፵፯፡በእንተ፡መሥዋዕተ፡አዛርያስ፡ወንጉሥ።
ወሖረ፡ኢዮአስ፡ወልደ፡ዮዳሔ፡ወነገሮ፡ለንጉሥ፡ሰሎሞን፡ወተፈሥሐ፡ንጉሥ፡በእንተዝ፡ወአዘዘ፡ከመ፡ያስተዳልዉ፡መሣውዐ፡መሥዋዕተ፡ከመ፡ይሡዕ፡ወልዱ፤ወአምጽአ፡ወወሀቦ፡ዘይበፅዕ፡ለእግዚአብሔር፡፻፡አስዋረ፡ወ፻፡መግዝአ፡ላህም፡ወ፼፡አባግዕ፡ወ፼፡አጣሊ፡ወእምነ፡ዘይትበላዕ፡አራዊት፡በበ፲፡ወእምነ፡አዕዋፍ፡ዘንጹሕ፡በበ፡፲፡በዘያወጽሕ፡ወይሠውዕ፡ለአምላከ፡እስራኤል፤ወመሥዋዕተ፡ስንዳሌኒ፡፳፡ጻሕለ፡ዘብሩር፡ለለ፡አሐቲ፡ዘበበ፡፲ወ፪፡ድልወተ፡ሰቅሎን፡ወ፵፡መዛርአ፡ኀባውዝ፤ወዘንተ፡ኵሎ፡ወሀቦ፡ለዳዊት፡ወልዱ፡ሰሎሞን፡ንጉሥ። ወካዕበ፡ለአከ፡እንዘ፡ይብል፡ይሡዕአ፡ሊተ፡አዛርያስ፡ወልደ፡ካህን፡ህየንቴየ፤ወይቤሎ፡ግበርአ፡ ዘፈቀድከ።ወተፈሥሐ፡አዛርያስ፡በእንተዝ፡ነገር፡ወሖረ፡ወአምጽአ፡እመራዕየ፡አቡሁ፡አሐተ፡ላህመ፡እንተ፡ኢሰሐበት፡አርዑተ፡ወ፬፡ጠሊተ፡ዘዘ፡ዓመት፡ወ፬፡በግዐ፡ንጹሓን፡ዘዘ፡ዓመት። ወሖረ፡ንጉሥ፡ከመ፡ይሡዕ፡ወተደለዉ፡ካህናት፡ወተጋብኡ፡ነዳያን፡ወተፈሥሐ፡አዕዋፈ፡ሰማይ፡ወኀብሩ፡ፍሥሓ፡ዐቢየ፡በይእቲ፡ዕለት።ወአዛርያስኒ፡ደመረ፡ምስለ፡መሥዋዕተ፡ንጉሥ፡ወሦዐ፡ንዋዮ፡በከመ፡አዘዞ፡መልአከ፡እግዚአብሔር፡ለአዛርያስ፡በሌሊት።ወእምዝ፡እምድኅረ፡ሦዑ፡ገብኡ፡ውስተ፡አብያቲሆሙ፡ወኖሙ፨ ፨ ፨