፳፰፡በእንተ፡ዘከመ፡አዘዛ፡ለንግሥት።
ወአውሥአ፡ንጉሥ፡ወይቤላ፡በአማን፡ርቱዕ፡ይሰግዱ፡ለእግዚኣብሔር፡ለዘ፡ገብረ፡ኵሎ፤ሰማየ፡ወምድረ፤ወባሕረ፡ወየብሰ፤ፀሐየ፡ወወርኀ፤ከዋክብተ፡ወጸዳላተ፤ዕፀወ፡ወአእባነ፤እንስሳ፡ወአዕዋፈ፤ዓራዊተ፡ወሐርገጻተ፤ዓሣተ፡ወዐናብርተ፤ቢሐተ፡ወዐንጐጓተ፤መባርቅተ፡ወፀዓዓተ፤ ደመናተ፡ወነጐድጓደ፤ሠናያነ፡ወእኩያነ።ሎቱ፡ ለባሕቲቱ፡ንስግድ፡ይደሉ፡በፍርሀት፡ወበረዓድ ፡በፍሥሓ፡ወበሐሤት፤እስመ፡ውእቱ፡እግዚአ፡ኵሉ፡ፈጣሬ፡መላእክት፡ወሰብእ፡ወውእቱ፡ይቀትል፡ወያሐዩ፡ወውእቱ፡ይቀሥፍ፡ወይሣሀል፡ዘያነሥኦ፡ለነዳይ፡እምድር፡ወያሌዕሎ፡እመሬት፡ለምስኪን፡ወያሐዝን፡ወያስተፌሥሕ፡ያዐርግ፡ወያወርድ፤አልቦ፡ዘይግእዞ፡እስመ፡እግዚእ፡ ውእቱ፡ለኵሉ፡ወዓልቦ፡ዘይብሎ፡ምንተ፡ገበርከ፤ወሎቱ፡ይደሉ፡ስብሐት፡ወአኰቴት ፡እምኀበ፡መላእክት፡ወሰብእ።ወበእንተ፡ዘትብሊሰ፡ወሀበክሙ፡ታቦተ፡ሕግ፡በአማን፡ተውህበት፡ለነ፡ታቦተ፡አምላከ፡እስራኤል፡እንተ፡ተፈጥረት፡እምቅድመ፡ኵሉ፡ፍጥረት፡በምክረ፡ስብሐቲሁ፤ወትእዛዞሂ፡አውረደ፡ለነ፡ጽሒፎ፡ከመ፡ናእምር፡ፍትሖ፡ወኰነኔሁ፡ዘሠርዐ፡በደብረ፡መቅደሱ፨ወትቤ፡ንግሥት፡እምይእዜሰ፡ኢይሰግድ፡ለፀሐይ፡አላ፡እሰግድ፡ለፈጣሬ፡ፀሐይ፡አምላከ፡እስራኤል፤ወይእቲ፡ታቦተ፡አምላከ፡እስራኤል፡ትኩነኒ፡እግዝእትየ፡ሊተ፡ወለዘርእየ፡እምድኅሬየ፡ወለኵሉ፡መንግሥትየ፡እለ፡እምታሕቴየ።ወበእንተዝ፡ኢነ፡ረከብኩ፡ሞገሰ፡በቅድሜከ፡ወበቅድመ፡አምላከ፡እስራኤል፡ፈጣሪየ፡ዘአብጽሐኒ፡ኀቤከ፡ወአስምዐኒ፡ቃልከ፡ወአርአየኒ፡ገጽከ፡ወአለበወኒ፡ትእዛዝከ፨ወአተወት፡ቤተ፡ወወትረ፡ተሐውር ፡ወትገብእ፡ወትሰምዕ፡ጥበቢሁ፡ወተዐቅብ፡በልባ፤ወውእቱኒ፡የሐውር፡ኀቤሃ፡ወይነግራ፡ኵሎ፡ዘተስእለቶ፡ወይእቲኒ፡ተሐውር፡ኀቤሁ፡ወትሴአሎ፡ወያየድዓ፡ኵሎ፡ዘፈተወት።ወእምድኅረ፡ነበረት፡፮፡አውራኀ፡ፈቀደት፡ገቢዓ፡ብሔራ፡ወለአከት፡ኀቤሁ፡እንዘ፡ትብል፤ወአንሰአ፡እምፈተውኩ፡እንበር፡ምስሌከ፡ወይእዘሰ፡በእንተ፡ኵሉ፡ሕዝብ፡እፈቅድ፡ገቢዓ፡ብሔርየ፤ ወዘንተ፡ዘሰማዕኩ፡ይረስዮ፡እግዚኣብሔር፡ዘይፈሪ፡በውስተ፡ልብየ፡ወውስተ፡ልበ፡ኵሎሙ፡እለ፡ሰምዑ፡ምስሌየ፤እስመ፡ኢይመልእ፡እዝን፡በአፅምኦ፡ወኢይመልእ፡ዐይን፡በነጽሮ፡ጥበብከ።ወአኮ፡ይእቲ፡ባሕቲታ፡ዘትመጽእ፡አላ፡ብዙኃን፡ይመጽኡ፡እምአህጉር፡ወበሓውርት ፡እምቅሩብ፡ወእምርሑቅ፡እስመ፡አልቦ፡ዘተረክበ፡ከማሁ፡በጥበብ፡በውእቱ፡መዋዕል፤ወአኮ፡ሰብእ፡ባሕቲቶሙ፡ዘይመጽኡ፡ኀቤሁ፡ወዓዲ፡አራዊትኒ፡ወአዕዋፍ፡ይመጽኡ፡ኀቤሁ፡ ወይሰምዑ፡ቃሎ፡ወያነክሩ፡ጥበቦ፡ወይትናገሩ፡ምስሌሁ፡ወይገብኡ፡ብሔሮሙ፡ወኵሉ፡ያነክር፡ጥበቢሁ፡ወያነክር፡በዘ፡ርእየ፡ወሰምዐ፨ወሶበ፡ለአከት፡ኀቤሁ፡ከመ፡ትሖር፡ብሔራ፡ኀለየ፡በልቡ፡ወይቤ፡ዘመጠነዝ፡ላሕይት፡ብእሲት፡መጽአት፡ኀቤየ፡እምአጽናፈ፡ምድር፡ምንተ፡ኣአምር፡እመ፡ይሁበኒ፡እግዚኣብሔር፡ዘርአ፡በውስቴታ።በከመ፡ተብህለ፡ውስተ፡መጽሐፈ፡ነገሥት፤ወሰሎሞንሰ፡ንጉሥ፡መፍቀሬ፡አንስት፡ውእቱ፡ወአውሰበ፡እምነ፡ዕብራዊያን፡ወግብጻዊያን፡ወከነናዊያን፡ወኢዶማዊያን፡ወኢዮባዊያን፤ወእምሪፍ፡ወኰርጐ፡ወድሚሲቅ፡ወሱርስት፤ወእምእለ፡ነገርዎ፡እለ፡ሠናይ፡ላሕዮን፤ወኮና፡ንግሥታት፡፬፻፡ወዕቁባት፡፮፻፡ወዘንተሰ፡ዘገብረ፡አኮ፡በዘምዎ፡አላ፡በኀልዮ፡ጥበብ፡ዘወሀቦ፡እግዚአብሔር፡ወተዘኪሮ፡ዘይቤሎ፡ለአብርሃም፡ኣበዝኅ፡ዘርእከ፡ከመ፡ኮከበ፡ሰማይ፡ወከመ፡ኆጻ፡ባሕር።ወይቤ፡በልቡ፡ምንተ፡አአምር፡እመ፡ይሁበኒ፡እግዚአብሔር፡ተባዕተ፡ውሉደ፡በበ፡፩፡ለለ፡አሐቲ፡እምኔሆን ፤ወበእንተዝ፡ተጠቢቦ፡ገብረ፡ከመዝ፡እንዘ፡ይብል፡ደቂቅየ፡ይረሱ፡አህጉረ፡ፀር፡ወይሠርውዎሙ፡ለእለ፡ያመልኩ፡ጣዖተ።ወእሙንቱሰ፡ቀዳሚ፡ሕዝብ፡ነበሩ፡በሕግ፡ዘሥጋ፡እስመ፡ኢተውህቦሙ ፡ጸጋ፡ዘመንፈስ፡ቅዱስ፤ወለእለ፡እምድኅረ፡ክርስቶስሰ፡ተውህቦሙ፡ይንበሩ፡በአሐቲ፡ብእሲት፡በሕገ፡ሰብሳብ፤ ወሠርዑ፡ሎሙ፡ሐዋርያት፡እንዘ፡ይብሉ፡እለ፡ነሥኡ፡ሥጋሁ፡ወደሞ፡ኵሎሙ፡አኀው፡እሙንቱ፡እሞሙ፡ቤተ፡ክርስቲያን፡ወአቡሆሙ፡እግዚአብሔር፤ወይጸርኁ፡ምስለ፡ክርስቶስ፡ዘተመጠዉ፡እንዘ፡ይብሉ፡አቡነ፡ዘበሰማያት። ወለሰሎሞንሰ፡ኢተሠርዐ፡ሎቱ፡በአንስት፡ወኢኮኖ፡ጌጋየ፡በአውስቦ፤ወለመሀይምናንሰ፡ተውህቦሙ፡ሕገ፡ወትእዛዘ፡ከመ፡ኢያብዝኁ፡አንስተ፡በከመ፡ይቤ፡ጳውሎስ፡እለሰ፡ብዙኀ፡አንስተ፡አውሰቡ፡መቅሠፍተ፡ኀሠሡ፡ለርእሶሙ፡ወዘሰ፡አውሰበ፡አሐተ፡ብእሲተ፡አልቦ፡ኀጢአተ።ወሕገ፡እኅት፡ከላእነ፡ዘበእንተ፡ወሊድ፡ይቤሉ፡ሐዋርያት፡በውስተ፡ሲኖዶስ፨ ፨ ፨