1 ወተከዘ፡ዮናስ፡ዐቢየ፡ትካዘ፡ወሐዘነ።
2 ወጸለየ፡ኀበ፡እግዚአብሔር፡ወይቤ፤እግዚኦ፡አኮኑ፡ከመዝ፡እቤ፡በብሔርየ፡ወበእንተ፡ዝንቱ፡ተኀጣእኩ፡ተርሴስ፡እስመ፡ኣአምር፡ከመ፡መሓሪ፡አንተ፡ወመስተሣህል፡ርሑቀ፡መዐት፡ወብዙኀ፡ምሕረት፡ወጻድቅ፡ወትኔስሕ፡በእንተ፡እኪት።
3 ወይእዜኒ፡እግዚኦ፡ንሥኣ፡ለነፍስየ፡እምኔየ፡እስመ፡ይኄይሰኒ፡መዊት፡እምሐይው።
4 ወይቤሎ፡እግዚአብሔር፡ለዮናስ፤ጥቀኑ፡ትቴክዝ፡አንተ።
5 ወእምዝ፡ወፅአ፡ዮናስ፡እምሀገር፡ወነበረ፡አንቀጸ፡ሀገር፡ወገብረ፡ሎቱ፡ልገተ፡ወነበረ፡ታሕተ፡ጽላሎታ፡እስከ፡ይሬኢ፡ዘይከውን፡ሀገር።
6 ወአዘዘ፡እግዚአብሔር፡ሐምሐመ፡ወበቈለ፡ወጸለሎ፡መልዕልተ፡ርእሱ፡ለዮናስ፡ከመ፡ይጸልሎ፡እምፀሐይ፡እምሕማሙ፤ወተፈሥሐ፡ዮናስ፡ዐቢየ፡ፍሥሓ፡በእንተ፡ሐምሐም።
7 ወአዘዘ፡እግዚአብሔር፡በሳኒታ፡ዕፄ፡ወቀተሎ፡ለዝኩ፡ሐምሐም፡ወየብሰት።
8 ወሠሪቆ፡ፀሐይ፡አዘዘ፡እግዚአብሔር፡ነፋሰ፡ሐሩረ፡እግዚእ፡ዘያውዒ፤ወአሕመሞ፡ፀሐይ፡ርእሶ፡ለዮናስ፡ወዐንበዘ፡ወተቈጥዐ፡ነፍሶ፡ወይቤ፤ይኄይሰኒ፡መዊት፡እምሐይው።
9 ወይቤሎ፡እግዚአብሔር፡ለዮናስ፤ጥቀኑ፡ትቴክዝ፡በእንተ፡ሐምሐም፤ወይቤ፤ጥቀ፡ተከዝኩ፡እስከ፡ለሞት።
10 ወይቤሎ፡እግዚአብሔር፤አንተሰ፡ኢትምሕክ፡ሐምሐመ፡ዘኢጻመውከ፡ወዘኢሰቀይከ፡ዘሌሊተ፡በቈለት፡ወሌሊተ፡ሞተት።
11 ወአንሰ፡ኢይምሕካ፡ለነነዌ፡ሀገር፡ዐቢይ፡ዘሀለወ፡ውስቴታ፡ሰብእ፡ፈድፋደ፡እምዐሠርቱ፡ወክልኤቱ፡እልፍ፡እለ፡ኢፈለጡ፡ፀጋሞሙ፡እምየማኖሙ፡ወእንስሳ፡ብዙኅ። ። ።