4
በእንተ፡ምክር፡ሠናይ
1
ወይእዜኒ፡አኀዊነ፡ንነግረክሙ፡ወናስተበቍዐክሙ፡በእግዚእነ፡ኢየሱስ ክርስቶስ፡ከመ፡ተአዘዝክሙ፡በኀቤነ፡በዘይደሉ፡ከመ፡ትሑሩ፡ወታሥምርዎ፡ለእግዚአብሔር፡በከመ፡ሖርክሙ፡ዓዲ፡ከመ፡ታብዝኁ፡ወታፈድፍዱ፡በዝንቱ።
2ወተአምሩ፡ዘከመ፡አዘዝናክሙ፡በእግዚእነ፡ኢየሱስ፡ክርስቶስ።
3እስመ፡ዝ፡ውእቱ፡ትእዛዙ፡ለእግዚአብሔር፡ወፈቃዱ፡ተቀድሶትክሙ፡ውእቱ፡ወከመ፡ትትዐቀቡ፡ወትርኀቁ፡እምዝሙት።
4 ወያእምር፡ኵሉ፡ለለ፡አሐዱ፡ንዋዮ፡ወያጥርዮ፡በቅድሳት፡ወክብር።
5ወኢትትመንሰዉ፡በፍትወት፡ከመ፡አረሚ፡እለ፡ኢየአምርዎ፡ለእግዚአብሔር።
6 ወኢትትኀበሉ፡ትግበሩ፡ዘንተ፡ወኢትትዐበዩ፡ወኢትትዐገሉ፡ቢጸክሙ፡በኵሉ፡እስመ፡መስተበቅል፡እግዚአብሔር፡በእንተ፡ዝንቱ፡ኵሉ፡በከመ፡አቅደምኩ፡ነጊሮተክሙ፡ወአስማዕኩ፡ለክሙ።
7 እስመ፡ኢጸውዐነ፡እግዚአብሔር፡ለርኵስ፡ዘእንበለ፡ለቅድሳት።
8 ወይእዜኒ፡ዘክሕደሰ፡ለያእምር፡ከመ፡አኮ፡ለሰብእ፡ዘይክሕድ፡ዘእንበለ፡ለእግዚአብሔር፡ዘወሀበክሙ፡መንፈሰ፡ቅዱሰ።
9 ወበእንተሰ፡አፍቅሮ፡ቢጽክሙ፡ኢትፈቅዱ፡ንጽሐፍ፡ለክሙ፡ለሊክሙ፡ምሁራን፡በኀበ፡እግዚአብሔር፡ከመ፡ትትፋቀሩ፡በበይናቲክሙ።
10 ወከማሁ፡ትግበሩ፡ዓዲ፡ምስለ፡ኵሎሙ፡አኀዊነ፡እለ፡በኵሉ፡መቄዶንያ፡ወናስተበቍዐክሙ፡አኀዊነ፡ትብዝኁ፡ወትፈድፍዱ።
11 ከመ፡ትኩኑ፡የዋሃነ ወትትገበሩ፡ተግባረክሙ፡ወትትቀነዩ፡በእደዊክሙ፡ዘከመ፡አዘዝናክሙ።
12 ከመ፡ትሑሩ፡በኂሩት፡በቅድመ፡እለ፡አፍኣ፡ወኢትጽሐቁ፡ወኢኀበ፡መኑሂ።
በእንተ፡ሥርዐተ፡ኀዘን
13 ወንፈቅድ፡ታእምሩ፡አኀዊነ፡በእንተ፡እለ፡ኖሙ፡ከመ፡ኢይደሉ፡ትተክዙ፡በላዕሌሆሙ፡ከመ፡ኵሉ፡ሰብእ፡እለ፡ቅቡጻን፡ተስፋሆሙ።
14ወእምከመሰ፡ንትአመን፡ከመ፡ሞተ፡ክርስቶስ፡ወተንሥአ፡ከማሁ፡ያነሥኦሙ፡እግዚአብሔር፡ለምዉታን፡በኢየሱስ፡ወያመጽኦሙ፡ምስሌሁ።
15 ወዘንተ፡ንነግረክሙ፡በቃለ፡እግዚአብሔር፡ንሕነ፡ሕያዋን፡እለ፡ንተርፍ፡አመ፡ምጽአተ፡እግዚእነ፡ኢንበጽሖሙ፡ለምዉታን።
16 እስመ፡ይወርድ፡እግዚእነ፡እምሰማይ፡በትእዛዝ፡ወበቃለ፡ሊቀ፡መላእክት፡ወንፍሐተ፡ቀርን፡ዘእግዚአብሔር፡ወይትነሥኡ፡ምዉታን፡መቅድመ፡እለ፡ሞቱ፡በሃይማኖተ፡ክርስቶስ።
17 ወእምዝ፡ንሕነ፡ሕያዋን፡እለ፡ንተርፍ፡ንትመሠጥ፡በደመና፡ምስሌሆሙ፡ኅቡረ፡ከመ፡ንትቀበሎ፡ለእግዚእነ፡ውስተ፡አየር፡ወንሄሉ፡እንከ፡ዘልፈ፡ኀበ፡እግዚእነ።
18ወይእዜኒ፡መሀሩ፡ቢጸክሙ፡ዘንተ፡ነገረ።