3
በእንተ፡ፍቅረ፡እግዚአብሔር
1 ወርእዩ፡ዘከመ፡እፎ፡ፍቅሩ፡ዘወሀበነ፡አብ፡ከመ፡ውሉደ፡እግዚአብሔር፡ንኩን፡ወኮነሂ።ወበእንተዝ፡ኢፈተወነ፡ዓለም፡እስመ፡ሎቱኒ፡ኢያእመሮ።
2 አኀዊነ፡ይእዜሰ፡ደቂቀ፡እግዚአብሔር፡ንሕነ፡ወዓዲ፡ኢተዐውቀ፡ለነ፡ምንተ፡ንከውን።ናአምር፡ባሕቱ፡ከመ፡እምከመ፡ተዐውቀ፡ለነ፡ከማሁ፡ንከውን፡እስመ፡ንሬእዮ፡ሎቱ፡በከመ፡ውእቱ።
3 ወኵሉ፡ዘይገብራ፡ለኃጢአት፡ወለአበሳኒ፡ገብራ፡ውእቱ፡እስመ፡አበሳ፡ኃጢአት፡ይእቲ።
4 ወኵሉ፡ዘይገብራ፡ለኃጢአት፡ወለአበሳኒ፡ገብራ፡ውእቱ፡እስመ፡አበሳ፡ኃጢአት፡ይእቲ።
5 ወታአምሩ፡ከመ፡አስተርአየ፡ዝክቱ፡ከመ፡ያሰስላ፡ለኃጢአት፡ወኃጢአትሰ፡አልቦ፡ኀቤሁ።
6 ወኵሉ፡ዘቦቱ፡ይነብር፡ኢይኤብስ፡እስመ፡ኵሉ፡ዘይኤብስ፡ኢይሬእዮ ወኢያአምሮ።
7 ደቂቅየ፡ኢያስሕቱክሙ።ኵሉ፡ዘይገብራ፡ለጽድቅ፡ጻድቅ፡ውእቱ፡በከመ፡ዝክቱ፡ጻድቅ፡ውእቱ።
8 ወዘሰ፡ይገብራ፡ለኃጢአት፡እምነ፡ጋኔን፡ውእቱ፡እስመ፡ቀዳሚሁ፡ሰይጣን፡አበሰ።ወበእንተ፡ዝንቱ፡አስተርአየ፡ወልደ፡እግዚአብሔር፡ከመ፡ይሰዐር፡ግብሮ፡ለጋኔን።
9 ወኵሉ፡ዘይትወለድ፡እምእግዚአብሔር፡ኢይገብራ፡ለኃጢአት።እስመ፡ዘርዐ፡ዚአሁ፡ቦቱ፡ይነብር፡ወኢይክል፡አብሶ፡እስመ፡እምእግዚአብሔር፡ተወልደ።
10 ወበዝንቱ፡እሙራን፡ውእቶሙ፡ደቂቀ፡እግዚአብሔር፡ወደቂቀ፡ጋኔን።ኵሉ፡ዘኢይገብራ፡ለጽድቅ፡ኢኮኒ፡እምእግዚአብሔር።ወከማሁ፡ዘኢያፈቅር፡ቢጾ።
ዘከመ፡ይደሉ፡ንትፋቀር፡በበይናቲነ
11 እስመ፡ዛቲ፡ይእቲ፡ትእዛዝ፡እንተ፡ሰማዕክሙ፡ትካት፡ከመ፡ንትፋቀር፡በበይናቲነ።
12 ወአኮ፡በከመ፡ቃየን፡ዘእምእኩይ፡ውእቱ፡ወቀተሎ፡ለእኁሁ።ወበእንተ፡ምንት፡ቀተሎ።እስመ፡ምግባረ፡ ዚአሁ፡እኩይ፡ውእቱ፡ወዘእኁሁሰ፡ጻድቅ፡ውእቱ።
13 ወኢታንክሩ፡አኀዊነ፡እመሂ፡ዓለም፡ጸልአክሙ።
14 ንሕነ፡ናአምር፡ከመ፡ዐደውነ፡እሞት፡ውስተ፡ሕይወት፡እስመ፡ናፈቅር፡ቢጸነ።
15 ወዘሰ፡ኢያፈቅር፡ቢጾ፡ውስተ፡ጽልመት፡ይነብር።
16 ኵሉ፡ዘይጸልእ፡ቢጾ፡ቀታሌ፡ነፍስ፡ውእቱ።ወታአመሩ፡ከመ፡ለቀታሌ፡ነፍስ፡አልቦ፡ሕይወት፡ዘለዓለም፡እንተ፡ትሄሉ፡ላዕሌሁ።
17 ወበዝንቱ፡አእመርናሁ፡ለተፋቅሮ፡እስመ፡ውእቱ፡መጠወ፡ነፍሶ፡በእንቲአነ፡ወንሕነኒ፡ይደልወኒ፡ንመጡ፡ነፍሰኒ፡በእንተ፡ቢጽነ።
18 ወዘቦቱ፡መንበርተ፡ዝንቱ፡ዓለም፡ወይሬኢ፡ቢጾ፡ጽኑሰ፡ወየዐጹ፡ምሕረቶ፡እምኔሁ፡እፎ፡ይነብር፡ፍቅረ፡እግዘእብሔር፡ላዕሌሁ።
19 ደቀቅየ፡ኢንትፋቀር፡በቃል፡ወበልሳን፡ዘእንበለ፡በምግባር፡ወበጽድቅ።
20 ወበዝንቱ፡ናአምር፡ከመ፡እምጽድቅ፡ንሕነ።ወንሕነሰ፡ቅድሜሁ፡ናመክሮ፡ለልብነ።ወእመሰ፡ያርሰሐስሐነ፡ልብኒ፡እምአበሳነ፡ወያዐብዮ፡እግዚአብሔር፡ለልብነ፡ወያአምር፡ኵሎ።
21 አኀዊነ፡እመሰ፡ኢቀለየነ፡ልብነ፡ገጽ፡ብነ፡ኀበ፡እግዚአብሔር።
22 ወዘሂ፡ሰአልናሁ፡ንነሥእ፡እምኀቤሁ፡እስመ፡ትእዛዞ፡ነዐቅብ፡ወንገብር፡ዘይኤድሞ፡ቅድሜሁ።
23 ወዛቲ፡ይእቲ፡ትእዛዙ፡ከመ፡ንእመን፡በወልዱ፡ኢየሱስ፡ክርስቶስ፡ወንትፋቀር፡በበይናቲነ፡በከመ፡ወሀበነ፡ትእዛዞ።
24 ወዘሰ፡የዐቅብ፡ትእዛዞ፡ቦቱ፡ይነብር፡ወውእቱኒ፡ቦቱ።ወበዝንቱ፡ናአምር፡ከመ፡ይነብር፡ምስሌነ፡እምነ፡መነፈሱ፡ቅዱስ፡ዘወሀበነ።
