3
ዘከመ፡ተልእከ፡ጢሞቴዎስ፡ኀበ፡ተሰሎንቄ
1 ወስኢነነ፡ተዐግሦ፡አብደርነ፡ንንበር፡አቴና፡አሐተኔ፡ባሕቲተነ።
2ወፈነውናሁ፡ለጢሞቴዎስ፡እኁነ፡ላእከ፡እግዚአብሔር፡ወረድኤትነ፡በትምህርተ፡ክርስቶስ፡ከመ፡ያጽንዕክሙ፡ወያስተብቍዕክሙ፡በእንተ፡ሃይማኖትክሙ።
3 ከመ፡ኢታንቀልቅሉ፡ወኢይቅብጽ፡አሐዱሂ፡እምውስቴትክሙ፡በዛቲ፡ሕማምክሙ፡ተአምሩ፡ለሊክሙ፡ከመ፡ዝንቱ፡ዳእሙ፡ይጸንሐነ።
4ወአመ፡ሀሎኩ፡ኀቤክሙ፡ዘንተ፡ክመ፡አቅደምኩ፡ወነገርኩክሙ፡ከመ፡ሀለወነ፡ንሕምም፡ወይሣቅዩነ፡ወበከመ፡አመርናክሙ፡ኮነ፡ውእቱ።
5 ወበእንተዝ፡አነሂ፡ስኢንየ፡ተዐግሦ፡ፈነውኩ፡ጢሞቴዎስሃ፡ከመ፡አእምር፡ሃይማኖተክሙ፡እመቦ፡ከመ፡አመከረክሙ፡ዘያሜክር፡ወለከንቱ፡ይከውን፡ጻማነ፡ዘበእንቲኣክሙ።
6 ወይእዜሰ፡እምአመ፡በጽሐ፡ጢሞቴዎስ፡ኀቤነ፡እምኀቤክሙ፡ወዜነወነ፡ሃይማኖተክሙ፡ወተፋቅሮተክሙ፡ወከመሂ፡ትዜከሩነ፡በሠናይ፡ዘልፈ፡ወትፈትዉ፡ትርአዩነ፡በከመ፡ንፈቱ፡ንሕነሂ፡ርእዮተክሙ።
7 በእንተዝ፡ተፈሣሕነ፡አኀዊነ፡በእንተ፡ኵሉ፡ሕማምነ፡ወምንዳቤነ፡ዘበእንተ፡ሃይማኖትክሙ።
8እስመ፡ይእዜ፡ነሐዩ፡እምከመ፡አንትሙ፡ቆምክሙ፡በእግዚእነ።
9አየ፡አኰቴተ፡ንክል፡ዐስዮቶ፡ለእግዚአብሔር፡ህየንተ፡ኵሉ፡ፍሥሓነ፡ዘተፈሣሕነ፡በእንቲኣክሙ፡ዘእንበለ፡ከመ፡ንጸሊ፡ኀበ፡አምላክነ፡መዐልተ፡ወሌሊተ።
10ወፈድፋደሰ፡ንጼሊ፡ከመ፡ንርአይ፡ገጸክሙ፡ወይትፈጸም፡ሕጸጸ፡ሃይማኖትክሙ።
11ወእግዚአብሔር፡አቡነ፡ወእግዚእነ፡ኢየሱስ፡ክርስቶስ፡ያርትዕ፡ፍኖተነ፡ኀቤክሙ።
12ወለክሙሂ፡ያብዝኅ፡እግዚእነ፡ወያፈደፍድ፡ተፋቅሮተክሙ፡በበይናቲክሙ፡ወምስለ፡ኵሉ፡ለለ፡አሐዱ፡አሐዱ፡በከመ፡ንሕነ ናፈቅረክሙ፡ለክሙ።
13 ወይጽናዕ፡ልብክሙ፡በንጽሕ፡ወበቅድሳት፡ለቅድመ፡እግዚአብሔር፡አቡነ፡አመ፡ምጽአተ፡እግዚእነ፡ኢየሱስ፡ክርስቶስ፡ምስለ፡ኵሎሙ፡ቅዱሳን።