1
1 እምጳውሎስ፡ወስልዋኖስ፡ወጢሞቴዎስ፡ለቤተ፡ክርስቲያን፡ዘተሰሎንቄ፡በእግዚአብሔር፡አቡነ፡ወእግዚእነ፡ኢየሱስ፡ክርስቶስ።
2 ነአኵቶ፡ለእግዚአብሔር፡ዘልፈ፡በእንቲአክሙ፡ወንዜከረክሙ፡ወትረ፡በጸሎትነ።
3 ወንዜከር፡በቅድመ፡እግዚአብሔር፡አቡነ፡ግብረ፡ሃይማኖትክሙ፡ወጽንዐ፡ፍቅርክሙ፡ወትዕግሥተ፡ተስፋክሙ፡በእግዚእነ፡ኢየሱስ፡ክርስቶስ።
4 ወነአምር፡አኀዊነ፡ፍቁራን፡ዘከመ፡ኀረየክሙ፡እግዚአብሔር።
5 እስመ፡ኢኮነ፡ትምህርትነ፡ኀቤክሙ፡በነገር፡ባሕቲቱ፡ዓዲ፡በኀይልኒ፡ወበመንፈስ፡ቅዱስ፡ወበስኢል፡ምእመን፡ወአንትሙሂ፡ተአምሩ፡ዘከመ፡ኮነ፡በኀቤክሙ፡በእንቲኣክሙ።
6 ወናሁ፡ኪያነ፡ተመሰልክሙ፡ወተወከፍክሙ፡ቃለ፡እግዚአብሔር፡በብዙኅ፡ሕማም፡ምስለ፡ፍሥሓ፡በመንፈስ፡ቅዱስ።
7 ወኮንክምዎሙ፡አርኣያ፡ለእለ፡አምኑ፡ኵሎሙ፡እለ፡በመቄዶንያ፡ወአካይያ።
8እስመ፡እምኀቤክሙ፡ተምህሩ፡ቃለ፡እግዚእነ፡ወሰምዑ፡ወአኮ፡በመቄዶንያ፡ወአካይያ፡ባሕቲቱ፡ዓዲ፡በኵሉ፡በሐውርት፡ተሰምዐት፡ሃይማኖትክሙ፡በእግዚአብሔር፡ወኢንፈቅድ፡ንሕነ፡ምንተኒ፡ንንግር፡በእንቲኣክሙ።
9 ለሊሆሙ፡የአምሩ፡ዘከመ፡ቦእነ፡ኀቤክሙ፡ወዘከመ፡ተመየጥክሙ፡ኀበ፡እግዚአብሔር፡እምአምልኮ፡ጣዖት፡ከመ፡ትትቀነዩ፡ለአምላክ፡ሕያው፡ወጻድቅ።
10 እንዘ፡ትሴፈውዎ፡ለወልዱ፡እምሰማያት፡ዘተንሥአ፡እሙታን፡ኢየሱስ፡ክርስቶስ፡ወውእቱ፡ያድኅነነ፡እመንሱት፡ዘይመጽእ።