Biblia Etíope · Biblia Etíope en Ge'ez

1 Timoteo 2

ኀበ፡ጢሞቴዎስ፡ቀዳማዊ።

2በእንተ፡ጸሎት፡ወስኢል

1አስተበቍዐከ፡ቀዳሜ፡ኵሉ፡ትግበር፡ጸሎተ፡ወስኢለ፡ወተጋንዮ፡ወእምዝ፡ጸል፡ላዕለ፡ኵሉ፡ሰብእ።

2ወላዕለ፡ኵሉ፡ነገሥት፡ወመኳንንት፡ከመ፡በህዱእ፡ወበጽምው፡ይኩን፡ንብረትነ፡በኵሉ፡ጽድቅ፡ወንጽሕ።

3ዝኩ፡ሠናይ፡ወኅሩይ፡በቅድመ፡እግዚአብሔር፡መድኀኒነ።

4እሰመ፡ውእቱ፡ይፈቅድ፡ኵሉ፡ሰብእ፡ይሕየው፡ወያእምርዋ፡ለጽድቅ።

5አሐዱ፡እግዚአብሔር፡ወአሐዱ፡ኅሩይ፡ማእከለ፡እግዚአብሔር፡ወሰብእ፡ኢየሱስ፡ክርስቶስ፡ዘኮነ፡ሰብአ።

6ዘመጠወ፡ርእሶ፡ቤዛ፡ኵሉ።ወኮነ፡ሰማዕተ፡በዕድሜሁ።ዘሎቱ፡ተሠየምኩ፡ሐዋርያ፡ወዐዋዴ።

7እሙነ፡እብል፡ወኢይሔሱ፡ተሠየምኩ፡መምህረ፡ለአሕዛብ፡በሃይማኖት፡ወበጽድቅ።

8ወእፈቅድ፡ለኵሉ፡ሰብእ፡ይጸልዩ፡በኵሉ፡ገጸ፡መካን፡ወያንሥኡ፡እደዊሆመ፡በንጽሕ፡ዘእንበለ፡ነጐርጓር፡ወኑፋቄ።

9ወከማሁ፡አንስትኒ፡ይትረሰያ፡ለጸሎት፡በፈሪሀ፡እግዚአብሔር፡ወበኀፍረት፡ወበልቡና፡ወበአንጽሖ፡ርእሶን፡እምዝሙት፡አኮ፡በሐብላተ፡ወርቅ፡ወበባሕርይ፡ወበአልባስ፡ቅድው፡ዘዕፁብ፡ሤጡ፡ወአኮ፡በተፀፍሮ፡ሥዕርቶን።

10ዘእንበለ፡በዘይደልዎን፡ለአንስት፡ቀዲሙ፡አምልኮ፡እግዚአብሔር፡በትምህርተ፡ጽድቅ፡ወበምግባረ፡ሠናይ።

11ብእሲት፡በጽምው፡ትትመሀር፡ወትትአዘዝ፡በኵሉ።

12ወብእሲትሰ፡ትምሀር፡ኢናበውሕ፡ወኢትመብለ፡ላዕለ፡ብእሲ።ዳእሙ፡በጽምው፡ተሀሉ።

13እስመ፡አዳም፡ቀደመ፡ተፈጥሮ፡ወእምድኅሬሁ፡ሔዋ።

14ወአዳምሰ፡ኢስሕተ፡አላ፡ብእሲት፡ስሕተት፡ወዐለወት።

15ወባሕቱ፡ተሐዩ፡በእንተ፡ውሉዳ፡ለእመ፡ነበሩ፡በሃይማኖት፡ወበተፋቅሮ፡ወበቅድሳት፡ወበአንጽሖ፡ርእሶሙ፡በአእምሮ።1