፷፡ኀበ፡ላሐዋ፡ሰሎሞን፡ለጽዮን።
ወቦአ፡ውስተ፡ኀይመቱ፡ወበከየ፡ብካየ፡መሪረ፡እንዘ፡ይብል፡እግዚኦ፡በመዋዕልየኑ፡ትነሥኣ፡ለታቦተ፡ኪዳንከ፡እምኔነ፤ባሕቱ፡እምቀደምከ፡ነሢአ፡ነፍስየ፡እምኔሃ፡ዘበመዋዕልየ፡ትነሥኣ፤ እስመ፡አንተሰ፡ኢትሔሱ፡ቃልከ፡ወኢትዔምፅ፡ኪዳነከ፡ዘተካየድከ፡ምስለ፡አበዊነ፤ምስለ፡ኖኅ፡ገብርከ፡ዘዐቀባ፡ለጽድቅ፡ወምስለ፡አብርሃም፡ዘኢተዐደወ፡ትእዛዝከ፡ወምስለ፡ይስሐቅ፡ቊልዔከ ፡ዘአንጽሐ፡ሥጋሁ፡እምርስሐተ፡ኀጢአት፡ወምስለ፡እስራኤል፡ቅዱስከ፡ዘአስተባዛኅከ፡በመንፈስ፡ቅዱስ፡ወሰመይኮ፡አሠረ፡ዚአከ፤እስራኤል፤ወምስለ፡ሙሴ፡ወአሮን፡ካህናቲከ፡እለ፡በመዋዕሊሆሙ፡አውረድካ፡ለታቦተ፡ሕግ፡እምሰማይ፡ዲበ፡ምድር፡ለደቂቀ፡ያዕቆብ፡ርስትከ፡ምስለ፡ሕግከ፡ወትእዛዝከ፡በአርአያ፡ሥርዐተ፡መላእክት፤እስመ፡አቅደምከ፡ሳርሮታ፡ለጽዮን፡ለማኅደረ፡ስብሐቲከ፡ውስተ፡ደብረ፡መቅደስከ፡ወበዳግምሰ፡ወሀብኮ፡ለሙሴ፡ከመ፡ያሰኒ፡ገቢሮታ፡በዲበ፡ምድር፡ወያንብራ፡ውስተ፡ደብተራ፡ዘስምዕ፡ከመ፡አንተኒ፡ትምጻእ፡ህየ፡እምደብረ፡መቅደስከ፡ወታስምዖሙ፡ቃልከ፡ከመ፡ይሖሩ፡በትእዛዝከ።አእመርኩ፡ይእዜ፡ከመ፡ተሀየይከ፡ርስተከ፡እምነ፡እስራኤል፡ሕዝበከ፤ወእስከ፡ይእዜ፡ሀለወት፡ምስሌነ፡ወኢያሠነይነ፡ተግባራ፡ወበእንተዝ፡ተምዐዕከነ፡ወሜጥከ፡ገጸከ፡እምኔነ፤እግዚኦ፡ኢትነጽር፡ምግባረነ፡እኩየ፡አላ፡ነጽር፡ኂሩቶሙ፡ለአበዊነ፡ቀደምት።አቡየ፡ዳዊት፡ገብርከ፡ፈቀደ፡ይሕንጽ፡ቤተ፡ለስምከ፡ ሰሚዖ፡ቃለ፡ነቢይከ፡ዘይቤ፡አይኑ፡ቤት፡ለማኅደርየ፡ወአይኑ፡መካን፡ለምዕራፍየ፡አኮኑ፡እደዊየ ፡ዘገብራ፡ዘኵሎ፡ይቤ፡እግዚአብሔር፡ዘኵሎ፡ይመልክ፤ወዘንተ፡ሶበ፡ኀለየ፡ትቤሎ፡ኢይትከሀለከ፡ዘዘንተ፡ሐነጽከ፡አላ፡ዘወፅአ፡ እምሐቌከ፡የሀንጽ፡ሊተ።ወይእዜኒ፡እግዚኦ፡ኢተሐሰወ፡ቃልከ፡ወሐነጽኩ፡ቤተከ፡እንዘ፡አንተ፡ረዳእየ፤ወሶበ፡ ፈጸምኩ፡ሐኒጾ፡ቤትከ፡አባእክዋ፡ለታቦተ፡ኪዳን፡ውስቴታ፡ወሦዕኩ፡መሥዋዕተ፡ለሥላሴ፡ስምከ፡ቅዱስ፡ወሐወጽከ፡ውስቴታ፤ወመልአ፡ቤት፡ስብሐቲከ፡እንዘ፡ኵሉ፡ዓለም፡ምሉእ፡መለኮትከ፡ወተፈሣሕነ፡ሕዝብከ፡በነጽሮ፡ስብሐቲከ፡ውስቴታ።ወእምአሜሃሰ፡ዮም፡ሣልሲት፡ዓመታ፡ወመሠጥካ፡ለብርሃንነ፡እምኔነ፡ከመ፡ታብርህ፡ለእለ፡ውስተ፡ጽልመት፡ነሠትካ፡ለክብርነ፡ከመ፡ታክብሮሙ ፡ለኅሱራን፡አ፡ጥፋእከ፡ግርማነ፡ከመ፡ ታግርሞ፡ለዘ፡ኢኮነ፡ግሩመ፡ነሠትካ፡ለሕይወትነ፡ከመ፡ትሕንጾለዘ፡ርሕቀ፡ሕይወቱ፡እምኔከ።አሌሊተ፡አሌሊተ፡እበኪ፡በእንተ፡ርእስየ፡ተንሥእ፡ዳዊት ፡አቡየ፡ወብኪ፡ምስሌየ፡በእንተ፡እግዝእትነ፡እስመ፡ተሀየየነ፡እግዚአብሔር፡ወነሥኣ፡ለእግዝእትነ፡እምደቂቅከ፤አሌሊተ፡አሌሊተ፡እስመ፡ተሀየየኒ፡ፀሐየ፡ጽድቅ፤አሌሊተ፡ በእንተ፡ዘተሀየይነ፡ትእዛዘ፡አምላክነ፡ኮነ፡ኅሱራነ፡በዲበ፡ምድር፡ካህናትኒ፡ኢያሠነይነ፡ወነገሥትኒ፡ኢያርታዕነ፡ፍትሐ፡ለእጓለ፡ማውታ፤አሌለነ፡አሌለነ፡እስመ፡ኀለፈት፡ርትዕ፡እምኔነ፡ወተገሠጽነ ፤አሌለነ፡ፍሥሓነ፡ተመይጠት፡ኀበ፡ጸላእትነ፡ወሞገስነ፡ተረስዐት፡እምላዕሌነ፤አሌለነ፡አሌለነ፡ተመጠወ፡ዘባንነ፡ለኵናተ፡ፀርነ፤አሌለነ፡አሌለነ፡ኮኑ፡ሕብልያ፡ደቂቅነ፡ወፄዋ፡ለእለ፡ይእዜ፡ነሐበልዮሙ፡ወንፄውዎሙ፤አሌለነ፡አሌለነ፡በከያ፡አቤራቲነ፡ወላሐዋ፡ደናግሊነ፤አሌለነ፡አሌለነ፡አውየዉ፡ርሡኣኒነ፡ወከልሑ፡ሕፃናቲነ፤አሌለነ፡አሌለነ፡አንብዓ፡አንስቲያነ፡ወማሰነት፡ሀገርነ፤አሌ፡ለነ፡አሌ፡ለነ፡እምዮም፡እስከ፡ተፍጻሜተ፡መዋዕሊነ፡ምስለ፡ደቂቅነ፤አሌለነ፡አሌለነ፡እስመ፡ተነሥተ፡ክብራ፡ለወለተ፡ጽዮን፡ክብርት፡ወዐብየ፡ክብራ፡ለወለተ፡ኢትዮጵያ፡ኅስርት።ተምዕዐ፡እግዚአብሔር፡ወመኑ፡ይሣሀል፤አስተራኰሰ፡እግዚአብሔር፡ወመኑ፡ያነጽሕ፤ መከረ፡እግዚአብሔር፡ወመኑ፡ይትቃወማ፡ለምክሩ፤ፈቀደ፡እግዚአብሔር፡ወመኑ፡የአብያ፡ለኅሊናሁ፤ይቤ፡እግዚአብሔር፡ወኵሉ፡ይከውን፤አኅሰረ፡እግዚአብሔር፡ወአልቦ፡ዘያከብር፤ ነሥአ፡እግዚአብሔር፡ወአልቦ፡ዘያገብእ፤ጸልአ፡እግዚአብሔር፡ወአልቦ፡ዘያፈቅር።አሌለነ፡እንዘ፡ክቡር፡ስምነዮምሰ፡ተመነነ፡ስምነ፤አሌለነ፡እንዘ፡ሰብ፡ቤት፡ንሕነ፡ኮነ፡ሰብአ፡አፍአ፡እንዘ፡ሰብአ፡ውስጥ፡ንሕነ፡ተሰደድነ፡በኀጢአትነ።እስመ፡እግዚአብሔር፡ያፈቅር፡ንጽሐ፡ካህናትኒ፡አበይዋ፡ለንጽሕ፡ወአፍቀርዋ፡ለርኵስ፤ወነቢያትኒ፡ገሠጹነ፡ወኢተገሠጽነ፡ወአስምዑነ ፡ወኢሰማዕነ፤አሌለነ፡በኀጢአትነ፡ተመነነ፡በኀሳርነ፡ተቀሠፍነ።መንግሥትኒ፡ኢይበቊዕ፡ዘእንበለ፡ንጽሕ፡ወፍትሕኒ፡ኢይበቊዕ፡ዘእንበለ፡ርትዕ፡ወብዕልኒ፡ኢይበቊዕ፡ዘእንበለ፡ፍርሀተ ፡እግዚአብሔር፤ካህናትኒ፡አፍቀሩ፡ነገረ፡ዘውዕ፡እምነገረ፡መጻሕፍት፡ወአፍቀሩ፡ቃለ፡መሰንቆ ፡እምቃለ፡መዝሙር፡ወአፍቀሩ፡ግብረ፡ዓለም፡እምጸሎት፡ወአፍቀሩ፡ቅሥተ፡ዓለም፡እምቃለ፡መለኮት፡ወአፍቀሩ፡ሰሐቀ፡ወዝሙተ፡እምብካየ፡ሕይወት፡ወአፍቀሩ፡መብልዐ፡ኀላፊተ፡እምጸዊም፡ለእግዚአብሔር፡ወአፍቀሩ፡መስቴ፡ወስካረ፡እምሠዊዕ፡ለእግዚአብሔር፡ወአፍቀሩ ፡ሀኬተ፡እምስእለት፡ወአፍቀሩ፡ንዋየ፡እምነ፡ምጽወት፡ወአፍቀሩ፡ንዋመ፡እምስብሐት፡ወአፍቀሩ፡ነዛህላለ፡እምንቃህ።አሌለነ፡አሌለነ፡ነገሥትኒ፡ተሀከይነ፡እምነ፡ትእዛዘ፡እግዚአብሔር ፡ወአፍቀርነ፡ነገረ፡መስተዛውዓን፡እምቃለ፡ካህናት፡ወገጸ፡አንስቲያነ፡ንፈቅድ፡ነጽሮ፡እምኀሢሠ፡ገጸ፡እግዚአብሔር፡በንስሓ፡ወአፍቀርነ፡ነጽሮ፡ሕፃናቲነ፡እምሰሚዐ፡ቃለ፡እግዚአብሔር፡ወአፍቀርነ፡ተናዝዞ፡በእብነ፡ሰርድዮን፡እምአርትዖ ፡ፍትሕ፡ለእጓለ፡ማውታ፡ወአፍቀርነ፡ነጽሮ፡ክብርነ፡እምሰሚዐ፡ቃለ፡እግዚአብሔር፡ወአፍቀርነ፡ነገረ፡በክ፡ እምቃለ፡ማእምራን፡ወአፍቀርነ፡ነገረ፡እቡዳን፡እምነ፡ሰሚዐ፡ነገረ፡ነቢያት።አሌለነ፡በፈቃድነ፡አርኰስና፡ ለሕይወትነ፤አሌለነ፡እስመ፡ዘያፈቅር፡እግዚአብሔር፡ንስሓ፡ወምሕረተ፡ኢገበርነ፤አሌለነ፡ወሀበነ፡ክብረ፡ወበእበድነ፡ገደፍነ።አጥበበነ፡ፈድፋደ፡ወበፈቃድነ፡አበድነ፡እምነ፡እንስሳ፡ወሀበነ፡ብዕለ፡ወአንደይነ፡ርእስነ፡እምጽዋት።ነጸርነ፡አፍራሲነ፡ወረሳዕነ፡ምግባኢነ፤አፍቀርነ፡ኀላፊተ፡ወኢያእመርና፡ለነባሪት፤ረሰይነ፡መዋዕሊነ፡ተቀጽቦ፡ለሕይወትነ፡ወአብደርነ፡ተድላ፡ሲሲትነ፡ዘይከውን፡አደፈ፡እመብልዐ፡ሕይወት፡ዘይነብር፡ለዓለም፡ወቀጠንተ፡አልባስ፡ዘኢይበቊዕ፡ለነፍስ፡ወአእተትነ፡ልብሰ፡ግርማ፡ዘለዓለም፤ወመኳንንቲነኒ፡ወአሕዛብ፡ይገብሩ ፡ዘይጸልእ፡እግዚአብሔር፡ወኢያፍቀሩ፡ዘያፈቅር፡እግዚአብሔር፡ፍቅረ፡ቢጾሙ፡ወትሕትና፡ወየውሀተ፡ወምሒረ፡ነዳይ፡ወትዕግሥተ፡ወአፍቅሮ፡ቤተ፡እግዚአብሔር፡ወሰጊድ፡ለወልድ፤ ወዘይጸልእሰ፡እግዚአብሔር፡ተጠይሮ፡ወአጣዕዎ፡ወሐቲተ፡ማሪት፡ወመቃስም፡ወሰገል፡ወጽንጽንያ፡ወአቀሪኖ፡ወብትክ፡ወማውታ፡ወስርቅ፡ወዐመፃ፡ወዝሙት፡ወተቃንኦ፡ወሐቢል፡ወስታይ፡ወስካር፡ወማሕላ፡በሐሰት፡ለቢጾሙ፡ወስምዐ፡ሐሰት፡ላዕለ፡ቢጾሙ፡ዘንተ፡ኵሎ፡ይገብሩ፡ዘይጸልእ፡እግዚአብሔር።ወበእንተ፡ዝንቱኬ፡ዘነሥኣ፡እግዚአብሔር፡ለታቦተ፡ኪዳኑ፡እምኔነ፡ወወሀባ፡ለሕዝብ፡እለ፡ይገብሩ፡ፈቃዶ፡ወሕጎ፡ወሥርዐቶ፤ሜጠ፡ገጾ፡እምኔነ፡ወአብርሀ ፡ገጾ፡ላዕሌሆሙ፡ተሀየየ፡ኪያነ፡ወአፍቀረ፡ኪያሆሙ፡መሐረ፡ኪያሆሙ፡ወአጥፍአ፡ኪያነ፡በእንተ፡ዘነሥኣ፡ለታቦተ፡ኪዳኑ፡እምኔነ።እስመ፡መሐለ፡ማሕላ፡በርእሱ፡ከመ፡ኢይከልእ፡ክረምተ፡ወሐጋየ፡ዘርአ፡ወማእረረ፡ፍሬ፡ወተግባረ፡ፀሐየ፡ወወርኀ፡እንዘ፡ሀለወት፡ጽዮን፡ዲበ፡ምድር፡ወከመ፡ኢይትመዐዕ፡ለሰማይ፡ወምድር፡ኢበአይኅ፡ወኢበእሳት፡ወከመ፡ኢያጠፍእ፡ሰብአ፡ወእንስሳ፡ወአራዊተ፡አላ፡ዳእሙ፡ከመ፡ይምሐር፡ተግባረ፡እደዊሁ፡ወከመ፡ያብዝኅ፡ምሕረቶላዕለ፡ልሕኵቱ፤ወአመ፡ይነሥኣ፡እግዚአብሔር፡ለታቦተ፡ኪዳኑ፡አሜሃ፡ያጠፍኦሙ፡ለሰማያት፡ወምድር፡ወለኵሉ፡ተግባሩ፤ወዮምኒ፡እስመ፡ተሀየየነ፡እግዚአብሔር፡ወነሥኣ፡እምኔነ፡ለታቦተ፡ሕጉ፨ወዘንተ፡እንዘ፡ይብል፡ኢያዐርፍ፡ብካየ፡ወአንብዐ፡እምአዕይንቲሁ። ወአውሥአ፡መንፈሰ፡ትንቢት፡እንዘ፡ይብሎ፡ለምንት፡ከመዝ፡ተሐዝን፡እስመ፡በፈቃደ፡እግዚአብሔር፡ኮነ፡ዝንቱ፡ወይእቲኒ፡አኮ፡ለባዕድ፡ዘተውህበት፡አላ፡ለወልድከ፡ቀዳሜ፡በኵርከ፡ዘይነብር፡ዲበ፡መንበረ፡ዳዊት፡አቡከ፤እስመ፡መሐለ፡እግዚአብሔር፡ለዳዊት፡በጽድቅ፡ወኢይኔስሕ፡ከመ፡እምፍሬ፡ከርሡ፡ያነብር፡ዲበ፡መንበሩ፡እስከ፡ለዓለም፡በውስተ፡ታቦተ፡ኪዳኑ፡ጽዮን፡ቅድስት፤ወእሬስዮ፡ልዑለ፡እምነገሥተ፡ምድር፡ወመንበሮሂ፡ከመ፡መዋዕለ፡ ሰማይ፡ወከመ፡ሥርዐተ፡ወርኅ፡እስከ፡ለዓለም፤ወበሰማያትኒ፡ዘይነብር፡ዲበ፡መንበረ፡መለኮት፡በሥጋ፡ይኴንን፡ሕያዋነ፡ወሙታነ፡እስከ፡ለዓለም፡ወይገንዩ፡ሎቱ፡መላእክት፡ወሰብእ፡ወይሴብሖ፡ኵሉ፡ልሳን፡ወይሰግዱ፡ሎቱ፡ኵሉ፡ብርክ፡በቀላያት፡ወበአፍላግ፤ወበዝንቱ፡ተናዘዝ ፡ወግባእ፡ቤትከ፡ወኢታሕዝን፡ልብከ፡ፍጹመ።ወበዝንቱ፡ተናዘዘ፡ወይቤ፡ይኩን፡ፈቃዱ፡ለእግዚአብሔር፡ወአኮ፡ፈቃደ፡ሰብእ።ወካዕበ፡አስተርአዮ፡መልአከ፡እግዚአብሔር፡ገሃደ፡ወይቤሎ፡ወአንተሰ፡ሐነጽከ፡ቤተ፡እግዚአብሔር፡ወትከውነከ፡ምክሐ፡ይእቲ፡ወምስማከ፡ለእመ ፡ዐቀብከ፡ትእዛዞ፡ወኢያምለከ፡ባዕደ፡አማልክተ፡ትትፈቀር፡በኀበ፡እግዚአብሔር፡ከመ፡ዳዊት፡አቡከ፨ ፨ ፨