወርቀ፡ዐረብ፡ወዘልፈ፡ይጼልዩ፡በእንቲአሁ፡ወኵሎ፡አሚረ፡ይድኅርዎ፡ወይከውን፡ምስማከ፡ለኵሉ፡ምድር ፡ውስተ፡አርእስተ፡አድባር፡ወይነውኅ፡እምአርዝ፡ፍሬሁ፡ወይበቊል፡ውስተ፡ሀገር፡ከመ፡ሣዕረ፡ምድር፡ወይከውን፡ቡሩክ፡ስሙ፡ለዓለም፡እምቅድመ፡ፀሐይ፡ሀሎ፡ስሙ፤ወለድኩከ፡እምከርሥ ፡እምቅድመ፡ኮከበ፡ጽባሕ፡መሐለ፡እግዚአብሔር፡ወኢይኔስሕ፡አንተ፡ካህኑ፡ለዓለም ፡በከመ፡ሢመቱ፡ለመልከ፡ጼዴቅ።ወዘንተ፡ወዘይመስሎ፡ትንቢት፡ዘበእንተ፡ክርስቶስ፡ዘተነበየ፡ዳዊት፡ይብሉ፡አብዳን፡ዕዉራነ፡ልብ፡አይሁድ፡ይቤ፡ዳዊት፡ውስተ፡ርእሰ፡መጽሐፉ፡በእንተ፡ሰሎሞን ፡ወልዲ፡ዘተናገረ፤ዘንተ፡ይብሉ፡አይሁድ፡ወያመስልዎ፡ለክርስቶስ፡በሰሎሞን፡በመኵሴ፡ስም፡በጥበብ፡ወበወልደ፡ዳዊት፡በሥጋ።ወዘንተ፡እምድኅረ፡አእመሩ፡እለ፡እምድኅረ፡ዳዊት፡ወሰሎሞን፡ኤልያስ፡ወኤልሳዕ፡ጸሐፉ፡ኀጢአቶ፡ለሰሎሞን፡ውስተ፡መጽሐፈ፡ነገሥት፡ከመ፡ ያስተኀፍርዎሙ፡ለአይሁድ፡ዕዉራነ፡ልብ፡ጸራ፡ለጽድቅ።ወሰሎሞንሰ፡ንጉሥ፡ወልደ፡ዳዊት፡ንጉሥ፡ወነቢይ፡ወለሊሁኒ፡ንጉሥ፡ወነቢይ፡ውእቱ፡ወበጥበብ፡ተነበየ፡ዘበእንተ፡ክርስቶስ፡ብዙኀ፡አምሳለ፡ወበእንተ፡ቤተ፡ክርስቲያን፡ወጸሐፈ፡፬፡መጽሐፈ፡ትንቢቱ፡ወተኆለቈ፡ምስለ፡አብርሃም፡ይስሐቅ፡ወያዕቆብ፡ወዳዊት፡አቡሁ፡በመንግሥተ፡ሰማያት፨ ፨ ፨