፳፯፡በእንተ፡ገባራዊ።
ወእንዘ፡ዘንተ፡ይትናገራ፡ለንግሥት፡ርእዮ፡ለ፩፡ገባር፡እንዘ፡ይጸውር፡እብነ፡ዲበ፡ርእሱ፡ወሳእረ፡ማይ፡ዲበ፡ክሳዱ፡ወስንቁ፡ወአሣእኒሁ፡ውስተ፡ሐቌሁ፡ወለዕፀውኒ፡ደመሮን፡ውስተ፡እደዊሁ፡ወብሉያት፡ወሥጡጣት፡አልባሲሁ፡ወሃፉ፡ያንጠበጥብ፡እምነ፡ገጹ፡ወማየ፡ሳእርኒ፡ይውኅዝ፡ውስተ፡ሰኰናሁ።ወኀለፈ፡እንተ፡ቅድሜሁ። ወእንዘ፡የሐውር፡ይቤሎ፡ቁም፡ወቆመ፤ወተመይጠ፡ኀበ፡ንግሥት፡ወይቤላ፡ርእዪ፡ዘንተ፡ምንት፡ፍድፍድናየ፡እም፡ዝንቱ፡ወምንት፡ኅይስናየ፡እምነዝ፡ወምንት፡ክብርየ፡እምነ፡ከመዝ፤እስመ፡አነሂ፡ሰብእ፡ወሐመድ፡ ዘጌሠመ፡እከውን፡ዕፄ፡ወጺአት፡ወይእዜ፡እንከ፡ኣስተርኢ፡ከመ፡ዘኢይመውት፡ለዓለም።መኑ፡እምአግአዞ፡ ለእግዚአብሔር፡እመ፡ወሀቦ፡ለዝንቱ፡ከማየ፡ወሊተኒ፡ሶበ፡አገበረኒ፡ከማሁ፤አኮኑ፡ክልኤነ፡ሰንቡእ፤ሰብእ፡ብሂል፤ወከመ፡ሞተዝ፡ሞትየ፡ወከመ፡ሕይወተዝ፡ሕይወትየ፡ወዝንቱ፡ይጸንዕ፡በግብር፡እምኔየ፡እስመ፡ይሁቦሙ፡ኀይለ፡ለድኩማን፡በከመ፡ፈቀደ፡ለሊሁ፤ወይቤሎ፡ሖር፡ኀበ፡ግብርከ፨ወካዕበ፡ይቤላ፡ለንግሥት፡ምንት፡በቊዔትነ፡ለእጓለ፡እመሕያው፡ለእመ፡ኢገበርነ፡ንስሐ፡ወምሕረተ፡በዲበ፡ምድር፤አኮኑ፡ኵልነ፡ከንቱ፡ሣዕረ፡ገዳም፡ዘበጊዜሃ፡ይየብስ፡ወያውዕዮ፡እሳት፤በዲበ፡ምድር፡ንትረሰይ፡በመባልዕት፡ጥዑማት፡ወበአልባስ፡ክቡራት፤እንዘ፡ሕያዋን፡ጽዩኣን፤ወንትረሰይ፡በመዐዛት፡ወበዕፍረታት፤እንዘ፡ሕያዋን፡ምዉታን፡በኀጢዓት፡ ወበዓበሳት፤እንዘ፡ጠቢባን፡ኮነ፡አብዳነ፡በኢሰሚዕ፡ወበዕልወታት፤እንዘ፡ክቡራን፡ኮነ፡ኅሱራነ፡በተጠይሮ፡ ወበሰጊድ፡ለጣዖት።ሰብእሰ፡ክቡር፡ዘተፈጥረ፡በአምሳለ፡እግዚአብሔር፡ወለእመኒ፡ገብረ፡ሠናየ፡ይከውን፡ከመ፡እግዚአብሔር፤ሰብእሰ፡ከንቱ፡ወለእመኒ፡ገብረ፡ኀጢአተ፡ይከውን ፡ከመ፡ዲያብሎስ፤ዲያብሎስሰ፡ዕቡይ፡ዘዓበየ ፡ተአዝዞ፡ለፈጣሪሁ፡ወኵሎሙ፡ዕቡያን፡እምሰብእ፡የሐውሩ፡በፍኖቱ፡ወይትኴነኑ፡ምስሌሁ፤ወእግዚአብሔር፡ያፈቅሮሙ፡ለትሑታን፡ወእለ፡ይገብሩ፡ትሕትና፡የሐውሩ፡በፍኖቱ፡ወይትፌሥሑ፡በውስተ፡መንግሥቱ፤ ወብፁዕሰ፡ዘአእመረ፡ጥበበ፡ዝውእቱ፡ንስሐ፡ወፈሪሀ፡እግዚአብሔር፨ወዘንተ፡ሰሚዓ፡ንግሥት፡ትቤ፡ምንተ፡ሠነየኒ፡ቃልከ፡ወእፎ፡ሐወዘኒ፡ነገርከ፡ወመክሥተ፡አፉከ።ንግረኒኬ፡ለዘ፡ይረትዕ፡ለዘ፡እሰግድ፡ሎቱ፤ወንሕነሰ፡ንሰግድ፡ለፀሐይ፡በከመ፡መሀሩነ፡አበዊነ፡እስመ፡ንብል፡ውእቱ፡ፀሐይ፡ንጉሦሙ፡ለአማልክት፤ወባዕዳንሂ፡እለ፡እምታሕቴነ፡ቦእለ፡ይሰግዱ፡ለዓእባን፡ወቦ፡እለ፡ይሰግዱ፡ለአዕዋም፡ወቦእለ፡ይሰግዱ፡ለግልፈዋት፡ወቦ፡እለ፡ይሰግዱ፡ለአምሳለ፡ወርቅ፡ወብሩር፤ወንሕነሰ፡ንሰግድ፡ለፀሐይ፡እስመ፡ውእቱ፡ያበስል፡ሲሳየ፡ወካዕበ፡ውእቱ፡ያበርህ፡ጽልመተ፡ወያአትት፡ፍርሀተ፤ንብሎ፡ንጉሥነ፡ወንብሎ፡ፈጣሪነ፡ወንሰግድ፡ሎቱ፡ከመ፡አምላክነ፤እስመ፡አልቦ፡ዘነገረነ፡ባዕደ፡አምላከ፡ዘእንበሌሁ።ወባሕቱ፡ሰማዕነ፡ከመ፡ብክሙአ፡ለእስራኤል፡ካልአ፡አምላከ፡ዘኢናአምሮ፡ንሕነ፡ወዜነዉነ፡ከመ፡አውረደ፡ለክሙ፡ታቦተ፡እምሰማያት፡ወወሀበክሙ፡ጽላተ፡ሥርዐተ፡መላእክት፡በእደ፡ሙሴ፡ነቢዩ፡ሰማዕነ፡ዘንተ፤ ወይወርድ፡አ፡ኀቤክሙ፡ለሊሁ፡ወይትናገረክሙ፡ወይኤምረክሙ፡ፍትሖ፡ወትእዛዞ፨ ፨ ፨