መልእክተ፡ዮሐንስ፡ሐዋርያ፡ዳግማዊ።
1
በእንተ፡እግዝእት፡ወደቂቃ
1 እምነ፡ቀሲስ፡ለኅሪት፡ወለእግዝእት፡ወለደቂቃ፡ለእንተ፡አነ፡አፈቅራ፡በጽድቅ፡ወበእንተ፡ዛቲ፡ጽድቅ፡ወአኮ፡አነ፡ባሕቲትየ፡አላ፡ወእለኒ፡ያአምርዋ፡ለጽድቅ፡ኵሎሙ።
2 ወበእንተ፡ዛቲ፡ጽድቅ፡እንተ፡ትነብር፡ኀቤነ፡ወትሄሉ፡ምስሌነ፡ይእቲ፡ለዓለም።
3 ወትሄሉ፡ምስሌነ፡ሞገስ፡ወምሕረት፡ወሰላም፡እምኀበ፡እግዚአብሔር፡አብ፡ወእምኀበ፡ኢየሱስ፡ክርስቶስ፡ወልዱ፡ለአብ፡እግዚአብሔር፡በጽድቅ፡ወበተፋቅሮ።
4 ተፈሣሕኩ፡ጥቀ፡እስመ፡ረከብኩ፡እምደቂቅኪ፡እለ፡የሐውሩ፡በጽድቅ፡በከመ፡ነሣእነ፡ትእዛዞ፡እምኀበ፡አብ።
5 ወይእዜ፡እስእለኪ፡ኦእግዝእት፡ወአኮ፡ትእዛዘ፡ሐዲሰ፡ዘእጽሕፍ፡ለኪ፡አላ፡ትእዛዘ፡እንተ፡ብን፡ትካት፡ከመ፡ንትፋቀር፡በበይናቲነ።
6 ወዛቲ፡ይእቲ፡ተፋቅሮትነ፡ከመ፡ንሑር፡በትእዛዙ።ወዛቲ፡ይእቲ፡ትእዛዝ፡ከመ፡ንሑር፡በዛቲ፡እንተ፡ሰማዕክሙ፡ትካት።
7 እስመ፡ብዙኃን፡መስሕታን፡እለ፡መጽኡ፡ውስተ፡ዓለም፡እለ፡ኢየአምኑ፡በኢየሱስ፡ክርስቶስ፡ከመ፡መጽአ፡በሥጋ፡ወዝውእቱ፡መስሐቲ፡ሐሳዌ፡መሲሕ።
8 ዑቁ፡ርእሰክሙ፡ኢትሕጐሉ፡ዘገበርክሙ፡አላ፡ከመ፡ዐስበ፡ፍጹመ፡ትንሥኡ።
9 ኵሉ፡ዘይናፍቅ፡ወኢይነብር፡በትምህርቱ፡ለክርስቶስ፡ኢሀሎ፡እግዚአብሔር፡ምስሌሁ።ወዘሰ፡ይነብር፡በትምህርቱ፡ለክርስቶስ፡በአብ፡ወበወልድ፡ሀሎ።
10 ወዘኒ፡ይመጽእ፡ኀቤክሙ፡ወዘንተ፡ትምህርተ፡ኢያመጽእ፡ኢታብእዎ፡ቤተክሙ፡ወባሐሂ፡ጥቀ፡ኢትበልዎ።
11 እስመ፡ዘይቤሎ፡ባሐ፡ይሳተፎ፡በምግባሩ፡እኩይ።
12 ወብዙኅ፡ብየ፡ዘእጽሕፍ፡ለክሙ፡ወኢፈቀድኩ፡በክርታስ፡ወበማየ፡ሕመት፡እስመ፡እትአመን፡ከመ፡እመጽእ፡ኀቤክሙ፡ወአፈ፡በአፍ፡እትናገረክሙ፡ከመ፡ፍጹመ፡ይኩን፡ፍሥሓክሙ።
13 ይኤምኁኪ፡ደቂቀ፡እኅትኪ፡ኅሪት።ሞገስ፡ወተፋቅሮ፡ምስሌክሙ።አሜን። ። ።
መልአት፡መልእክተ፡ዮሐንስ፡ዳግሚት።
ወስብሐት፡ለእግዚአብሔር፤አሜን።