2
በእንተ፡ኄር፡መስተጋድል
1 ወአንተ፡ወልድየ፡ጽናዕ፡በጸጋሁ፡ለእግዚእነ፡ኢየሱስ፡ክርስቶስ።
2 ወዘሰማዕከ፡በላዕሌየ፡በኀበ፡ብዙኃን፡ሰማዕት፡ኪያሁ፡መሀሮሙ፡ለመሃይምናን፡ሰብእ፡እለ፡ይደልዎሙ፡ከመ፡ይምሀሩ፡ለባዕዳን።
3 ወጻሙ፡ከመ፡ኄር፡መስተጋድል፡ላእከ፡ኢየሱስ፡ክርስቶስ።
4 እስመ፡አልቦ፡ዘይትቃተል፡ወይሔሊ፡ንብረተ፡ዓለም፡ከመ፡ይድሉ፡ለዘሤም።
5 ወእመኒ፡መስተጋድል፡ኢይከውኖ፡ምዝጋና፡እመ፡ዘበሕጉ፡ኢተጋደለ።
6 ወዘኒ፡ይጻሙ፡ሐረሳዊ፡ግብር፡ይቀድም፡ረኪበ፡ፍሬሁ።
7 ወለቡ፡ዘእኬለከ።የሀብከ፡እግዚአብሔር፡ጥበበ፡በኵሉ።
8 ተዘከሮ፡ለኢየሱስ፡ክርስቶስ፡ዘተንሥአ፡እምውታን፡ዘእምዘርዐ፡ዳዊት፡በከመ፡መሀርኩ።
9 ዘበእንቲአሁ፡እሠርሕ፡ወእትሞቃሕ፡ከመ፡ጕሕልያ፡ወባሕቱ፡ቃለ፡እግዚአብሔርሰ፡ኢይትአሠር።
10 በበእንተዝ፡እትዔገሥ፡በኵሉ፡በእንተ፡ኅሩያኒሁ፡ከመ፡እሙንቱሂ፡ይረክቡ፡ሕይወተ፡ዘበኢየሱስ፡ክርስቶስ፡ወስብሐተ፡ዘለዓለም፡ዘበሰማያት።
11 እሙን፡ነገር፡እምከመ፡ነኀብር፡መዊተ፡ንዔሪ፡ሕይወተ።
12 ወእመሰ፡ዐረይነ፡ትዕግሥተ፡ንዔሪ፡ነጊሠ፡ወእመሰ፡ክሕድናሁ፡ውእቱኒ፡ይክሕደነ።
13 ወእመኒ፡ኢአመናሁ፡ውእቱሰ፡ምእመነ፡ይነብር፡ወኢይክል፡ክሒደ፡ርእሶ።
በእንተ፡እምነተ፡ገባራዊ
14 ከመዝ፡ዘከሮሙ፡ወአስምዕ፡ቅድመ፡እግዚአብሔር፡ኢትትላኰዩ፡በግብር፡ዘኢይበቍዕ፡ወበዘይትገፈትኡ፡እለ፡ይስምዑ።
15 አስተፋጥን፡ከመ፡ትረሲ፡ርእሰከ፡ኅሩየ፡በኀበ፡እግዚአብሔር፡ከመ፡ገባራዊ፡ዘኢይትኀፈር፡ዘርቱዐ፡ይመትር፡ቃለ፡እግዚአብሔር፡በጽድቅ።
16 ወለነገረ፡ርኩሳንሰ፡ዘአልቦ፡ባቍዕ፡እበዮ፡እስመ፡ያዐብይዋ፡ለኃጢአቶሙ።
17 ወነገሮሙኒ፡ከንቱ፡ከመ፡ዘይትረዐይ፡ወዘይልህቅ፡በብዙኃን፡እለ፡ሄሜኔዎስ፡ወፊሊጦስ።
18 እለ፡አውከኩ፡እምጽድቅ፡ወይብሉ፡ወድአ፡ኮነ፡ትንሣኤ፡ምውታን፡ወይገፈትኡ፡ሃይማኖቶሙ፡ለብዙኃን።
19 ወዘሰ፡ጽኑዕ፡በመሠረተ፡እግዚአብሔር፡ይቀውም፡እንዘቦ፡ዘንተ፡ማዕተበ፡ወያአምሮሙ፡እግዚአብሔር፡ለእሊአሁ፡ወይርሕቅ፡እምዐመፃ፡ኵሉ፡ዘይሰሚ፡ስመ፡እግዚአብሔር።
20 ውስተ፡ቤትኒ፡ዐቢይ፡አኮ፡ባሕቲቱ፡ንዋየ፡ወርቅ፡ወብሩር፡ዓዲቦ፡ዘዕፅኒ፡ወዘልሕኵትኒ። ቦዘለክብርኒ፡ወቦ፡ዘለኀሳር።
21 ወእመቦ፡ዘአንጽሐ፡ርእሶ፡እመዝ፡እኩይ፡ይከውን፡ንዋየ፡ክብር፡ቅዱሰ፡ወባቍዐ፡ለመልእክተ፡እግዚኡ፡ወድልወ፡ለኵሉ፡ምግባረ፡ሠናይ።
22 ጕየያ፡ለፍትወተ፡ውርዙት፡ወዴግና፡ለጽድቅ፡ወለሃይማኖት፡ወተፋቅሮ፡ወሰላም፡ምስለ፡ኵሎሙ፡እለ፡ይጼውዕዎ፡ለእግዚአብሔር፡በልብ፡ንጹሕ።
23 እበዮ፡ለነገረ፡እበድ፡ወስላቅ፡ወተኃሥሦ፡ከንቱ፡ታአምር፡ከመ፡ጋእዘ፡ያመጽእ።
24 ወገብረ፡እግዚአብሔር፡ኢይትገአዝ፡አላ፡ከመ፡ሕፃን፡የዋሀ፡ይከውን፡ምስለ፡ኵሉ፡ወመምህረ፡ወመስተዓግሠ፡እምኵሎ፡እኩይ።
25 ወይጌሥጽ፡በየውሀት፡ለእለ፡ይትቃረኑ።እመቦ፡ከመ፡የሀቦሙ፡እግዚአብሔር፡ይነስሑ፡ይእምርዋ፡ለጽድቅ።
26 ወይንቅሁ፡እመሥገርተ፡ሰይጣን፡እስመ፡ወድአ፡አሥገሮሙ፡ለተሊወ፡ፈቃዱ።
