5
በእንተ፡ሙአተ፡ዓለም
1 ኵሉ፡ዘየአምን፡ከመ፡ኢየሱስ፡ውእቱ፡መሢሕ፡እምነ፡እግዚአብሔር፡ትወልደ፡ወኵሉ፡ዘያፈቅሮ፡ለወላዲ፡ያፈቅር፡ዘኒ፡ተወልደ፡እምኔሁ።
2 ወበዝንቱ፡ናአምር፡ከመ፡ናፈቅሮ፡ለወልደ፡እግዚአብሔር፡ሶበ፡አፍቀርናሁ፡ለእግዚአብሔር፡ወገበርነ፡ትእዛዞ።
3 እስመ፡ዛቲ፡ይእቲ፡ፍቅሩ፡ለእግዚአብሔር፡ከመ፡ንዕቀብ፡ትእዛዞ።ወትእዛዙኒ፡ኢኮነ፡ክቡደ።
4 እሰመ፡ኵሉ፡ዘተወልደ፡እምእግዚአብሔር፡ይመውኦ፡ለዓለም፡ወዛቲ፡ይእቲ፡ሙአቱ፡እንተ፡ሞኦ፡ለዓለም፡ሃይማኖትክሙ።
5 ወመኑ፡ውእቱ፡ዘይመውኦ፡ለዓለም፡ዝእንበለ፡ዘየአምን፡ከመ፡ኢየሱስ፡ውእቱ፡ወልደ፡እግዚአብሔር።
6 ወከመ፡ውእቱ፡መጽአ፡በማይ፡ወበደም፡ወበመንፈስ፡ኢየሱስ፡ክርስቶስ።ወአኮ፡በማይ፡ባሕቲቱ፡አላ፡በማይኒ፡ወበደምኒ፡ወበመንፈስ፡ውእቱ፡ዘስምዐ፡ይከውን፡ከመ፡መንፈሰ፡ጽድቅ።
7 እስመ፡ሠለስቱ፡እሙንቱ፡እለ፡ይከውኑ፡ስምዐ፡
8 መንፈስ፡ወማይ፡ወደም፡ወሠለስቲሆሙ፡አሐዱ፡እሙንቱ።
9 ወእመሰ፡ስምዐ፡ሰብእ፡ንነሥእ፡ስምዐ፡እግዚአብሔር፡የዐቢ፡ወዛቲ፡ይእቲ፡ስምዑ፡ለእግዚአበሔር፡እንተ፡ስምዐ፡ኮነ፡ላዕለ፡ወልዱ።
10 ዘየአምን፡በወልደ፡እግዚአብሔር፡ሀለወ፡ስምዐ፡እግዚአብሔር፡ምስሌሁ፡ወዘሰ፡ኢየአምን፡በወልዱ፡ሐሳዌ፡ረሰዮ፡እስመ፡ኢየአምን፡በስምዕ፡እንተ፡ስምዐ፡ኮነ፡እግዚአብሔር፡ላዕለ፡ወልዱ።
11 ወዛቲ፡ይእቲ፡ስምዑ፡ለእግዚአብሔር፡እስመ፡ወሀበነ፡ሕይወተ፡ዘለዓለም፡ወዛቲ፡ይእቲ፡ሕይወት፡እንተ፡በወልዱ።
12 ዘሀለወ፡ምስሌሁ፡ወልድ፡ቦቱ፡ሕይወት።ወዘሰ፡ኢሀሎ፡ምስለ፡ወልደ፡እግዚአብሔር፡አልቦቱ፡ሕይወት።
ዘከመ፡ይደሉ፡ጸልዮ፡ለዘአበሰ
13 ወዘንተ፡ጸሐፍኩ፡ለክሙ፡ከመ፡ታእምሩ፡ከመ፡ብክሙ፡ሕይወት፡ዘለዓለም፡እለ፡ተአምኑ፡በስሙ፡ለወልደ፡እግዚአብሔር።
14 ወዛቲ፡ይእቲ፡እንተ፡ብነ፡ገጽ፡በኀቤሁ፡እስመ፡ዘሰአልነ፡ኀቤሁ፡በስመ፡ዚአሁ፡ይሰምዐነ።
15 ወእመሰ፡ርኢነ፡ከመ፡ዘሰአልናሁ፡ይሰምዐነ፡ናአምር፡እንከ፡ከመ፡ብነ፡ስእለት፡ዘሰአልነ፡በኀቤሁ።
16 ወእመሰቦ፡ዘርእዮ፡ለካለኡ፡እንዘ፡ይኤብስ፡አበሳ፡ዘኢኮነ፡ለሞት፡ለይስአሎ፡ለእግዚአብሔር፡ከመ፡ያሕይዎ፡ለዘይኤብስ፡አበሳ፡ዘኢኮነ፡ለሞት።እስመቦ፡አበሳ፡ዘለሞት፡ወኢኮነ፡በእንቲአሁ፡ዘእብለ፡ከመ፡ይስአሉ።
17 እስመ፡ኵሉ፡አበሳ፡ኃጢአት፡ይእቲ፡ወቦ፡ጌጋይ፡ዘኢኮነ፡ለሞት።
18 ናአምር፡ከመ፡ኵሉ፡ዘተወልደ፡እምነ፡እግዚአብሔር፡ኢይኤብስ፡አላ፡ዘተወልደ፡እምእግዚአብሔር፡የዐቅብ፡ርእሶ፡ወእኩይኒ፡ኢይስሕጦ።
19 ናአምሮ፡ከመ፡እምነ፡እግዚአብሔር፡ንሕነ፡ወዓልምሰ፡ኵሉ፡በእኪት፡ይቀውም።
20 ናአምር፡ከመ፡ወልደ፡እግዚአብሔር፡መጽአ፡ወወሀበነ፡ልበ፡ከመ፡ናእምሮ፡ለእግዚአብሔር፡ዘበጽድቅ። ወሀለውነ፡ዘበጽድቅ፡በወልደ፡እግዚአብሔር፡በኢየሱስ፡ክርስቶስ፡ውእቱ፡ዘበአማን፡እግዚአብሔር፡ወብነ፡ሕይወት፡ዘለዓለም።
21 ባቲ፡ደቂቅየ፡ዕቀቡ፡ርእሰክሙ፡እምነ፡አማልክት። ። ።
መልአት፡መልእክተ፡ዮሐንስ፡ቀዳሚት። ። ።
ወስብሐት፡ለእግዚአብሔር፡አሜን። ። ።
