Biblia Etíope · Biblia Etíope en Ge'ez
2 Pedro 1
መልእክተ፡ጴጥሮስ፡ዳግሚት።1ስምዖን፡ኬፋ፡ገብሩ፡ወልኡኩ፡ለኢየሱስ፡ክርስቶስ፡ለእለ፡ነኀብር፡ክብረ፡በሃይማኖት፡እንተ፡ከፈለነ፡በጽድቁ፡ለአምላክነ፡ወፈራቂነ፡ኢየሱስ፡ክርስቶስ።
2ሞገስ፡ወሰላም፡ይብዛኅ፡ለክሙ። በአእምሮቱ፡ለአምላክነ፡ወኢየሱስ፡ክርስቶስ፡እግዚእነ።
3ዘበኀይለ፡መለኮቱ፡ወሀበ፡ለነ፡ኵሎ፡ምግባረ፡ዘይወስድ፡ኀበ፡ሕይወት፡ወጽድቅ፡ውእቱ፡ዘጸውዐነ፡ውስተ፡ስብሐቲሁ፡ወውስተ፡ሠናይቱ።
4በዘቦቱ፡ነሐዩ፡ወነዐቢ፡ወንከብር፡በተስፋሁ፡እንተ፡ጸገወነ፡ከመ፡በእንተ፡ዝንቱ፡ትኩኑ፡ሱቱፋነ፡ለመለኮተ፡ዚአሁ፡እንዘ፡ትጐይይዋ፡ለፍትወተ፡ሙስናሁ፡ለዝንቱ፡ዓለም።
5ወአንትሙኒ፡በኵሉ፡ጕጕአ፡ገቢረክሙ፡አትልውዋ፡ለሠናይት፡በሃይማኖትክሙ፡ወበሠናይት፡ለአእምሮ፡ወበአእምሮ፡ለኢዘምዎ፡ወበኢዘምዎ፡ለትዕግሥት፡ወበትዕግሥት፡ለአምልኮ።
6ወበአምልኮ፡ለተአኅዎ፡ወበተአኅዎ፡ለተፋቅሮ።
8ወዝንቱ፡እምከመ፡ሀለወ፡ኀቤክሙ፡ኢኮንክሙ፡ፅሩዓነ፡ወኢኮንክሙ፡እለ፡እንበለ፡ፍሬ። አላ፡ያበጽሐክሙ፡ውስተ፡አእምሮቱ፡ለእግዚእነ፡ኢየሱስ፡ክርስቶስ።
9ወዘሰ፡ኢሀሎ፡ውስተ፡ዝንቱ፡ምግባር፡ዕዉር፡ውእቱ፡ዘየሐውር፡በመርሰስ፡ወረስዐ፡አንጽሖ፡ርእሶ፡እምእለ፡በልያ፡በላዕሌሁ፡ኃጣውኢሁ።
10ወይእዜኒ፡አኀዊነ፡ጐጕኡ፡ከመ፡በጽንዐ፡ምግባሪክሙ፡ጽንዕተ፡ትኩን፡ጽዋዔክሙ፡ወታወፍዩ፡ሐሳበክሙ። ወዘንተ፡እንዘ፡ትገብሩ፡ኢትስሐቱ።
11ወይትወሀበክሙ፡ርሒብ፡ፍኖት፡ዘይወስድ፡ውስተ፡ሕይወት፡ዘለዓለም፡ወመንግሥቱ፡ለመድኀኒነ፡ኢየሱስ፡ክርስቶስ።
12ወበእንተዝ፡እጽህቅ፡ለክሙ፡ዘልፈ፡ወአዜክረክሙ፡ዘንተ፡ትእዛዘ፡እንዘ፡ጽኑዓን፡አንትሙ፡በዘሀለወ፡ጽድቅ።
13ወይመስለኒሰ፡ከመ፡ርቱዕ፡ሊተ፡አምጣነ፡ሀሎኩ፡በዝንቱ፡ሥጋየ፡አንቅሀክሙ፡በዘክሮ።
14እስመ፡አአምር፡ከመ፡ፍጡነ፡ይእቲ፡ስሳሌ፡ዚአየ፡እምኔክሙ፡በከመ፡አይድዐኒ፡እግዚእነ፡ኢየሱስ፡ክርስቶስ።
15ወዓዲ፡እጔጕእ፡ከመ፡ተሀሉ፡ኀቤከሙ፡ዛቲ፡ትእዛዝ፡ዘልፈ፡ወከመ፡ትዘከርዋ፡እምድኅረ፡ኅልፈትየ፡ወከማሁ፡ትግበሩ።
16እስመ፡ኢኮነ፡መኃድምተ፡ጥበብ፡ዘተሎነ፡ወአእመርናክሙ፡ቦቱ፡ኀይሎ፡ለእግዚእነ፡ኢየሱስ፡ክርስቶስ፡ወምጽአቶ። አላ፡ለሊነ፡ርኢነ፡ዕበዮ። ዘነሥአ፡እምኀበ፡እግዚአብሔር፡አብ፡ክብረ፡ወስብሐተ፡ወቃል፡ዘወረደ፡ላዕሌሁ፡ዘምሉእ፡ስብሐተ፡ወልዕልና፡ይቤ፡ዝንቱ፡ውእቱ፡ወልድየ፡ዘአፈቅር፡ዘአነ፡ኀረይኩ።
18ዘንተ፡ቃለ፡ንሕነ፡ሰማዕናሁ፡ከመ፡እምሰማይ፡ወረደ፡ሎቱ፡እንዘ፡ሀሎነ፡ምስሌሁ፡በደብረ፡መቅደሱ።
19ወብነ፡ዓዲ፡ዘእምዝኒ፡ደቀድም፡ቃለ፡ነቢያት፡ዘያዐውቅ፡ዘንተ። ወጥቀ፡ታሤንዩ፡ገቢረ፡እለ፡ትኔጽርዎ፡ከመ፡ማኅቶት፡እንተ፡ታበርህ፡ውስተ፡መካነ፡ጽልመት፡እስከ፡ታበርህ፡ለክሙ፡ዕለት፡ወይሠርቅ፡ለክሙ፡ቤዝ፡ውስተ፡ልብክሙ።
20ወዘንተ፡ባሕቱ፡ቅድሙ፡አእምሮ፡ከመ፡ኵሉ፡ተነብዮ፡ዘውስተ፡መጽሐፍ፡አልቦ፡ላዕሌሁ፡ፍካሬሁ።
21ወኢይከውን፡ተነብዮ፡ግሙራ፡እምፈቃደ፡ሰብእ፡ወኢእምሥምረተ፡እጓለ፡እመሕያው። አላ፡በመንፈስ፡ቅዱስ፡ነበቡ፡ቅዱሳን፡ሰብእ፡ተፈኒዎሙ፡እምእግዚአብሔር።
© The text of this book was transcribed by Ted Erho, and is published here with his kind permission. This digitized version is intended for personal research and study only, and cannot be adapted into a commercial form or stored in any other repository without written consent from Ted Erho.
Fuente / Source: Ran HaCohen, Ethiopic Bible (Platt, 1830).