1
በእንተ፡ነገረ፡ሕይወት
1 ንዜንወክሙ፡በእንተ፡ውእቱ፡ዘሀሎ፡እምቅድም፡ውእቱ፡ዘሰማዕናሁ፡ወዘርኢናሁ፡በአዕይንቲነ፡ወዘጠየቅነ፡ወዘገሠሣሁ፡እደዊነ፡በእንተ፡ነገረ፡ሕይወት።
2 እስመ፡ሕይወት፡ተዐውቀት፡ለነ፡ወርኢናሃ፡ወስምዐ፡ኮነ፡ወንዜንወክሙ፡ለክሙኒ፡ሕይወተ፡እንተ፡ለዓለም፡እንተ፡ሀለወት፡ኀበ፡አብ፡ወተዐውቀት፡ለነ።
3 ወርኢናሃ፡ወሰማዕናሃ፡ወንዜንወክሙ፡ለክሙኒ፡ከመ፡አንትሙኒ፡ትኩኑ፡ሱታፌ፡ምስሌነ።ወሱታፌነሰ፡ ምስለ፡አብ፡ወምስለ፡ወልዱ፡ኢየሱስ፡ክርስቶስ።
4 ወዘንተ፡ንጽሕፍ፡ለክሙ፡ከመ፡ትፍሥሕትክሙ፡ፍጽምተ፡ትኩን።
5 ወዛቲ፡ይእቲ፡ዜና፡እንተ፡ሰማዕናሃ፡ትካት፡እምኔሁ፡ወንዜንወክሙ፡ከመ፡እግዚአብሔር፡ብርሃን፡ውእቱ፡ወጽልመትሰ፡አልቦ፡ኀቤሁ፡ወኢአሐቲኒ።
6 ወእመሰ፡ንቤለክሙ፡ብነ፡ሱታፌ፡ምስሌሁ፡ወውስተ፡ጽልመት፡ነሐውር፡ንሔሱ፡ወኢንገብራ፡ለርትዕ።
7 ወእመሰ፡ውስተ፡ብርሃን፡ነሐውር፡በከመ፡ውእቱ፡ውስተ፡ብርሃን፡ውእቱ፡ሱቱፋን፡ንሕነ፡በበይናቲነ፡ወደሙ፡ለኢየሱስ፡ክርስቶስ፡ያነጽሐነ፡እምኵሉ፡ኃጣውኢነ።
8 ወእመሰ፡ንብል፡አልብነ፡ኃጢአት፡ንጌጊ፡ለርእስነ፡ወአልቦ፡ርትዕ፡ኀቤነ።
9 ወእመሰ፡ነገርነ፡ወአመነ፡ኃጢአተነ፡ምእመን፡ውእቱ፡ወጻድቅ፡ከመ፡ይኅድግ፡ለነ፡ኃጣውኢነ፡ወያነጽሐነ፡እምኵሉ፡አበሳነ።
10 ወእመሰ፡ንቤ፡ኢአበስነ፡ሐሳዌ፡ንሬስዮ፡ሎቱ፡ወቃሉኒ፡ኢሀሎ፡ኀቤነ።